मोहनलाल चौधरी, राजापुर नगरपालिका ७, बदालपुर, बर्दियाक स्थायी निबासी हुइट । हाल उहाँ ठाकुरद्धाराम थारु होम रिसोर्ट सञ्चालनमे लन्ल बाट । थारु समुदायक शिक्षा, आर्थिक, सामाजिक ओ राजनीतिक परिवर्तन, विकासक लाग हुँकार बिशेस झुकाब बाटिन् ।
स्टेप्स का हो ?
यि अंग्रेजीम स्टेप्स हो । याकर पुरा रुप कलक सस्टेनेबल फर एजुकेशन प्रोमोशन इन सोसाइटी हो । याकर नेपाली उल्ठा कलक समाजम शिक्षाक लाग दिगो सहकार्य कना संस्था हम्र स्थापना कर जैटि बाटि । याकर मुख्य उद्देश्य कलक शिक्षा केन्द्रित हो । शिक्षा केन्दित काकर हुइल् कना एक्ठो जिज्ञासा जरुर बा । शिक्षा केन्द्रित हुइपर्ना जिज्ञासाहँ मेटाइक लाग काहो कलसे, समग्र नेपालके समाजहँ हेरी । वाकर बिशेसकैक हमार थारु समाज हेरबेर कसिन डेखपर्टा कलसे पह्र पैना लर्का पह्र निडेना व पहर्ना लर्का पह्र निपैना ।
याकर कारण कलक काहो जे पह्र चहटा तर पह्र नै पाइठो कलसे वाकर मुख्यकरण कलक गरिबी हो । गरिबीक कारण जोन पहर्नाम ट्यालेन्ट विद्यार्थी बाट, जोन पहर्ना सप्ना डेख्ठ, जोन आपन उज्वल भविष्यक लाग ऊ सप्ना बिच्चम टुह जाइटा । असिक ह्यारबेर यदि हम्र पह्र पैना बच्चा व पह्र चहना बच्चा नैपर्हैना हो कलसे समाज कहाँ जाइट ? समाजहँ जोन हम्र आघ बर्हैना सोंच बनैल बाटि,उ अनुसारट समाज आघ नैबर्ही ।
यी अभियान थारु समुदायक लाग हो कि, सक्कुन्हँक लाग ?
याकर बिशेस लक्षित क्षेत्र कलक दाङ जिल्लासे लेक कन्चनपुर सम् कल बाटि । भौगोलिक हिसाबले कबि कलसे दाङसे लेक कन्चनपुरसम् थारु बाहुल्य क्षेत्र हो । थारु बाहुल्य क्षेत्र रहबेर हम्र जोन यी अभियान चलाइटि । यी अभियानम बिशेसकैक जोर डिह खोज्लक कलक काहो कलसे हमारठे स्रोत साधन बा । हम्र स्रोतहँ बैज्ञानिक रुपम एकदम बौद्धिकरुपम परिचालन करब कलसे हमार स्रोतले फे हम्र पर्हाइ स्याकब । संगसंग लर्का बच्चन पर्हाइ परठ् । पिछ्रल समुदायहँ उठाइक परठ् कना राष्ट्रिय अन्तराष्ट्रिय स्टरम मनैफे बाट सहयोगी मनैफे बाट । उहाँ हुकनसे सहयोगफे लेक मजासे यी चिजहँ हम्र आघ बर्हाइ स्याकब कना विश्वासफे हो ।
कोनचिज अप्नहँ यी कामम लग्ना प्रेरणा डिहल ?
बरा सान्दर्भिक प्रश्न कर्लि । यी कहबेर आपन बाल्यकाल सम्झठु मै । बाल्यकाल बिटाइबेर हमार बरवार परिवार रह । ऊ ब्यालक हमार सम्पन्न परिवार रह, गन्जाइ । जब मै पर्हुं टब म्वारसंग एक्ठो संघारी रहैं । ऊ उमेरले महिनले एकचुटि भारि रहैं । हुँकार नाऊ गोविन्द हुइन् । ऊ ब्यालक उ कमैया घरक रहैं । उ एकदमै जन्ना रहैं । उ स्कुल एकदम नियमित जाअँइ । तर मै स्कुलके एकदमै भगौडा विद्यार्थी रहुँ । मै स्कुलसे एकदम भग्टी रहुँ । जब महि स्कुल जाइक पर, स्कुल जैनासे पहिले हुकारठे जाउँ । त ऊ म्वार गृहकार्य फे कैडिहैं । म्वार घरसे लैगिलक पौंर्हा जोन डाइक बनाइल् भटौर कहि हुकहिनसे बाँट्क खाइ । मै आपन भटौरले हुकहिन गृहकार्य कराऊँ । तबमारे स्कुलमे महिन पिटाइ फे कम ह्वाए । तबफे लागल् बान ड्वासर टिसर डिनसे भाग लागुँ । मै एक्ठो सम्पन्न घर परिवार हुइल् कारण मै यहोर उहोंरसे गेस गाँस्क, ढकेल ढकाल्क महि म्वार पर्हाइ निरन्तररुपम हुइल् । यी कारण मै आज यहाँ बाटुँ । याकर मतलव मै पहर लिख्क एनजिओ आईएनजिओ युएन लगायतम जागिर खाक, आब मजासे आपन ब्यापार चलाइटुँ । समाजिक क्षेत्रम कामफे कर्ना कोशिस कर्टि बाटुँ । तर व्यक्तिगत क्षमता हेर्ना हो कलसे महिनसे ट्यालेन्ट ऊ रहैं । अवसर पैलसे त महिसे आउर बरवार बनपर्ना रहिन् । तर गरिबीकेकारण अशिक्षाके शिकार उ बन्ल ।
गरीब हुइलक कारण लर्का पह्र निसेक्लक हुइट कि वाताबरण नि होक ?
यम्न दुई चिज बा । एक स्तरसम् गरिबी असर करठ् व एक स्तरसम् गरिबी असर नै करठ् । तर एकठो प्रत्यक्ष गरिबी असर बा । काकर कि उच्च शिक्षाके चहकफे पर्ह सेक्ना अवस्था गाँउघरम नै हो । एक्ठो काहो कलसे गरिबी आधारभुत शिक्षामफे असर करठ् । ऊ कसिक करठ् कलसे मै पह्र लिख्क म्वार गन्तब्य कहाँ बा कना ऊ घरके सम्पन्नता, ऊ घरके उपर पह्राई सेक्ना व उ घरके आर्थिक हैसियत फे निर्धारण करठ् । हमार थारु समुदायम का डेखा परठ् कलसे गाँउक लग्ग स्कुलम ट कन्ज्वा कप्वा खवाक लर्का पर्ह चल्जिठ । तर हुँकन्हँक अन्तिम लक्ष्य नै गाउँक स्कुलम कप्वा भात खाक पर्ह जैना होजैठिन् । ओठहँसे हुँकन्हँक लक्ष्य जो साँकिर होजैठिन् । एसएलसी पास हुइल् लर्कन गाँउ उहँर हिलठ् भैया बाबु हुँक्रडेख्टि रठ । उहमार निराशापन सुरुहँसे सुरु होजाइठ् कि म्वार डाइबाबा एसएलसी सम् केल पर्हाइ सेकहीं ।
अप्न हुँकन्हँक लक्ष्य उच्च शिक्षा हो या यिहिनसे तरेक उमेर समुहमफे ?
शिक्षा कटि किल् हम्र दुनु शिक्षाहँ लैजाई चाहटी । उच्च शिक्षाम आइक लाग एक्ठो ट्यालेन्ट विद्यार्थी ट चाहल् चाहल् । यी जरुरी नैहो कि सक्कुु घरम ट्यालेन्ट विद्यार्थी जलम् जैहिं । एकदमै गरिब, अपाङ्ग, टुवर फे जल्म सेक्ठ । उहमार यी अभियानके मुख्य उद्देश्य कलक गाँऊके आर्थिक स्रोतहँ संकलन कर्ना हो । ठ्याक्क विधि त नै बनल् हो । हम्र बनैटि बाटी । ४० प्रतिशत रकम जोन गाँऊसे उठि उह गाँऊम छोर्डेना । ऊ गाउँक समिति परिचालन करी । उ गाउँक समिटि विसेसकैक जे सब्से गरिब बा, जे टुवर बा, जे अपाङग बा तर वाकर आधारभुत शिक्षाके लाग उ कोष उहाँ प्रयोग ह्वाय । बाँकि बाचल ६० प्रतिशत रकम अक्षय कोषके लाग अक्षय कोषम जाए ।
पह्रे नै छोर्ना स्टेप्सके शिक्षाके कसिन् रणनिति बा ?
परिवारसे अन्तरसम्बन्धित रणनीति काहो कलसे अप्नक अर्थ ट्रिकोणात्मक म्वार बिश्लेषण हो । विद्यार्थी कलक तिन जहन्क बिच्चम रहल् भविष्यक युवा जनशक्ति हो । उ कलक वाकर परिवार, स्कुल व स्कुल व्यस्थापन समिति । यी तीन जहन्क बिच्चम बिद्यार्थी बा । यी तीन जहन्क बिच्चम बैठ्क विद्यार्थीक अवस्था हेर्बि कलसे परिवारके आपन मनोदसा का बा । म्वार लर्का चहा जट्रा जन्ना होजाए मै आपन लर्कन पर्हाइ नैस्याकम् । काकर कि म्वार लर्का बच्चन पर्हा डिहुइया कौनो संस्थाफे नैहो । ड्वासर चिज हो स्कुल । स्कुलम पर्हैना शिक्षक हुकन् फे पटा का बा कलसे हम्र जट्रा पर्हाइ उ समुदायके हैसियत कलक जट्रा मजा बिद्यार्थी निक्र उप्पर पर्हाइ सेक्ना हैसियत नै हुइन् । स्कुल व्यवस्थापन समिति फे उह मानसिकताम बैठल् बा । उहमार हमार कना का हो कलसे जब हम्र मुठिडान किलोडान या हम्र कैक हम्र कोष स्थापित कर्डारप कलसे एक्ठो चिजक का ग्यारेन्टि करप कलसे अभिभावक हुँक्रफे म्वार लर्का बच्चाफे मजासे अभिभावकत्व डेब । लर्का बच्चन पर्हैनाम फे ढ्यान डेब ।
एकठो एनजिओ जसिन संस्था सरकारी स्कुलहँ कसिक उद्देश्यम डोर्याइ सेक्बी?
असिन हो महिहँ कालागट् वास्तब म यी अभियान हो । तर अभियान भिट्टर ज्वारल बा स्रोत । आन्तरिक स्रोत व बाहिरी स्रोत । स्रोत परिचालन करकलाग एक्ठो अप्नहँ आधिकारिक संस्था नै बनट सम् अप्नहँस्रोत परिचान कर नैमिल्नाकारण यिहिं बैधानिकता डेना जरुरी बा । यीह बैधानिकता डेस्याकल् पाछ हम्र आजटक जोन एक्ठो परम्परा डेख्गील बा । शिक्षकहुँक्र एकदमै तालिम प्राप्त बाट । टरफे शिक्षक हुँक्र पदअनुसार जिम्मेवार नैडेख्मिल्लक अवस्थाफे हो । कौनो कौनो शिक्षक जिम्मेवारफे बाट । यहाँ सक्कु जहन दोष लगैना अवस्था नै हो । तर हमार समग्र परिस्थिति असिन बनाडेल बाटि कि समाजम शिक्षककेल जिम्मेवार हो । डाइबाबा फे जिम्मेवार हुइक परल् । लर्काफे जिम्मेवार हुइक् परल् । एक्ठो जिम्मेवार हुइना वातावरण बनाइपर्ना बा । उह वातावरण बनैना काम स्टेप्स करि कना महिन विश्वास बा ।
अप्न कसिन सपना डेख्ल बाटी?
मोर डेखल् सप्ना का हो कलसे उच्च शिक्षा पर्हाइ सेक्ना सम्भव बा । उच्च शिक्षा नै पर्हाइट् सम् हमार ग्रामिन समाजक थारु समाज कहि या दलित समाज कहि चहाजोन समाज कहि, चाहा जोन समाजक मनैन कहि, जहाँ ट्यालेन्ट विद्यार्थी जल्मट हुकन्क सप्ना बर्वार रठिन् । हुकन्क सप्ना टुर्डिहक नैपरल् । हुकन्क सप्ना साकार करैना हमार जिम्मेवारी हो ।
समुदाय सहयोग कर्टि बा त ? का हुँक्र मोटिभेट बाट ?
एकदमै । समुदाय मोटिभेट बा । ज्वलन्ट उदाहरण का हो कलसे यी चिज ३ बरस आघसे समुदायम छलफल चलाइबेर विश्वासके संकेत पागैल् । २ महिना आघ हमार बदालपुर गाँऊम हम्र छलफल चलैली । एक्के छलफलसे लगभग २५० घर परिवार मोटिभेट हुइल् । हुँक्र अन्न संकलन कर्ल त एक्क संकलनसे लगभग ४० हजार रुप्या उठल् । एक्के धान बाली । आब यी गहुँबालीफे वस्टक आइ । यी हरेक बर्स निरन्तर चल्टि जाइ । कहुँकहुँ टिहाइ उठा राखल् रहैं । टिहाइ उठाइल् गाँऊफे हम्र टिहाइ उठाब् कल । १० हजार अठ्हँ पहारीपुर गाँउम उठाडर्ल । ठाकुरद्धाराके बन्टर्याम १० हजार रुप्या उठाडर्ल बाट ।
अत्रा भारी रकम उठटा, व्यवस्थापन कसिक कैबी ?
आशंका कर्ना ठाऊँ नैरहि । विधि रहि । जोन गाँऊसे जत्रा रकम उठि उ गाँऊम फे समिति रहि । उ गाँउक निश्चित पैसा ऊ गाँऊक आधारभुत शिक्षाकेलाग प्रयोग हुइ । उहाँसे कट्राचे पैसा अक्षय कोषम गिल् कना उ गाँउम खातापाता रहि । यी संस्थागत होजाई कलसे लेखा प्रणाली अनुसार वार्षिक अडिट हुई । मै आपन तरफसे वाचा का कर्ल बाटुँ कलसे मै लग्लक कारण काहो ? अत्रा मै तयारी कर्लक काहो कलसे मै यी अभियान चलाई बेर, अभियानके क्रमम समुदायसे उठल् या अन्तराष्ट्रिय समुदायसे उठल् सहयोग एक पैसा फे खर्च नैकर्ना अभियानम लागल् बाटुँ । उहमार मै आपन व्यावसाय स्थापित कर जाइटुँ । व्यावसायक संगसंग यी अभियानफे चलैम् कना उद्देश्यसे बा । कम्टिम ५०० जहन उच्च शिक्षा डाक्टर, ईन्जिनियर, पाइलट का बन्ना इच्छा बाटिन्, हुकन्क उ सप्ना पुरा कराइ स्याकब कहटुँ ।
प्रस्तुतिः सोम डेमनडौरा
