दुर्जनकुमार चौधरी
धनगढी, कुवाँर ५ गते । कैलाली जिल्लामे कार्यरत थारु निजामति कर्मचारी हुक्रनके चिनजान व डशिया डेवारीके शुभकामना आदान प्रदान हुइल बा । कार्यक्रममे निजामति क्षेत्रमे थारु हुकनके बाहुल्यता बह्राइ पर्ना बात बत्वाइगिल बा ।
कैलाली जिल्लामे कार्यरत थारु कर्मचारी समन्वय समिति कैलालीके आयोजनामे हुइल कार्यक्रमके बर्का पहुना कोष तथा लेखा नियन्त्रक कार्यालयके प्रमुख तथा समन्वय समितिके सल्लाहकार शिवप्रसाद चौधरी रहैं । समन्वय समितिसे अइना दिनमे लोकसेवाके कक्षा सञ्चालन कैना सोच रहल बटैटी समाजमे रहल पह्रल लिखल विद्यार्थी व्यक्ति हुकनहे लोकसेवा ओर डगर देखाइ परना जरुरी रहल बटैलै ।
हमार भाषा हमार संस्कृति पहिचान हो हमार, इही हे बचैना अभियान हो हमार’ कना मूल नारासहित कार्यक्रमके आयोजना हुइल रहे । कार्यक्रममे जिल्ला वन कार्यालयके रेन्जर रामऔतार चौधरी कार्यक्रमसे नेतृत्व विकास हुइना बात बत्वाइल रहिट ।
ओस्टके जिल्ला कानुनी सहायता केन्द्रके अधिकृत तथा अधिवक्ता देवीलाल चौधरी सम्बन्ध, समन्वय ओ निरन्तरता देलेसे किल एक आपसमे सम्बन्ध गाह्र हुईट कना बात बत्वैलै ।
समन्वय समितिसे अइना दिनमे लोकसेवाके कक्षा सञ्चालन कैना सोच रहल बटैटी समाजमे रहल पह्रल लिखल विद्यार्थी व्यक्ति हुकनहे लोकसेवा ओर डगर देखाइ परना जरुरी रहल बटैलै ।
कार्यक्रममे अधिवक्ता जोहारीलाल चौधरी, नाथुराम चौधरी कानुनी सम्बन्धी जानकारी देटी पास बन्धकीके कानुनमे व्यवस्था नै रहल ओ मिटर व्याज गैर कानुनी रहल ओरसे यीहीसे सचेत रहे पर्ना बत्वाइल रहिट ।
ओस्टके कार्यक्रममे सामाजिक स्वास्थ्य सुरक्षा विकास समिति कैलालीके जिल्ला प्रबन्धक नरेश चौधरी, सहकारी प्रशिक्षण तथा डिभिजन कार्यालयके लेखा अधिकृत महेशकुमार चौधरी (कुचिला), आशा अस्पतालके संचालक तथा समन्वय समितिके पूर्व संयोजक जगतराम चौधरी, पवेरा स्वास्थ्य चौकीके स्वास्थ्यकर्मी पार्वती चौधरी, नेपाल राष्ट्र बैंकके कर्मचारी रामकुमार चौधरी, पहलमान स्वास्थ्य चौकीके सिनियर अहेव रामप्रसाद चौधरीलगायतके डशिया व डेवारीके शुभकामना मन्तव्य व्यक्त करले रहिट ।
कार्यक्रममे समन्वय समितिके संयोजक तथा जिल्ला जनस्वास्थ्यके स्वास्थ्य संयोजक ओ घरगोसिया समेत रहल कैलाशकुमार चौधरी एकाापसमे अपनत्वके भावना जगाके समन्वय कैनाकेसाथे अवकाश हुइल कर्मचारी हुकनहे विदाई कैना ओ लोकसेवा पास करके आइल नवआगन्तुक कर्मचारी हुकनहे स्वागत कैना योजना रहल बटैटी शुभकामनासहित कार्यक्रमके समापन कैले रहिट ।
मालपोत कार्यालयके खरिदार धर्मराज चौधरीसे कार्यक्रम संचालन करगील रहे कलेसे नायब सुब्बा ठाकुरराम चौधरी स्वागत मन्तव्य व्यक्त करले रहिट । कार्यक्रममे टमान कार्यालयके कर्मचारी तथा बुद्धिजीविहुकनके उपस्थिति रहल रहे ।
