थारू भासाम पत्रकारिता कर्ना सहज निहो (डंगौरा थारुभाषा)

“पत्रकार” राज्यक चौथा अगंसे परिचित बा । आमजनताक वीचम सुचना प्रवाह कर्ना ओ राज्यक हरेक कामकाज ह जनताकवीच म पारडर्सी रुपम लैजिना अहम भूमिका पत्रकार हुकनक रहट । चाहे ऊ प्रकाशन या प्रसारन जौनो फे माध्यमसे हुई । आम जनमासम जत्रा नाउ ओ सकारात्मक रुपम परिचीत बा ओहिसे और ढ्यार चुनौती बा यी क्षेत्रम काम कर्ना । झन् नेपाली भासाम जत्रा सहज ओ अवरस बा पत्रकारिता कर्ना थारु भासाम पत्रकारिता कर्ना बहुट कठिन ओ चुनौती पूर्ण बा । नेपालम बोल्जैना ढेउर भासामध्ये चौठा स्थानम पर्ना थारु भासाम पत्रकारिता कर्ना पत्रकार हुकनक संख्या नेपाली भासासे बहुट कम पाजाईट । तर फे नेपाली भासाम पत्रकारिता कर्ना हुकनसे तुलना करबेर थारु भासा पाछ परल मन्लसे फे और जातीक भासाम सायद आघ जो मान पर्ठा । थारु भासाम पत्रकारिता कर्ना लौव पत्रकार हुकनक संख्या जस्स जस्स बहर्टी जाईटा ओस्सहेक पुराण पत्रकार हुकनक संख्याम कमि फे अइटी पाछ जाइटा ।

नेपालक तराई क्षेत्रक ढेउर जसिन सामुदायिक एफएम रेडियो÷पत्रपत्रिका÷अनलाईन मिडियाम थारु भासाम पत्रकारिता कर्ना पत्रकार हुकनक बाहु््ल्यता पक्क फे बा । तर सुरुवातम जत्राढेउर संख्या रलसे फे पाछ ढिर ढिर यी संख्याम कमी अ‍ैटी रहट । याकहि सुरुवात से थारु भासाम पत्रकारिता कर्ना थारु पत्रकार हुुक्र यिहे थारु भासाम जो पत्रकारिता कर्टी आइल बहुट कम मात्राम भेट्जैठ । सुरुम जौन रहर, हौसला ओ जोस लेख आघ बह्रल रठ लौव थारु पत्रकार हुक्र तर थारु भासाम शब्दकोष एवम् लिपीक कमि ओ सक्कु थारु हुकन मान्य हुइना उचित डिस्नेरीक कमिले फे थारु पत्रकार हुकन थारु भासाम पत्रकारिता कर्ना असहज वाताबरणक श्रृजना कर्ल बा । जेकाकारण थारु भासाम जो पत्रकारिता कर्ना लौव पत्रकार हुकनक काम कर्ना ईच्छाशतmी जो कम हुईलक पाजैठा ।

जत्रा फे एफएम रेडियोम समाचार एक्क ब्यालम प्रसारण हुइठा ऊ पूरापुर नेपाली भासाक समाचारह केल्हुक थारु भासाम उल्ठा करल केल पाजाईट ।

एफएम रेडियोम दाङक सन्दर्भम प्रायजसो दाङक सक्कु एफएम रेडियोम सन्झ्याक ५ बजे एक्क ब्यालाम थारु भासाम समाचार प्रसारण कर्ना नियम असक जो बन्स्याकल बा । तर जत्रा फे एफएम रेडियोम समाचार एक्क ब्यालम प्रसारण हुइठा ऊ पूरापुर नेपाली भासाक समाचारह केल्हुक थारु भासाम उल्ठा करल केल पाजाईट । तर उल्ठा करल समाचार फे थारु समाचार वाचकहुक्र एफएम पिच्छे आपन आपन ओंर्से आढा थारु आढा नेपाली भासाम उल्ठा करल पाजिठा । जेकार कारण समाचारम उल्लेख कैगिल थारु शब्द फरक फरक हुईल होंर्से श्रोता हुकन फे एक्क शब्द एक्क ठाऊम फरक फरक सुनबेर ढेउर प्रभाव परल पाजिठा । काजेकि श्रोताहुक्र मिडियाम जो बोल्गैल शब्दह जो सहि मन्ठ । तर मिडियाम जो प्रयोग हुइना एफएम पिच्छे शब्द फरक फरक हुइलओंर्से कौन शब्दह सहि मानी कैख अन्ने उलम रहल पाजिठा । अस्सहेख स्थानिय रुपम रहल प्राय एफएममसे मेरमह्रीक थारु भासाक कार्यक्रम उत्पादन ओ प्रशारण कैजिठा । तर आम्हीसम् थारु भासाक कार्यक्रम लम्मा समयसम् प्रसारण हुईटी रहल निपाजाईट । थारु भासाक कार्यक्रम नियमित रुपम प्रसारण निहुईना ओ निस्चितब्याला या पैढार पूरा विनाहुईल कार्यक्रम सञ्चालक हुक्र कार्यक्रम प्रसारण करछ्वारल पाजिठा एका मुख्यकारण फे भासाक समस्या डेख्जैठा । थारु कार्यक्रमम कार्यक्रम प्रस्तोता हुक्र लगभग लगभग आढा जति नेपाली शब्दक प्रयोग करल पाजिठा । काजेकी थारु कार्यक्रम प्रस्तोता हुक्र जो थारु भासाओ शब्द छनोटम अन्यौलम रहल बाट । जेकाकारण आपन अनुसार या हरेक प्रस्तोतापिच्छे थारु भासा एवम् शब्द छनोट जो फरक फरक रुपम आपन मनपरि ढङ्गले प्रयोग करल कारण श्रोताहुकन निमजा प्रभाव पारल बा ।

अस्सहेख छापा मिडिया ओ अनलाईन मिडियाम समाचार लिख्टी आईल थारु पत्रकार हुकन जौन रफ्तारम नेपाली भासाम समाचार लिख्ना सहज बा अस्ट सहज थारु भासाम निहो । यीओ अस्ट असहजटाक कारण फे थारु भासाम छापाखाना ओ अनलाईन मिडिया बहुट मुस्किलले प्रकासन हुईल पाजिठा । तर जत्रा फे थारु भासाक पत्रपत्रीका ओ अनलाईन समाचार बाट ऊ नियमित रुपम प्रकासन हुईल निपाजाईट । यी मिडियाम फे थारु बर्ण ओ शब्दक उचित चयन निकर कारण पाठकहुकन आपन थारु भासामसे जो विस्वास कमहुईल पाजीठा । फरक फरक शब्द ओ बर्णक छनोटक कारण फे थारु भासा हम्र थारु पत्रकार हुक्र जो बिग्रैटी बाटी किकना बिचार थारु पत्रकार हुकन कम अईना स्वभाविकै हो ।

थारु भासाम पत्रकारिता कर्ना थारु पत्रकार हुकन थप हौसला डेना उद्देस्यले थारु भासाम उचिट डिस्नेरी ओ लिपी टयार पार पर्ना आवस्यक बा ।

त आब थारु भासाम पत्रकारिता कर्ना थारु पत्रकार हुकन थप हौसला डेना उद्देस्यले थारु भासाम उचिट डिस्नेरी ओ लिपी टयार पार पर्ना आवस्यक बा । जेकारकारण थारु पत्रकार हुकन थारु भासाम पत्रकारीता करबेर कुछ बाढा निह्वाय । ताकि थारु शब्द, लिपी ओ बर्णक प्रयोग थारु पत्रकार हुक्र आपन तयार पारल कार्यक्रम, समाचार, लेख, रचनाम निसंकोच प्रयोग कर सेकहीं । अस्सहेख हम्र ब्वालवेर ट थारु भासाम हमार लवजम बोल्ठी तर हम्र लिखबेर नेपाली लिपीक प्रयोग कर्ठी काजेकि हमार थारु हुकनक आपन लिपी नै हो । जस्टक काठमाडौं उपत्यकाम नेवार जातीक बाहुलबा ओ नेवार भासा बोल्जाइट ओ हुक्र आपन छुट्ट लिपीतयार पार सेक्ल बाट । ट आब हमार थारु भासाम और समुदाय हुकनक का प्रश्न उठसेक्ठा कलसे हम्र बोल्टी आईल थारु शब्द, थारु भासा हो कि नहीँ?ओ असिन प्रश्न उठ्ना फे एक हिसाबले स्वभाविकै फे हो । काजेकी हम्र ब्वालबेर थारु भासा, लवज प्रयोग कर्लसे फे हम्र लिखबेर ट और भासाक लिपी प्रयोग कर्टी आईल बाटी । हुईना ट बर्दियाक बासगढी नगरपालिकाम थारु भासाह कामकाजी भासाक रुपम घोषणा कै सेक्ल बा तर घोषणा कैखकेल कुछ फे उपलब्धी हुई जसिन नि लागट । काजेकी थारु भासाम एकरुपता जो नै हो, एक्क शब्दफे फरक फरक अर्थ लग्ठा ओ सब्से भारी बात थारु भासाह कामकाजी भासाक रुपम घोषणा ट कैगिल तर थारु भासा जाट्टीक जो कामकाजी भासाक रुपम आघ बह्री ट? का थारुहुक्र जो थारु भासाम बिज्ञ बाट ट? जबकि थारु मनै जो ठेट थारु भासा ब्वाल निस्याकट कलसे कसिक थारु भासाह कामकाजी भासाक रुपम आघ बह्रल मान्जाई ।

थारु पत्रकार हुकन सम्बन्धित सञ्चारमाध्यमसे कम्तीम पत्रकार हुकनक पारिश्रमिकक ब्यवस्थाक माग करपर्ना आवस्यक    बा । ओ थारु पत्रकारक पहुँच फे पत्रकार महासंघसम् पुगाई पर्ना आवस्यक बा ।

जबसम् हमा थारु हुकनक आपन थारु लिपी निरहि तबसम् थारु भासाह कामकाजक भासा बनिना कठिन बा । उहोहोंर्से सब्से पहिला ट थारु लिपीक बिकास करपैना जरुरी बा । अस्सहेख संख्यात्मक रुपम कम मात्राम रहल थारु पत्रकार हुकनक संख्या बह्राईक लाग फे थारु भासाविद, संस्कृतविद ओ थारु समाजक ओ थारु भासाम लम्मा समयसम् पत्रकारीता कर्टी आईल पत्रकार हुकन प्रशिक्षक रुपम ढैख भर्खर भर्खर थारु भासाम पत्रकारिता कर्टी आईल पत्रकार हुकन क्षमता अधिबृद्धी तालिम सञ्चालन करपर्ना आवस्यक बा । जौन तालिम आयोजना करकलाग उचित बजेटक ब्यवस्ठा स्थानिय सरकार, नगरपालिका÷उप–महानगरपालिका÷महानगरपालिका÷गाउँपालिकासे माग कर पर्ठा । अत्रकेल निहोख थारु भासाम पत्रकारिता कर्टी आईल थारु पत्रकार हुकनक संख्या बह्राईक लाग, हौसला बह्राईकलाग ओ पत्रकारीता क्षेत्रह जो आपन पेसा बनाईकलाग थारु पत्रकार हुकन सम्बन्धित सञ्चारमाध्यमसे कम्तीम पत्रकार हुकनक पारिश्रमिकक ब्यवस्थाक माग करपर्ना आवस्यक बा । ओ थारु पत्रकारक पहुँच फे पत्रकार महासंघसम् पुगाई पर्ना आवस्यक बा । ओ थारु पत्रकार हुक्र पाठक ओ श्रोता हुकनक मन जितकलाग ओ अप्न लम्मा समयसम् थारु भासाम पत्रकारिता करकलाग अप्न लगनसिल ओ दृढविश्वासले नियमित रुपम पत्रकारिता कर पर्ठा ओ अप्न समाजक ऐना बन पर्ठा । काजेकी समाजह मजा डगरहोंर डोरैना काम पत्रकारक हो ।