सालिकराम चौधरी ‘सौगात’
गायक
गीत संगीतम कैह्यासे लग्ली ?
जब म्वार मनम बोलीचालिके भाषा परिवर्तन आइल तबहसे गीत गुनगुनाइ सुरु करल असक लागठ । जहासम्म महि लग्ठा ७ बरषक उमेरमसे जाननिजान गीत गुनगुनाइ भिर्नु । स्कूलके जीवनम मेरमेह्रिक कार्यक्रमम अनौपचारिक रुपम गीत गैना कर्लसेफे क्याम्पस पहर्ना ब्यालासे भर औपचारिक रुपम गीत गाइ सुरु कर्नु । २०५६ सालम जिल्ला स्तरिय खुला लोक तथा दोहरी प्रतियोगिता कार्यक्रमम भागलिह पैना मौका मिलल रह । उह कार्यक्रमम मै ड्वासर (दोस्रो) स्थानम अइना मौकाफे पैनु । तबसे डटखन गीत संगित क्षेत्रम लग्न ओ थप हौसला मिलल कह परल । आम्हिनफे यी क्षेत्रम निरन्तर लग्टी आइल बाटु ।
यी क्षेत्रम लग्ना खास उद्देश्य का हो ?
पक्क फे हरेक मनैया कौन न कोनो उद्देश्य ओ लक्ष्य लेकन आघ बह्रट । ओस्टक मैफे यी क्षेत्रम लग्ना कुछ उद्देश्य बा । पहिला त हम्र थारु जाति गीत संगित ओ संस्कृतिम धनि समुदाय हुइटि । ओत्रा हुइटि हुइटिफे हमार थारुन्ह्क लिखित ओ अडियो भिडियोम कहि या रेकर्डिङम गीत संगित कम बा । बहुटसे बहुट थारुगीत गाखन अडियो, भिडियोमार्फत आम थारु, गैर थारुहुकन्हक माझम पुगैना, गीतक मार्फत थारुभाषा, कला, संस्कृतिके संरक्षण ओ प्रवद्धन कर्ना म्वार मुख्य उद्देश्य हो । ओस्टक थारुन्हक पहिचानह बचाइलाग गायकके रुपम स्थापित हुइना फे हो ।
आम्हिनसम अप्न कैठो गीति एल्वम कविला हुकन्हक माझम आन रख्ली ?
आबसम कना हो कलसे म्वार थारु, नेपाली कैख तीनठो गीति एल्बम बजारम आइल बा । मै थारु ओ नेपाली भाषाके करिब दुई दर्जनसे ध्यार गीतम स्वर डेसेक्ल बाटु ।
अत्रा ध्यार गीतम स्वर डेसेक्ल बाटी । अप्नक सब्से चर्चाम कौन गीत बा ?
पक्कफे गीतम स्वर डेखकेल निहुट । आम कविला (श्रोता) हुकन्हक मन जीट निसेक्ना खालके गीत बनाइ ओ स्वर डिह निसेक्ना हो कलसे ओसिन गीत गैइलक कौनो अर्थ नै रहट । उहमार बेन डान्चे ओ मजा मेनहत कैख गैलसे सक्कु कबिलाहुक्र मन परैठ । महिन जहाँसम लागठ आम्हिनसम म्वार सक्कु थारु ओ नेपाली भाषक गीत चर्चाम जो बा । उहफे अप्न कहसक कना हो कलसे सबसे बहुट चर्चाम म्वार गाइल दुइठो गीत बा । एक्ठो नेपाली ओ एक्ठो थारुगीत आम्हिनसम चर्चाम बा । पहिला गीत ‘सालीहो बर्काे छाँयाले……..’ ड्वासर गीत ‘चौतारी सीतलु पिपल छायाँले………………’ ।अप्नक ध्यारजसो गीत थारु भाषम बा । थारु गीत गाकन व्यावसायीक गायक बन सेक्जाई ? गजब प्रश्न कर्ली । पक्कफे थारु गीत गइना जत्रा सजिलो बा ओत्रह बाँचकलगा फे कर्रा बा । जहासम अप्नक कहसक थारु भाषक गीत गाकन व्यावसायीक गायक बन्ना कर्रा त बा । उहफे थारु भाषक शब्दह अलिक रिमिक्स बनाइ सेक्ना हो कलसे थारु भाषक गीतफे व्यावसायीक बन सेक्ठा । जस्टकी म्वार गाइल गीत ‘सालीहो बर्काे छाँयाले….’ ह उदाहरण डेना हो कलसे आम्हिनसम चर्चाम जो बा । अस्ट खालक गीत गाइसेक्ले व्यावसायीक गायक बनसेक्ना सम्भावना बा । ओस्टक ठेट थारु शब्दक गीतह डकुमेन्ट्रीम उटार सेक्लसे बहुट सम्भावना बा । थारु गीतसंगितन टिकाइलाग थारु फिलिम, थारु डकुमेन्ट्री उत्पादन कैख राष्ट्रिय अन्तराष्ट्रिय स्तरम आनसेक्नाहो कलसे बहुट अवसर बा ।
गीत संगित संगसंग और पेशा व्यावसायमे फे लागल बाटी ?
हो । मै गीत संगित संगसंग कुछ छोटिछोटि व्यापारिक व्यावसाय कर्टि आइल बाटु । ओस्टक व्यवसायीक पेशा संगसंग डान डान राजनीतिक क्षेत्रम आघ बह्रल अवस्था हो ।
केन्द्रीयस्तरक कलाकार हुक्रनहे राजनीतिम आइल देखके त नि हो ?
एकदम, पाछक समयम बहुट कलाकारहुक्र राजनीतिक क्षेत्रम छिरस्याकल अवस्था बा । उहफे म्वार फरक बिचार बा । मै सामाजिक क्षेत्रम करिब १७ वर्षसे संस्थागत कामम लग्लक ओ गीत संगितम लग्लक होस्याकल बा । जुन समाजम सामाजिक परिवर्तन कर्ना बात बा । आपनकेल सक्षम होख नै हुइल समाज परिवर्तन करकलाग राजनीतिक एजेण्डा चहट । उहमार चिल्गारी उर्लसे सहि धावमार्ग चहट, उहचिज डिहक लाग राजनैतिक क्षेत्रम फेन हात डर्लक हो । हलिउड, बलिउडम फेन बरा बरा कलाकर्मी, विजनेसकर्मीहुक्र राजनीतिम आइल बाट ।
अन्तम कुछु बा की ?
सबसे पहिला त आम कविला (पाठक) हुकन्हकवीचम म्वार कुछ बात ढर्ना मौका डेलकम अप्नह बहुत धन्यवाद बा । आम्हिनसम म्वार गीतह मन पराख मैया कर्टि रलक सक्कु म्वार मैगर कविला हुकन मुरिमुरिक धन्यवाद डिहटु । महिन आम्हिन मैया कर्टि जैबीकना आशा कर्टि झटह अप्नहुकन्हक वीचम लौव गीत लेक अइना बाचा करटु ।
प्रस्तुतिः सन्तोष दहित
