म्वार जीन्गिक् पहिला पुरस्कार उहफे महिन कसहों नी लागल । काजे की मै यहिसे आघ कभुफे पुरस्कार नि पैल रन्हु । ओ पुरस्कारके महत्वफे थाहाँ निरह । पुरस्कारक लाग छनौट हुईलक दिन त पहिल सपना जसिन लागल । जव म्वार शुभ चिन्तक संघरेन फेसबुकम म्वार फोटु पोष्ट कैक धमाधम बधाई डिहलग्ल, तब महि महसुस हुईलागल पुरस्कारक महत्व । महि थाहाँ रह स्कूलम फस्ट अईलसे, खेलकुदम अग्वा अईलसे ओ मजा काम कर्लसे पुरस्कार पैठ कना । तर पत्रकारिताम मैफे मजा करम ओे पुरस्कार पैम कैक कभु फे निसोंच्ल रन्हुँ ।
महि पुरस्कार पैम कैक कुछुफे आशा निरह । काजेकी मै सुनलरन्हु पुरस्कार पाईकलाग मापदण्ड भित्तर पर्लसेफे स्वर्स फोर्स लगाई पर्ठा हुँ, कैक । तर म्वारलाग भनसुन कैडेना खास किउफे निरलह ।
हुईना त धेउर पत्रकार संघरेन पुरस्कृत हुईलकफे थाहाँ रह तर कसिक पुरस्कृत हुईठ कना थाहाँ निरह । नेपाल आदिवासी जनजाति पत्रकार महासंघ (फोनिज) आपन बार्षिक उत्सवक अवसरमा देश भरसे चार विधाम चार जहन पुरस्कृत कर्ना कैक सक्कु जिल्लाले चार चार जन्हक नाउँ सिफारीस कैक पठैना कैक मेल पठाईल ओर्से बाँके जिल्लासे रेडियो विधाम म्वार नाउँफे सिफारिसम पर्ल । केन्द्र ट्वाकल अनसार मापदण्ड भित्तर म्वार काम करल अनुभव सक्कु पुगल रह । तर महि पुरस्कार पैम कैक कुछुफे आशा निरह । काजेकी मै सुनलरन्हु पुरस्कार पाईकलाग मापदण्ड भित्तर पर्लसेफे स्वर्स फोर्स लगाई पर्ठा हुँ, कैक । तर म्वारलाग भनसुन कैडेना खास किउफे निरलह । २०६२ सालसे म्वार रेडियोक यात्रा सुरु हुईल सेफे मै एक्ठो जिल्ला भित्तरकेल सीमित मनै । महि जिल्लामफे सक्कु संघ संस्थाक ओ सक्कु पत्रकार हुँक्रफे आम्ही मजासे निचिहिन्ट । काजेकी मै बाहेर समाचार रिपोर्टिङम एकदम कम जैना कर्ठु । जत्रा मेहनत कर्ठु भित्तर बैठ्क कर्ठु ।
फोनिज जव महि राष्ट्रिय पुरस्कारक लाग छनौट करल तव महि महसुस हुईल अन्धारम बर्ना डिया बरा दुससेफे जुग्जुगाईट देखपर्ठा काहुँ । पुरस्कार पैना ब्याला सबसे पहिल महिहन जरम देना स्वाझ दाई बाबाहन सम्झनु । अम्ही सम म्वा दाई बाबाहन छाई पत्रकार हो कैक फे थाहाँ नि हुईटन् । तर छाई रेडियोम बोल्ठ्या कैक गर्व कर्ठ । छावा त घरम रना जात जत्रा जग्गा बा उह जोँट्क खैहीं । छाई आनक घर जैना जात दुःख हुईठन कैक बाबा महिह डान्छे हुईलसेफे पह्रैना कोशिस कर्ल । उहमार मै यिहा सम पुग्नु कैक महा गहिँरक सम्झनु । सक्कु दादु भैया गरिविक कारण पह्र नि पाकन आम्हीसम कृषि पेशा कर्ठ । सायद म्वार दादु भैयाफे डान्चे पह्र पैट कलसे कुछु ब्यावसाय कर्ने रल्ह कैकफे सम्झनु । महिहन यिहाँ सम पुगैना आपन अग्रज हुँकन धेर सम्झना कर्नु ।
पुरस्कृत हुईलकम खुसी हुईनासे फे महि बरा गम्भीर बनाईल । रेडियो पत्रकारिताक सुरुवात ठेसे हाल सम्मक याद दिला डिहल ओ यी पुरस्कारले महि आपन समाजप्रति थप जिम्मेवार बना डिहल ।
२०६२ सालम दाङ तुलसीपुर एफ एम, एक महिन्या रेडियो उद्घोषक, समाचार तथा कार्यक्रम उत्पादन तालिम सञ्चालन कर भिरल । तालिम शुल्क पाँच हजार २०० रह । म्वारलाग ऊ रुप्या जुटैना लाख बराबर रह । मन मिल्ना म्वार गोही केउलापति चौधरी ब्याज म रुप्या खोज्देली त तालिम लिह पैनु । तालिम म १११ जन सहभागी रलही । जौन मध्ये थारु समुदायक १३ जन रलही । तालिम म मजा करल डेक्ख तालिम डिहुईया कल्याण गौतम (डियर कल्याण) महिहन पहिलहे छनौट कर्लकम उहाँ हनफे धेर सम्झनु । दुई बर्षसम तुलसीपुर एफएम म काम करबेर महि सड्ड मजा मन्ना अर्जुन गिरी, सुशिल बस्नेतलगायत ओ संघरेनफे सम्झनु । क्वारम लर्का बोक्क सड्ड एफएम गैलक ओ कुर्सीक पन्ज्र लर्का सुटाक समाचार लिख्लकफे बरा याद आईल । असहेंक नेपालगञ्जम बागेश्वरी एफएम म काम करबेर कैयौं चूनौति पार कर्लक बात याद आईल । सञ्चार माध्यमम जहाँफे पारिश्रसमक डान्छे ओ उहफे समयम नि पैना समस्याले विवाहित पत्रकार महिला हुँकन काम कर्ना कत्रा गाह्रो बा कना त बात छोर्डी । अट्रा डान्चे पारिश्रमिकम बाहेर काम करलसे घरहें बैठस । काल्हठेसे एफ एम जैब्या कलसे ग्वारा टुर डिहम्, किट एफएम जैब्या कलसे उहँरे पलिरहस लगायतक गोस्यक धम्की ओ दवाव सहख आपन पेशाहन निरन्तरता डेलक बात फेन याद आईल । ऊ ब्याला म्वार गोस्याहन सम्झा डिहुईया अग्रज पत्रकार दिदि अछरी पोख्रेल ओ मिल्ना संघर्या रुपनी जिएमहन फे सम्झनु । महिहन सड्ड हौसला देना अग्रज दाजु लक्की चौधरी, कृष्णराज सर्वहारी, संघर्या सुमित्रा चौधरीहनफे सम्झनु ।
हाल रेडियो सद्भाव म काम करबेर पारिश्रमिक चित्त बुझ्ना मेह्रीक पाईबेरसे आपन गोस्यक ब्यवहार परिवर्तन हुईलक ओ पहिलसे झन् धेर मैया पैलकबाट फे म्वार मनम ख्याल लागल । पुरस्कृत हुईलकम खुसी हुईनासे फे महि बरा गम्भीर बनाईल । रेडियो पत्रकारिताक सुरुवात ठेसे हाल सम्मक याद दिला डिहल ओ यी पुरस्कारले महि आपन समाजप्रति थप जिम्मेवार बना डिहल । यहिसे आघ बाधा अवरोध आईबेर कबुकाल पत्रकारिता छोर्डिउँ की जसिन लाग तर आव म्वार मन करु कि छोरु कना अस कब्बुफे नि लागी । मनैन् हरेक कामम जिम्मेवार बनाईकलाग पुरस्कारक फे अट्रा महत्व रठा कना महि महसुस हुईल । उहओर्से पत्रकार ओ पत्रकार महिलाहुँकन् पत्रकारिता पेशाम ब्यावसायीक पत्रकारक रुपम सड्डभैल टिकाईकलाग पत्रकार हुँकन्हक हरेक संगठनहुक्र छुटी छुटी हुईलसेफे ब्याल ब्यालम पुरस्कृत ओ सम्मान कर्ना वातावरण मिलाडेलसे प्रभावकारी हुईने रह ।
