काठमाण्डौ, भदौ १८ गते । प्रधानमन्त्री केपी शर्मा ओलीले विमस्टेक राष्ट्रहरुको चौथो शिखर सम्मेलन आयोजना र निर्णय दुवैका दृष्टिले फलदायी भएको बताउनु भएको छ । सिंहदरबारमा सोमबार आयोजित विमस्टेक शिखर सम्मेलन तयारी तथा व्यवस्थापन मूल समितिको अन्तिम बैठकलाई सम्बोधन गर्दै प्रधानमन्त्री ओलीले त्यस्तो बताउनुभयो ।
“नेपालमा उत्पादित विधुत अन्य देशहरुलाई विक्री गर्न हामीलाई विधुतीय ग्रीड चाहिएको थियो, त्यस विषयमा काम गर्न जल उर्जाको क्षेत्रमा सहयोगको आदान प्रदान गर्ने निर्णय गरेका छौं । ” भारत र वंगलादेशसँग विशेषरुपमा केन्द्रीत भएर कुराकानी भएको बताउँदै प्रधानमन्त्री ओलीले भन्नुभयो, “जसबाट हामी भारत, वंगलादेश र म्यानमार मात्र होइन सूदुर भविष्यमा थाइल्याण्डसम्म विजुली निर्यात गर्न सक्छौं ।”
नेपाल र नेपालीको हितलाई सर्वोपरी ठानेर विमस्टेकमा छलफल गरी घोषणा पत्र जारी गरिएको बताउँदै प्रधानमन्त्रीले भन्नुभयो “विमस्टेक होस वा अन्य क्षेत्रीय वा अन्तराष्ट्रिय मञ्च होस हामी न्यायोचित राष्ट्रिय हितलाई केन्द्र भागमा राखेर काम गर्छौं । ”
प्रधानमन्त्री ओलीले विमस्टेक सम्मेलनको सफलताका लागि अहोरात्र मेहनत गर्ने परराष्ट्र मन्त्रालय, गृह र सुरक्षा मन्त्रालय अन्तर्गतका सुरक्षा निकाय, मिडिया र सकारका सबै निकायलाई सो अवसरमा धन्यवाद ज्ञापन गर्नुभयो ।
काठमाडौंबासीले सवारी आवागमन सहेर पनि शिखर सम्मेलन सफल पार्न योगदान गरेकोमा धन्यवाद ज्ञापन गर्दै प्रधानमन्त्री ओलीले भन्नुभयो, “आमसञ्चार माध्यम, वौध्दिक जगत र आमरुपमा सबैप्रति धेरै धेरै धन्यवाद व्यक्त गर्दछु ।”