लहान, माघ ३ गते । थारु कल्याणकारिणीसभा सप्तरीले प्रदेश नं २ का मुख्यमन्त्री लालबाबु राउतलाई विभिन्न मागसहितको ज्ञापनपत्र बुझाएको छ । ज्ञापनपत्रमा प्रदेश २ मा थारुको जनसंख्याको आधारमा राज्यको संयन्त्रमा सुनिश्चित गर्न माग राखिएको छ ।
प्रदेशको हरेक निकायमा थारु जातिको जातीय जनसङ्ख्याको आधारमा प्रतिनिधित्वको सुनिश्चितता, लोकसेवा आयोगमा जातीय जनसङ्ख्याको आधारमा कोटा निर्धारण, थारु सङ्ग्रहालय स्थापना, थारु बाहुल्यता क्षेत्रका जिल्लामा थारु भाषाको पाठ्यपुस्तक कम्तीमा आधारभूत विद्यालयसम्म लागु गर्नुपर्ने माग थाकसले गरेको छ ।
त्यस्तै, प्रदेश नं २ मा थारु होमस्टेको विकास, जाँड, रक्सी जुवातास दुव्र्यसनी नियन्त्रणका लागि ठोस् नीति कार्यक्रम सञ्चालन गर्नुपर्ने माग पनि ज्ञापनपत्रमा अघि सारिएको छ ।
उच्च शिक्षामा अध्ययरत थारु विद्यार्थीलाई छुट्टै छात्रवृतिको व्यवस्था, थारु महिलामा भएको मौलिक सीप कलालाई उत्थान गरी त्यसको आधारमा स्वरोजगार सिर्जना, स्नातक उत्तीर्ण शिक्षित बेरोजगार युवालाई समेटी प्राविधिक ज्ञान तालीमसँगै स्वारोजगार कार्यक्रम सञ्चालन गर्नुपर्नेलगायतका माग ज्ञापनपत्रमा उल्लेख छ ।
सुरुङ्गा नगरपालिका– ५ कुशाहामा सञ्चालन भएको दुई दिने माघी महोत्सव उद्घाटनमा आउनुभएका मुख्यमन्त्री राउतलाई सभाका सप्तरी अध्यक्ष शिवनारायण चौधरी (शिब) ले ज्ञापनपत्र बुझाउनुभएको थियो ।
मुख्यमन्त्री राउतले ज्ञापनपत्रमार्फत अघि सारिएका कतिपय कुरा प्रदेश सरकारले यसअघि नै सञ्चालन गरिसकिएको र क्रमशः अरु माग पूरा गर्दै जाने आश्वासन दिनुभएको अध्यक्ष चौधरीले बताउनुभयो ।
