हमार पहुरा डट कम
काठमाडौं, असोज ११ गते । थारु भासक साहित्य प्रवद्र्धनके लाग उँक्वार भर्चुअल थारु साहित्य वाचन कार्यक्रम कुवाँर १० गतेसे शुरु कैगिल् बा । कोरोना संक्रमणक ब्यालमफे थारुभासि साहित्यकारन थारु साहित्यिक सिर्जनाम सक्रिय बनाइक लाग भर्चुअल अभियान चलैलक आयोजक बतैले बा ।
पैल्हार पैढारक कार्यक्रमम ४ जाने कविहुँक्र आपन कविता वाचन कर्ल रहैं । कविता वाचन करुइयनम बर्दियक कवियत्री लेखिका बालिका चौधरी, कबि श्याम चौधरी, कवि गणेश वर्तमान ओ कैलालीक कवियत्री दीव्या प्रयासी आपन रचना वाचन कर्ल रहैं ।
उक्वाँर थारु साहित्य बाचन कार्यक्रम जंग्रार साहित्यिक बखेरी, नेपालके आयोजना, थारु भाषा तथा साहित्य संरक्षण मञ्च, दाङ्गक संयोजन, अमर शहिद बहुमुखी क्याम्पस, बर्दियक प्रायोजनम, थारु लेखक संघ, नेपाल, लावा डग्गर त्रैमासिक, थारु पत्रकार संघ नेपाल, थारु गोचाली समाज, नेपालक सहकार्य ओ हमार पहुरा डट कम, लौव अग्रासन साप्ताहिक, पहुरा दैनिक, दंगीशरण खबर.कम, थारुवान.कम, केरनीन्यूज.कम, निमाङ थारु मिडिया, कैलारी पोष्ट साप्ताहिकक मिडिया सहकार्यम कर्जैटि बा ।
आयोजक जंग्रार साहित्यिक बखेरीक पदाधिकारी हुक्रनके अन्सार यी कार्यक्रम लग्ढार हरेक महिनक डोस्रा ओ चौठा सनिच्चर कर्जैना बतागिल बा । कार्यक्रमक सहजीकरण लावा डग्गर त्रैमासिकक प्रधान सम्पादक छविलाल कोपिला कर्ल रहैं ।
कार्यक्रमम शान्ति समाज नेपालसे सम्मानित पुरस्कृत लेखिका बालिका चौधरीजीक जीवनका बक्र रेखाहरु किताबक बारेम समीक्षाफे कैगिल् रह । लेखिका बालिकाजीहँ यिह किताब लिख्लकम सम्मानित पुरस्कृत हुइलक हुइटी । सम्मानले फेरसे किताब लिख्ना हौसला मिल्लक लेखिका बट्वैली ।
