रचनागर्भ
असौक काटिक्या डस्या रस–रस लस्क्यागिल बा । कोरोना महामारीक मार सारा विश्व डरभुटल ब्यालम डस्या कसिक मन्ना हो ? अनमन बा । गुरिया, अस्टिम्की, अट्वारी, अनट्टर जसटस मन्लसेफे रमाए निपागिल । दूरी कायम कैक रहपर्ना बाध्यताले टीकाफे कसिक लगैना हो ? स्पष्ट निहो । चीनके बुहान कोरोना भाइरस डेखपरल पाछ, आपन लौव बरसफे निमनैल, चिनीया जनताहुक्र । अस्टहक, खुल्ला जुटेहला हुइना गतिविधि निकर्ना सरकारी उर्दी जो बा । गाउँम क्वारेन्टाइन व्यवस्थापन कर्टि अइलक, कोरोना विरुद्ध लिखक, बोल्क सचेतना फैलैटि रलक मनै, महीफे संक्रमण डेख परल । चौध दिन सरकारी आइसोलेशन ओ सात दिन होम आइलोसेशनम बैठक भक्खर सार्वजनिक जीवनम लौटल बाटुँ ।
घोरवा हन विवेक ओ शक्तिक प्रतीक मानगिल बा । क्रिश्चियन धर्मम उज्जर घोरवा हन मृत्युक विम्बक रुप मान जाइठ । हाथी घोरा महाभारत युद्ध (बर्किमार) म बेल्सलक बातफे इतिहास बा ।
घरक आइलसोलेशन डिउह्रार कोन्टी बनैनुँ । डिउह्रार कोन्टीक पाटम सुटहिपर्ना चलन बा हमार । मनै सुट निसेक्लसे कम्रा विछाक टोपी ढर परठ । लस्क्याइल डस्यम पित्रहन घरक आँजर पाँजर, आइल रहठुइही जसिन लागठ । सड्ड डेमनडौरा चिम्लहवा घोरवासे उक्वारभ्याँट हुइब्याला कोहोरसे मन हुर्चुलाइल । थारु डिउँटा घोरवक मिथकीय आस्थाके विषयम शब्दमाली डाउँ कैक यी लेख जर्मना रचनागर्भ बनल ।
आस्था ओ विश्वास मनैनके असिन प्रतिविम्ब हो सक्कु आस्था ओ विश्वासके बैज्ञानिक प्रमाण टिक्याय निसेक्जाठ । यहीहन चिन्तक हुक्र आध्यात्मिक सोचके रुपम व्याख्या कर्ठ । मुले मै अलौकिक संसार ओ शक्तिम विश्वास निकर्ना हुइलक मार मै आस्था ओ विश्वास हन आत्मिक बुझाइ मन्ठुँ । भौतिकवादी चिन्तन अन्सार पदार्थके अन्तरक्रिया ओ द्वन्द्वसे चेतना जरम लिहठ कना तथ्य मही सत्य लागठ । आध्यात्मिक चिन्तन निमजा हो कैक त मै निकठुँ । केक्रो आध्यातिमक विश्वासउपर मोर सम्मान रहठ काकरकी कौनोफे आस्था ओ विश्वास जर्मकलाग आवश्यक परिवेस ओ सूचना जरुरत परठ । सवाल अत्रकेल हो की सूचना तथ्यगत ओ तार्किक बा कि नाही ? जस्ट की कौनो एकठो मनैया गाउँम आइल, रातक, उहीहन सबजन चोरी कर आइल कैक पिट लग्ल । हल्ला फैलल, गाउँम एकठो चार्वा आइल बा । हुइस्याकठ ऊ सज्जन फे, गलत सूचना ओ जानकारीक आधारम आपन धारणा बनैलसे बनना आस्था ओ विश्वास अन्धविस्वासम परिणत हुइठ । संसार ब्रम्हाण्ड भवसागर हो । बोधगम्य निहो कना मान्यतम मही विश्वास निलागठ । यदि मनै नियमित ओ वैज्ञानिक खोज कर्लसे प्राकृतिक हर रहस्यके पटाक्षप कर सम्भव बा । पाँच हजार बर्षसक मानव समुदायके सक्रिय जीवनम शदियौंसे जवरजस्त संस्कृतिक रुपम मानजैटी रलक अन्धविश्वासक पर्दाफास मनैनके अध्ययन ओ अनुसन्धान कर सफल हुइल बा । इटलीक बैज्ञानिक ओ विज्ञानके पिता ग्यालिलिओ ग्यालिलिहन पोप बाइबलक मान्यता विरुद्ध पृथ्वी दिनहन परिक्रमा करठ न कि सूर्य पृथ्वीहन कहबेर मृत्युवरण कर पर्लिन । सत्य त सत्य रह, वाकर पर्दाफास त हुइल समयक्रम म । यी पन्छर लेखम थारु लोक मान्यता ओ मिथकक रुपम गहिर आस्थाक रुपम रलक घोरवा पूजन बारेम छिनफटक कर्ना जाँगर कैगिल बा ।
विश्वव्यापी मिथक
घोरवाके विश्वव्यापी मिथक रहल बा । चानचुन चार हजार बरस पहिल घोरीन् मनै संढलक इतिहास बा । ओठेसे घोरी घरपालुवा जनावर हुइल । हाठी घोरा अघट्यक सवारीके साधन रलह । हिन्दु मान्यता अन्सार, समुद्र मन्थन करबेर लम्मा कान हुइलक साटठो मुन्टारलक डैना जामल बाइपंखी घोरवक परिकल्पना कैगिल बा । विष्णु भगवानके रुप मानक घोरवा पुज्ना चलनफे रहल पाजाइठ । घोरवा हन विवेक ओ शक्तिक प्रतीक मानगिल बा । क्रिश्चियन धर्मम उज्जर घोरवा हन मृत्युक विम्बक रुप मान जाइठ । हाथी घोरा महाभारत युद्ध (बर्किमार) म बेल्सलक बातफे इतिहास बा । महाभारतम अश्वमेघ घोरवाके प्रसङ्ग महा चुम्मरसे आइल बा । सामन्तवादी युगम घोरवक सवारी बीना राजा महाराजा हुक्र बिहार कर वा लराइम जाइ निस्याकँट । ग्रिक सभ्यतम घोरवक मिथक झिकडेलसे साहित्य अधुरा होजाइ । जिन्गीम जेट ओ बोइंग जहाज, झट्कार रेल सेवा आस्याकट । घरिमफे घोर सवारी कला ओ अभ्यास हुइटी रलक पाजिठा । शक्ति ओ गति मापन करक लाग घोरिन्के शक्तिक बरावर एसिया ओ युरोप महादेशके कुछ कुछ गोरपासु कर्ना अबसर मिलल । बर्लिन, अमस्ट्राडम, पेरिस, फ्लेन्सवर्ग, कोपनहेगन, ओश्लो गोथेनवर्ग जसिन अन्तर्राष्ट्रिय शहर घुम्ना नौवत मिलल । मध्यपूर्वक देश जोर्डनक ऐतिहासिक शहर पेत्रा ओ जरास घुमबेरफे घोरीन्के मूर्ति ओ कहानी भेटैनु । सिकन्डर आपन साम्राज्य विस्तार कर्ती आइबेरफे घोरवम चिहुरक आइल रलह । नेपालम त घोडेजात्रा उत्सव मनाजाइठ । जहाँफे गैनु, बरेबरे घोर्वाम बैठल बादशाहके तरवार भिरल, क्रुर अन्हवार । असिन लागल मही रज्वा वा घोरवा संगसंग अइना चिज हो । उहमार लोकतन्त्र ओ गणतन्त्रवादी हुक्र बादशाह हन कलर पकरक घोरवासे उतर्ना कैक भासन कर्ठ । दुई सय पचास वर्ष पुरान नेपालके राजतन्त्र रलक देश, एक सय चार बरस चलल राणा शासनमफे घोरवक बट्कोही स्मरणयोग्य बा । राणा प्राधानमन्त्री जंगबहादुर राणा बेलायत घुम्क आइल पाछ, काठमण्डुम घोरवाम चिहुरल राणा शासकन्के मूर्ति शहरके कोन्वा कोन्वम ठरिह्या गैल रलह । ओसिन त शक्ति ओ उर्जाहन हर्सपावरम मापन कर्ना विश्वव्यापी चलन बा ।
सिकन्डर आपन साम्राज्य विस्तार कर्ती आइबेरफे घोरवम चिहुरक आइल रलह । नेपालम त घोडेजात्रा उत्सव मनाजाइठ ।
थारू मिथक
थारू जातम घोरवा डिउटा ढर्ना चलन रहल बा । हरेक घरक पाटा ओ मर्वाम घोरवा रहना अनिवार्य बा । घोरवाके संख्यमफे फरक फरक चलन बा । घोरवाफे जगनठिया, डेमनडौरा, मडुवा, भेंर्वा छन्डिक छन्डिक रठ । डिउँटा बनाइल घरम घोरवा हुइही पर्ना चलन ओ मान्यता कसिक स्थापित हुइल त कना एकठो बलगर मिथक बा । बट्केही असिक आघ बह्रठ–
द्वापार जुगक ब्यालमम दाङ्गक सुकौराम एकठो दंंिगशरण नाउक रज्वा रलह हुँ । राज्वा एकदिन शिकार ख्याल फौजफक्कर लेक बृजाबनम गैल । जाइट जाइट, शिकारी फौजहुक्र लडियक एक बाहीँ पकरक आघ बहर्ल, रज्वा और बाहीँम लग्ल । दिन बुरबुर व्यालाम हरियर फँट्वम एकठो ल्वाभ लग्टिक सुन्दर घोरिन्या चर्कोक चर्कोक हरियर चुर्की घाँस चहर्टी डेख्ल रज्वा । चालमर्टी लग्ग पुगबेर दिन बुरगैलक मार सुग्घर घोरिन्या महासुग्घर बठिन्या रुपम डेखपर्ली । दंगिशरण रज्वा अचम्ह पर्क बठिन्या हन बोल्कर्ल ओ मोहन्या गैल । घोरिन्यक रामकहनी कसिन रह कलसे, इन्द्रलोकम पहुनन् बेतालके नाच डेखैलकमार रिखीहुक्र सराप देलकमार घोरिन्यक रुप लेक पृथ्वी लोकम उर्वशी अप्सरा आइल रल्ही । ऊ उर्वशी सरापकमार दिनभर घोरिन्या ओ रातक सुन्दरीक रुप ढर्ना रलक । शक्तिशाली रज्वन्बीच घमासन लराइ हुइलसे सराप मुक्त होक फे डोस्र स्वर्गलोक जाइपैना अवस्था रहिन् उर्वशीक ।
रज्वा उर्वशीहन लेक दरवारम अइठ । मजाक रानी बनाक ढर्ठ । उह सुन्दर घोरिन्यक पठ दंगिशरण ओ मथुराके कृष्णबीच घमासान बर्किमार हुइलन तब्ब उर्वशी सराप मुक्त होक स्वर्ग फिर्ता गैगिली । ज्याकर लाग लराई झग्रा बा उह मनैया निरलसे काकर लर्ना कैक, लराई अस्टह फासफुस होजैठा ।
मुले, रज्वा दंगिशरण आपन परानसे फे प्यारी सुन्दरीक वियोगम पागल जसिन होजैठ । देशबन्ढ्या गुर्वन आछटपाटी हेर्क लागुभागु ह्यारबेर थारुन्के पाटा ठानम घोरवा ठान खोज्लक निष्कर्ष निकर्ठ । ओठ्यस् सक्कु थारु परिवान् आपन आपन पाटाम घोरुवा हन ठान डेठ । उहमार आजसम्फे थारुन्के घरम माटिक घोरवा ढर्ना ओ पुज्ना चलन बा । घोरवा, घोरिन्या कलक सुन्दरताके प्रतीक, मैयाके प्रतीकके रुपम रहल पाजाइठ । पाटम मयरी माडागिन मैयाँ ओ प्रेमके प्रतीकक रुपम घोरवा हन पुज्ठी । यमसे का स्पष्ट हुइठ कि थारु समाज प्रेमके पुजारी हुइट । थारुहुक्र सौन्दर्यानुरागी हुइट । जुगजुगसे सुन्दर चीज हन पाटम ठान डेक उपसना कर्टि आइल बाट । यहीमसे बुझ सेक्जाइठ थारु लोकदर्शन ओ चिन्तन । सौन्दर्य पूजनके सौन्दर्यचेत जो थारु संस्कृतिक गहिराई निच्छाछुर बा । थारु समाज आजसम एकसम सुदायके रुपम एकबद्ध रह सेक्नाम याकर बरवार हाँठ बा कलसे फरक निपरी । दाङ्गम पहिल पहिल घोरी लड्ना करट । थारुन्के घोरी चह्रैना डबरा घोराही आज उपमहानगपालिका शहर बनल बा । नगरपालिका गुम्रा चोकम घोरवन्के मुर्ति बनाक घोराही बजारके शोभा बह्रैल बा । कैलालीम घोडाघोडी टल्वा बा । वाकर नाउँसे घोडाघोडी नगरपालिका नाउ रहल बा । थारु लोक नाटक कठघोरी नाच प्रचलनम रहल बा । घोरी मृदंगक तालम ताल मिलाक नच्ठ । यमसे का कह सेक्जाइठ कि, थारु समुसंस्कृति ओ साहित्यम घोरवन, घोरिन्यन् मानवीयकरण कैगिल बा । थारु मन्तरम उरन्टा घोरीक प्रसंगफे महाफट्कारसे आइठ । थारू लोककथा हिट्वम चेतक घोरवक प्रसंग आइठ ।
थारुहुक्र सौन्दर्यानुरागी हुइट । जुगजुगसे सुन्दर चीज हन पाटम ठान डेक उपसना कर्टि आइल बाट ।
गोंरि मारबेर
पाँच हजार बरसके मानव सभ्यताके विकास क्रममन मनै ओ घोरी संगसंग बच्ल बाट । मनै ओ घोरीनके किस्सा ओ कहानी बरोबर हुइ सायद । दास युग, सामन्ती युग हुइटी पूजिवादी युगसम आपन दवदवा कायम कर सफल घोरवा साम्राज्य कम अचम्हक नैहो । थारु समाजम कुल डिउँटा बन्क पाँच बरससे रहलक बाट उप्पकर मिथक पह्रव्याला फे पटा मिलठ । थारु जाति हुक्र घोरवा हन शक्ति, सुन्दरता ओ मैगर मैयाके प्रतीकक रुपम पुजा कर्ठ । उहमार यी मिथक कालजयी बा । शक्ति, सुन्दरता ओ अमरप्र्रेम मनै रहट सम कबु निहेरैना सास्वत मान्यता हो । जैविक विविधताके दृष्टिले फे जनावरन सम्मान डेना मजा बाट हो । कैठो चिंगनी मुर्घा पुज्ना हो आपन क्षमता ओ मन अन्सार कर सेक्ठी । भुजा बटासा, लवाङ्ग सुपारी, ज्या चिजम मागन पुरा कर सेक्जाइठ । पिह्री विट्लसे अनावश्यक पूजा मारपैना त थारु चलन जो बा । मै भौतिकवादी चिन्तन रख्ना मनै हुइलसेफे, लोक परम्परा ओ संस्कार संस्कृतिक समाजम लम्मा अभ्यास होक आपन स्वरुप लिहल रहठ । कुछ ना कुछ तथ्य ओ वातावरणीय परिवेश भित्तर रहस्य नुकल रहठ । उहमार वाकर यथार्थ पत्ता लगइना आवश्यक रहठ । उहमार मै थारु लोकसाहित्य, दर्शन कला, ओ संस्कृति जसिन पुर्खाओन्क विरासत ओ सम्पदा संरक्षण ओ आलोचनात्मक दृष्टिले विश्लेषण कर्टि विकास कर्ना अभियनम गोरपासु ओ हरचाली कर्टि बाटुँ । जय गुर्वावा ! जय चिम्लहवा घोरवा!!
(२०७७ कुवाँर ३०, शुक, एकान्तबास, मजोरबस्टी, बर्दिया)
