सरकार र थरुहट पक्षबीच पहिलो चरणको बार्ता सकारात्मक अर्को वार्ता विहिबार हुने


हमार पहुरा डट कम
काठमाडौं, चैत १७ गते । सरकार र थरुहट थारुवान संयुक्त संघर्ष समितिका पदाधिकारीबीच मंगलबार भएको वार्ता सम्पन्न भएको छ । आजको वार्ता सकारात्मक रहेको र अर्को वार्ता बिहीवार पुनः बस्ने छलफल भएको थारु कल्याणकारिणी सभा (थाकस) का महामन्त्री तथा वार्ता समितिका सदस्य प्रेमीलाल चौधरीले जानकारी दिनुभयो ।

महामन्त्री चौधरीकाअनुसार यसअघि संघर्ष समितिले अघि सारेको १९ बुँदे मागमा केन्द्रित भएर सरकारी वार्ता टोलीसँग छलफल भएको छ । सरकारका वार्ताटोली सदस्यहरुले थाकसले अघि सारेको मागबारे आज र भोलि अध्ययन गर्ने समय माग गरेपिछ पर्सी पुनः वार्तामा बस्ने छलफल भएको उहाँले जानकारी दिनुभयो ।

गृह मन्त्रालयमा आज दिउँसो करिब दुई घण्टा भएको वार्तामा सामान्य परिचयसहित मुद्दाबारे संक्षेपमा छलफल भएको वार्ता समितिका सदस्यहरुले बताउनुभएको छ । अर्को बैठकमा मुद्दामा केन्द्रित भएर छलफल हुने विश्वास उहाँहरुको छ । थाकसका केन्द्रीय अध्यक्ष धनीराम चौधरीको नेतृत्वमा रहेको थरुहट थारुवान संयुक्त संघर्ष समितिले आज मंगलबार बिहान पाँच सदस्यीय बार्ता टोली गठन गरेपछि सरकारसँग पहिलो चरणको वार्ता भएको हो ।

सरकारले सोमबार नै गृहमन्त्री रामबहादुर थापा ‘बादल’को संयोजकत्वमा तीन सदस्यीय वार्ताटोली गठन गरेको थियो । सरकारी बार्ता टोलीमा प्रधानमन्त्रीका परराष्ट्र मामिला सल्लाहकार डा. राजन भट्टराई र एमाले केन्द्रीय सदस्य भगवती चौधरी सदस्य रहनुभएको छ । थाकसद्वारा गठित वार्ता टोलीको संयोजकमा पूर्व सांसद रुक्मिणी चौधरी रहनुभएको छ ।

वार्ता टोलीका सदस्यमा महामन्त्री प्रेमीलाल चौधरी, सांसद एवम् नेपाली काँग्रेसका नेता पद्मनारायण चौधरी, थाकस केन्द्रीय सदस्य प्रभातकुमार चौधरी र थारु विद्यार्थी समाजका केन्द्रीय अध्यक्ष चन्द्रप्रसाद चौधरी रहनुभएको छ ।

तपाईको प्रतिक्रिया