थारु जातिनक पहिचानसे जोरगीलक कासमुजसे बनाजैना ढक्या, डेल्वा, पैनसटोपी, पन्छोप्नी, ढक्ली हो । थारु जातिनक कौनोफे पुजाआती, शुभकार्य, दान, पहुरा देहक लाग ओ मनै ओरैलक व्यालाफे ढक्या अनिवार्य प्रयोग करजाइत् । थारु जातिनके सवालम केल निहो क आजकाल गैरथारु जातिनके मेरमेरीक कार्यक्रममेफे पहुना हुकन स्वागत करक लाग ढक्या, डेल्वामे फुला धैक स्वागत करजाइत । थारु जात ओ गैर थारुनके कौनोफे कार्यक्रमम थारु जन्नी मनै कपारी मन कासमुजले बनागैलक डेल्वा, ढक्या लेक आघ लाईनम पहुना हुकन स्वागत कर बैठल देखजाइत् । कासमुजले बनाजैना जत्राफे सामानसे ढक्या, डेल्वा, पनछोप्नी, ढक्ली, भौका, पैनस्टोपी यी सक्कु बना जैना मानव सभ्यताके प्राकृतिक सुरुवात हुइलक पाजैठा । यी थारु जातिनके सभ्यता व संस्कृतिसे जुरल बा ।
कसिक प्रयोगम आईल
अघट्य कौनोफे धातुके विकास घाँस, पत्या जसिन बनस्पतिमसे थारु हुक्र आपन हस्तकलाके प्रयोग कैखन असिन चिज सिर्जैलक संस्कृतविद अशोक थारु बटोईठ । याकर भिट्टर डेल्वा, ढक्या, पनछोप्नी, ढक्ली, भौका पैनस्टोपी, बेर्रा यी सक्कु चिज उहो एक्कठो काँसमुजले बनाजिना चिज हो । याकर इतिहास प्राकृतिक अवस्थासे मानव सभ्यताम आघ बह्र लागल त थारु हुक्र आपन दैनिक आवश्यता पुरा करक लाग ओ जैसिन चिजके आवश्यकता पर्लन् ओह प्रविधिके सिर्जना अप्हने कर्ल । ओ ऊ कला सीप थारु हुक्र अप्नहे सिर्जाइल हुईट । पौह्रा दिहेक लाग डेल्वा, पानी छ्वापक लाग पनछोप्नी, पौह्रा उठाइक लाग वा दैनिक सामान ढरकटे ढक्या, आपन नन्डिय हुकनक लाग खेलौना बनैना ओ हुकनफे दैनिक रुपम कौन चिज कसिख प्रयोग कर सेक्जिठा कैख सिखैनाके लाग ढक्ली, लुगा ढरकटे भौका, ढिक्रि उस्नकटे ओ अन्डिक भाट उस्नक लाग पैनस्टोपी असिन चिजके सृजना उत्पादन हुइल मानव सभ्यताके एक्ठो चरण हो ।
लेखिका- अन्जना चौधरी
थारु जन्याओ अप्हने सर्जक हुइट । कौन आकार डेना, कसिन करैना, सादा करैना कि रंगिन करैना, कत्रा भारी बनैना, कत्रा छोटी बनैना, उहीन कौन चिज कामम प्रयोग कर्ना बेल्सना यी सक्कु चिज थारु जन्याओन के आपन सिर्जना हुइलक संस्कृतविद अशोक थारु कठ ।
रङ्गिन ढक्या काजे प्रयोग नि हुइट
पुजाआँटी च्वाखा काम ओ पवित्र काम हो । रङ्ग कटिकी उहो म केमिकल, रसायनके प्रयोग हुइल रठा । डिउटा हुनक कृत्रिम चिजके प्रयोग निकैख प्राकृतिक चिजके प्रयोग कैख पुजाआँटी कर्लसे च्वाखा नीति मान्जिना हुईलक वर्से पुजाआँटी म रङ्गिन ढक्या प्रयोग नि कैजाईट ।
लोप हुईटी बा ढक्या
थारु जातिनक जन्मनासे ओराईल व्यालासम चाहजिना ढक्या आजकाल लोप हुईटी गैलक पाजिठा । ढकिया लोप हुईटी जैनाम लौव पुस्ता हुकन दोष देहना कर्जिठा । लौव अईना पुस्ता हुक्र ढक्या बिन्ना कामह महत्व निदेहलक ओर्सफे लोप हुईना अवस्था अईलक थारु बुद्धीजिबी हुक्र बटोईठ । हमार संस्कृति ओ संस्कार जोगाईकटे सरकार आघ सर पर्था कनासेफे थारु हुक्र आपन संस्कृति कसिक बचैना हो कैख लाग पर्ना संस्कृतविद थारु कठ । भौकक ठाउँम दराज, पैनस्टोपीक ठाउँम मम बनैना भाँरा, ढक्या डेल्वाके ठाउम प्लाष्टिकके भाँरा आइलक ओर्सेफे थारुनके चलन चल्ती म अईलक काँसमुज मसे बन्ना भाँरा लोप हुईना अवस्थाम पुग्लक पाजिठा ।
आजकाल दाङक दुईठो स्थानीय तह थारु जन्नी मनै काँसमुजमसे बनैना ढक्या, ढक्लि लगायतक लोप हुईटी रहलक सामानहे जोगाईक लाग अग्रसर्ता देखैल बाट । दाङके घोराही उपमहानगरपालिका ओ गढवा गाउँपालिका ढक्याके संरक्षणके लाग तालीमफे आयोजना कर स्याकल बा । खासकैख थारु जातीनके जन्नी मनै बनैना हस्तकला लोप हुइटी रहलक ओर्से उहीन संरक्षण करकलाग ढक्या बिन्ना तालिम आयोजना कर्लक घोराही उपमहानगरपालिकाक मेयर नरुलाल चौधरी बटोईल । उह तालीम म सहभागी हुईलक उर्मिला चौधरी आजकाल ढक्या बेच्क घरखर्च चलाईक लाग सहज हुईलक बटोईथी । घरक काम सेक्ख पुर्सदके व्यालम डेल्वा, ढक्या बिन्ना कर्लसेफे आजकाल माग अनुसारके पुगाई नि सेक्लक उर्मिला कठी । उर्मिला मेहनत अनुसारक एक्ठो ढक्या एक हजारसे ४ हजार रुपियाँ सम बेच्ना कर्लबाटी । पहिल पुरान डिजाईनक ढक्या, डेल्वा बिन्लसेफे आजकाल पानक पट्या, लोट्या, पुजादानी, टेन होल्डर ढक्या, डेल्वा लगायतक बिन्ना कर्ठी । पहिल साधारण ढक्या केल बिन्ना कर्लक उर्मिला गैलक पुस पहिनाम घोराही उपमहानगरपालिका आयोजना कर्लक २० दिन्वा ढक्या बिन्ना तालिमसे लौव लौव डिजाईनक सामान बिन सिख्लक बटोईठी ।
(लेखक पत्रकारिता पेशामे संलग्न बाती ।)
