हमार पहुरा डट कम
धनगढी, साउन २१ गते । कैलाली जिल्लक् धनगढी उपमहानगरपालिका –५, जाइँ गाउँक् थारु हुक्रे चार दिने हरेरीपूजा कार्यक्रम कर्ना हुइल बातैं । हरेक वरष हस यी सालफे साउन २८ गतेसे ३१ गतेसम हरेरीपूजा कार्यक्रम कर्ना गाउँक् भलमन्सा (बरघर) कुलबीर चौधरी बतैलैं ।
हरेरीपूजा कार्यक्रममे परम्परागत पूजापाठ सँगसँगे थारु सांस्कृतिक कार्यक्रम आयोजना हुइना भलमन्सा चौधरी बतैलैं । उहाँक्अनुसार सांस्कृतिक कार्यक्रममे सखिया नाच, हुर्दङ्वा नाच, लठ्ठहुवा, मुंग्रहुवा, झुम्रा नाच प्रदर्शन कर्ना तयारी कैगिल उहाँले बतैलैं ।
हरेरीपूजक् उदघाटन धनगढी उपमहानगरपालिकाके प्रमुख (मेयर) गोपाल हमालके हाथे करैना तयारी हुइती रहल भलमन्सा चौधरी जानकारी देलैं । उदघाटन कार्यक्रम २८ गते दिनके हुइना चौधरीक् कहाइ बा ।
जाइँ गाउँक् थारु हुक्रे २०७३ सालसे हरेरीपूजक् औपचारिक कार्यक्रम आयोजना कर्ती आइल बातैं । बीचमे कोभिडके कारण औपचारिक कार्यक्रम हुई नै सेक्लसेफे यी वरष पुनः बृहत् कार्यक्रमके तयारी कैगिल बरघर चौधरी जनैलैं ।
हरेरीपूजामे गाउँक् देउथन्वामे परम्परागत पूजा कर्ना, खेतीपातीम् किराकाँटी नालागैं कहिके दुधके धार चह्रैना, छाँकीबुन्दी चह्राके देउतनहे दाहिन बनैना काम हुइना उहाँ बतैलैं । थारु परम्परागत पूजासँगे सांस्कृतिक कार्यक्रम कैके धर्ती जगैना कामफे हुइना भलमन्सा चौधरीके कहाइ बा । हरेरीपूजा साउन ३१ गते समापन हुइना उहाँ बतैलैं ।
