लक्की चौधरी
काठमाडौं, माघ २२ गते । प्रधानमन्त्री केपी शर्मा ओलीले आफ्नो कार्यकालमा कसैले नगरेको काम गरेर देखाउने प्रतिवद्धता दोहो¥याउनुभएको छ । आफू प्रधानमन्त्रीको फोटो झुण्ड्याउनलाई प्रधानमन्त्री नभएको उहाँको भनाई छ ।
प्रेस चौतारी नेपालको १९ औं स्थापना दिवसको अवसरमा शुक्रबार यहाँ बोल्दै प्रधानमन्त्री ओलीले त्यस्तो बताउनुभयो । “म प्रधानमन्त्रीको जिम्मेवारीमा रहँदासम्म राम्रो काम गर्छु, जुन दिन पदबाट बाहिरिन्छु पत्रकारलाई प्रश्नगर्ने ठाउँ हुनेछैन” प्रधानमन्त्री ओलीले भन्नुभयो, “म तपाईहरुलाई चुनौति दिन्छु कि पदमा रहँदासम्म आत्मविश्वासले काम गर्छु ।”
“देशलाई नयाँ ढाँचाकासाथ अगाडि बढाउँछु भन्दा ओलीले उखान टुक्का हान्यो भन्छन्” टिप्पणी गर्नुहुँदै प्रधानमन्त्री ओलीले भन्नुभयो, “मेरो भनाई जति सबै उखान टुक्का हो भने विद्वान साथीहरुलाई पुष्टि गर्न म चुनौति दिन्छुँ ।”
“एकवर्षमा लोडसेडिङ् अन्त्य गर्छु भन्दा पनि उखानटुक्का, हावाबाट विजुली निकाल्छु भन्दानि उखानटुक्का, घर–घरमा पाइपबाट ग्यास पु¥याउँछु भन्दानि उखानटुक्का किन देख्छन् कोहीले ?” उहाँले जिज्ञासा गर्नुभयो । मैले बोलेका हरेक कुरामा म जवाफदेही छुँ भन्नुहुँदै उहाँले आफ्नो सबै ध्यान काम गर्नेमै रहेको प्रष्ट पार्नुभयो ।
मुलुकलाई आत्मनिर्भर बनाउनेमै आफू लागेको बताउँदै प्रधानमन्त्री ओलीले नेपालको विकास सुस्त गतिमा रहेकाले अब त्यो अवस्थाले देश उभो लाग्न नसक्ने बताउनुभाये । “एकसय पाँच वर्षमा जम्मा सातसय मेगावाट विद्युत उत्पादन भएकोछ, यस्तो अवस्थाले अब मुलुक बन्दैन” उहाँले भन्नुभयो । संविधान निर्माण भइसकेकाले अब सबै समय विकास निर्माणमा लाग्नेबेला आएको प्रधानमन्त्री ओलीले भन्नुभयो ।
नयाँ संविधानले सबैप्रति न्याय गरेको दावी गर्नुहुँदै प्रधानमन्त्री ओलीले संविधान कार्यान्वयनमा लाग्न सबैलाई आग्रह गर्नुभयो । सो अवसरमा उहाँले देश बनाउने जिम्मेवारी पत्रकारको पनि रहेकाले स्वच्छ र जिम्मेवार पत्रकारितामा लाग्न आग्रह गर्नुभयो ।
एमाले सचिव तथा प्रचार विभाग प्रमुख योगेश भट्टराईले मुलुकलाई एकतावद्ध तथा समाजिक सद्भाव कायम गर्ने बेला अहिले भएको बताउनुभयो । केही समूहले आपसी सद्भाव भड्काउने षडयन्त्रमा लागेकाले त्यसलाई निरुत्साहन गर्न आवश्य रहेको चर्चागर्दै सचिव भट्टराईले भन्नुभयो, “यो अवस्थामा सद्भाव तोड्ने हैन, जोड्ने शक्तिको खाँचो छ ।”
नेपाल पत्रकार महासंघका अध्यक्ष डा. महेन्द्र विष्टले देशले भोगेको समस्याजस्तै पत्रकारले पनि भोग्नुपरेको बताउँदै विना नियुक्तीपत्र, विना पारिश्रमिक मिडियाकर्मी अझै कामगर्न बाध्य भइरहेको बताउनुभयो ।
प्रेस चौतारी नेपालका अध्यक्ष राजेन्द्र अर्यालले पत्रकारिताको विकासमा चौतारी निकट पत्रकारले महत्वपूर्ण भूमिका निर्वाह गरेको भन्नुहुँदै चौतारीको आफ्नै भवन निर्माणका लागि जग्गा उपलब्ध गराउन प्रधानमन्त्री ओलीको ध्यानाकर्षण गराउनुभयो ।
चौतारीले हरेक वर्ष प्रदान गर्ने हृदयचन्द्रसिंह प्रधान पत्रकारिता पुरस्कारबाट यसवर्ष शिव गाउँले, अग्नीशिखा पत्रकारिता पुरस्कारबाट देवराज रिमाल, वीरेन्द्रकुमार साह क्रियाशील पत्रकारिता पुरस्कारबाट दिलिपकुमार सिंह र डेकेन्द्र थापा पत्रकारिता पुरस्कारबाट यज्ञराज थापा र विद्युतमा आउजीलाई पुरस्कृत गर्ने घोषणा गरेको छ ।
यसैगरी यसवर्ष पाँचवटा जिल्लालाई उत्कृष्ट जिल्लाकोरुपमा चौतारीले घोषणा गरेको छ । सो जिल्लामा पूर्वाञ्चलको सुनसरी, मध्यमाञ्चलको दोलखा, पश्चिमाञ्चलको नवलपरासी, मध्यपश्चिमाञ्चलको बाँके र सुदूरपश्चिमाञ्चलको डडेल्धुरा रहेका छन् ।
