राम दहित
पवेरा (कैलाली) साउन २० गते । निर्माणाधिन हुलाकी राजमार्ग अन्तर्गत पर्ना कैलालीके पवेरा ओ रतनपुर गाविसके बीचमे पर्ना कटैनी लडियामे ठेकेदारके लापरवाहीकेकारण निर्माणाधिन पक्की पुल नैबनलपाछे स्थानीयहुक्रे बाध्यहोके आपन श्रमसे काठेपुल निर्माण कर्लेबाटै ।
निर्माधिन पक्की पुलहे जोरके स्थानीय जनश्रमदान, पवेरा ओ रतनपुर गाविसके आर्थिक सहयोग तथा स्थानीय समुदायिक वनके सहयोगमे ऊ काठेपुल निर्माण हुइल हो ।
स्थानीय बैजपुरके युवा प्रविन बौखहीके अनुसार ऊ डुनु गाविसके १७२० जनहनके जनश्रमदानमार्फत साउन १२ गतेसे १९ गतेसम पुल निर्माणके काम हुइल रहे । ३० मिटर लम्बा रहल ऊ पुल निर्माणमे पवेरा गाविसके बैजपुर, मनिकापुर, सपना शिविरके स्थानीयहुक्रे श्रमदान करल रहिट ।
३० मिटर लम्बा रहल ऊ पुल निर्माणमे पवेरा गाविसके बैजपुर, मनिकापुर, सपना शिविरके स्थानीयहुक्रे श्रमदान करल रहिट ।
ओस्टके रतनपुर गाविसके बरकाबसन्ता, छट्कीबसन्ता, टिघरी, भुइयाफाँटा, रामपुर, बिपतपुर ओ मिलनपुर शिविरके स्थानीयहुक्रे फेन श्रमदान करल स्थानीय युवा बौखही जानकारी डेलै ।
साथे पुल निर्माणके लाग रतनपुर ओ पवेरा गाविस कार्यालय १०÷१० हजार आर्थिक सहयोग करल रहिट कलेसे स्थानीय वन उपभोक्ता समूहसे पुल बनाइकलाग चाहना आवश्यक काठ उपलब्ध हुइल रहे ।
पुल निर्माण सम्पन्न हुइलपाछे बुधके रोज एक कार्यक्रमकेबीच स्थानीयहुक्रे पुलके उद्घाटन फेन कर्ले बाटै । रतनपुर गाविस सचिव सन्तोष चौधरी ओ पवेरा गाविस सचिव बलराम चौधरी संयुक्त रुपमे ऊ पुलके उद्घाटन करल रहिट । पुल नैबनलकारण कटैनी लडियामे लाउ डारके जोखिमपूर्ण यात्रा कर्नामे स्थानीयहुक्रे बाध्य रहिट ।
