राम दहित
धनगढी, भदौ ३ गते । थारु समुदायके भाषा, कला, संस्कृतिहे संरक्षण कैना उद्देश्यकेसाथ शुकसे जाँइमे भव्य हरेरी महोत्सव सुरु हुइल बा । धनगढी उपमहानगरपालिका–५ जाँईमे शुरु हुइल महोत्सवके उद्घाटन कैलालीके प्रमुख जिल्ला अधिकारी गोविन्द रिजाल कर्ले बातैं ।
हरेरी महोत्सव मूल आयोजक समितिके सल्लाहकार खडक चौधरीके अनुसार कृषिपूजा तथा हरेरी महोत्सवके सक्कु तयारी पुरा हुइल बा । ‘भाषा, संस्कृति, कला, भेषभुषा हमार पहिचान, हरेरी महोत्सव मनैना सक्कु किसानहुकनके अभियान’ कना मुल नाराकेसाथ स्थानीय जाईबासीके आयोजनामे भदौ ३ गतेसे ५ गतेसम महोत्सव हुइना आयोजक समिति जनैले बा ।
ओहे कार्यक्रममे महोत्सव मूल आयोजक समिति संयोजक कुलबीर चौधरी महोत्सवमे तमान मेरिक थारु खानपिन परिकारके स्टल रहल, मनोरञ्जनके लाग हिरोल्ना, डान्स, कविता, गीत, गजललगायत कलाकारहुक्रनसे आपन प्रस्तुती देखाइकलाग भव्य स्टेज फेन निर्माण करल जानकारी करैलै ।
साथे उहाँ महोत्सव हेरे अउइया दर्शकहुक्रनके लाग डगरामे ठाउँ ठाउँ स्वागतद्वार निर्माण करल समेत जानकारी करैलै । महोत्सव मूल समितिके सल्लाहकार खडक चौधरी शुकके दिन पूजापाठ संगे महोत्सवके उद्घाटन हुइना जानकारी डेलै ।
ओस्तके हरेरी महोत्सव उद्घाटनसत्रके पहुना हुक्रनमे सहायक प्रमुख जिल्ला अधिकारी हिरालाल चौधरी, जिल्ला विकास समितिके परियोजना अधिकृत योगेन्द्र चन्द, धनगढी उपमहानगरपालिकाके कार्यकारी अधिकृत रामलाल श्रेष्ठ, जिल्ला वन कार्यालय प्रमुख, थाकस केन्द्रिय उपमहामन्त्री इन्दिरा चौधरीलगायत रहल सल्लाहकार चौधरी जानकारी डेलै ।
थारु समुदायसे धानबालीमे लग्ना रोगव्याधि हटाइक लाग मनैटी आइल हरेरीपूजाहे बरवार रुप डेटी स्थानीयहुक्रे महोत्सवके आयोजना करल हुइट । कला, संस्कृतिके जगेर्ना संग–संगे ग्रामीण स्तरमे कृषिके आधुनिकीकरण तथा यान्त्रिकरणके उद्देश्यसे फेन कार्यक्रमके आयोजना करल संयोजक चौधरी बटैलै ।
जेकर सहजीकरण जिल्ला कृषि विकास कार्यालयसे हुइना जनागिल बा । संयोजक चौधरी महोत्सव आयोजनाके क्रममे पौनो चारलाख रुपियाँ लगानी लाग सेकल जनैलै । महोत्सव मुल समितिके सल्लाहकार चौधरी महोत्सवके अवधीभर थारु समुदायके लोपोन्मुख कला, संस्कृति, खानपानके प्रदर्शन तथा प्रस्तुती हुइना बटैलै ।
उहाँ बरकीमार, लठ्ठहुवानाच, मुंग्रहुवा नाच, लाठीनाच, सखियानाचके विशेष प्रस्तुती हुइना बटैलै । ओस्टके, रानाथारु समुदाय ओ कठरिया थारु समुदायके फेन टमान प्रस्तुती रहना जनागिल बा । हरेरी महोत्सव हरेकसाल आयोजना कैना समेत महोत्सव मूल आयोजक समिति जानकारी डेले बावै ।
