राम दहित
कैलाली (उदासीपुर), कात्तिक २८ गते । कैलाली नुक्लिपुरमे भव्यरुपसे शनिबार थारु ढिक्रहुवा कार्यक्रम कैगिल बा । कार्यक्रममे पुरुब चितवनसे पश्छिउ कैलाली कञ्चनपुरसम थरुहट÷थारुवान क्षेत्र बनाके छोर्ना थरुहट तराई पार्टीके नेता तथा सांसद डा. गोपाल दहित बटैले बाटै ।
शनिच्चरके रोज उदासीपुर–१ नुक्लीपुरमे आयोजना हुइल ढिक्रहुवा कार्यक्रममे उहाँ ऊ बात बत्वाइल हुईट । कार्यक्रमके बरकापहुना समेत रहल डा. दहित आपन मन्तव्य रख्टी आघे कहलै–‘देशमे लौव संविधान बन्नासे पहिले ओ संघीय खाका अइनासे आघे थारुबाहुल क्षेत्रहे थारुहुक्रनके पहिचान, हक अधिकार सुनिश्चित हुइना मेरके संविधान निर्माण लगायत संघीयखाका बनेपर्नासहितके आन्दोलन करल रहित ।’
मने देशमे आदिवासी जनजाती थारुलगायत दलित, गरिव, पीछडावर्गहुक्रनके हकअधिकार, पहिचानहे नामेटकैनामेरके संविधान जारी हुइनाकेसाथे संघीय खाका आइल बटैलै । यिहीसे थारुलगायत आदिवासी जनजाती दलित पिछडावर्गहुक्रनके हक अधिकार, पहिचानसमेत गुमल डा. दहित बटैले ।
उहाँ लौव संविधानहे राष्ट्रघाटी, देशद्रोही थारुहुक्रनके हित नाइचाहल पक्षसे जारी करल बटैटी संविधान संसोधन नाइ हुइटसम थारुलगायत सक्कु पिछडावर्गहुक्रनके हकअधिकारसे वञ्चित हुइनाके साथे देशमे संविधान कार्यान्वयन हुइ नाइसेक्ना ठोकुवा कर्लै ।
उहाँ नागरिकताके बारेम बोल्टी आपन पार्टीके कौनोमे फेन धारणा नाइ रहल बटैटी देशके कुछ स्वार्थी नेताहुक्रे आपन सत्ता टिकाईक लाग अंगीकृत नागरिकताके सवाल लादे खोजल बटैलै । ओस्तके उहाँ लौव संविधान यिहे कार्तिक मसान्तभित्रे संसोधन हुइना तयारी रहल ओ संघीय गठबन्धनसे उठाईल मागमुद्दा सरकारसे कार्यन्वयनके स्थितिमे रहल बटैलै ।
मने सरकारसे संविधान संसोधनके बिषयमे किहुसे सरसल्लाह नाइ कैके अपने मनोमानी ढंगसे आगे बह्री ओ कैलाली कंचनपुरके सिमांकनके बिषयहे नाइ टुंग्याके संविधान संसोधनके विषय आगे गैलेसे उहीहे कदापी स्वीकार्य नाइ हुइना स्पस्ट पारल रहिट ।
ढिक्रहुवा कार्यक्रममार्फत थारु परिकार मध्ये ढिक्रीके प्रचारप्रसार लगायत महत्वके बारे जानकारीकेलाग राखल कार्यक्रमके जत्राफेन गुनगान गैलेसे फेन नाइपुग्ना कहटी आयोजकपक्षहे धन्यवाद डेहल रहिट । उहाँ थारु सामुदायके टमान परिकार मध्ये एकठो मुख्य परिकार ढिक्री रहल ओ यहिहे थारु सामुदायमे जन्मसे मरणसममे जौन काममे प्रयोग कैना उहाँ बटैलै ।
कार्यक्रमके खासपहुना रहल नयां शक्ति पार्टी नेपाल कैलाली जिल्ला संयोजक एबम् पुर्ब सभासद कृष्णकुमार चौधरी आपनहुक्रनके अधिकारके लडाई निरन्तररुपमे आघे बह्रल बटैले रहिट । साथे उहाँ टीकापुरमे हुइल दुखदायी घट्ना केक्रो पुर्व योजनाके आधारमे घटल घट्ना नाइ हुइल बटैटी ऊ घट्ना थारुहुक्रे उपर अन्याय अत्याचार बिरुद्धके बिस्फोट हुइल बटैलै ।
कार्यक्रममे थारु समुदायके तमान टरटिहुवारमे विशेषकैके बनाजैना परिकारलगायत २५ मेरके ढिक्री प्रदर्शन कैगिल रहे । साथे कार्यक्रममे थारु परिकार घोंघी, सुरीक सिकार, सिद्रा, खरिया, बरिया, खुर्मा, कचरिक बरिया, अन्डिक भात, जांरकेझोल अर्थात निंघार ओ महुवारी दारु लगायतके परिकारके स्टल राखल रहे ।
ओस्तके उहाँ वर्तमान सरकार थारुलगायत न्याय नाइ पाइल पाछेपारल समुदायके हक अधिकारके ग्यारेण्टी नाइ करलेसे टीकापुर जैसिन घट्ना फेनसे घटे सेक्ना बटैलै ।
कार्यक्रममे थारु काल्यणकारिणीसभाके केन्द्रिय सदस्य रामचरण चौधरी, नेपाली कांगेसके क्षेत्रिय सभापति खेम चौधरी, युनिक नेपाल बर्दियाके केन्द्रिय अध्यक्ष तथा थारुअगुवा देबमान चौधरी, कठरिया समाज नेपालके केन्द्रिय सचिव सन्तोष कठरिया, नेपाल पत्रकार महांसंघ कैलाली जिल्ला अध्यक्ष भरत शाहलगायत मन्तव्य राखल रहिट ।
कार्यक्रममे थारु समुदायके तमान टरटिहुवारमे विशेषकैके बनाजैना परिकारलगायत २५ मेरके ढिक्री प्रदर्शन कैगिल रहे । साथे कार्यक्रममे थारु परिकार घोंघी, सुरीक सिकार, सिद्रा, खरिया, बरिया, खुर्मा, कचरिक बरिया, अन्डिक भात, जांरकेझोल अर्थात निंघार ओ महुवारी दारु लगायतके परिकारके स्टल राखल रहे ।
कार्यक्रममे थारु लोकगायक मनिराम चौधरी, चर्चित राष्ट्रिय थारुगायक रामकुमार कठरिया, रमेश मिसन, दर्पन कुश्म्या, बिजय चौधरी, नितु चौधरी, नायक सुरज चौधरी लगायतके कलाकार तथा साहित्यकारहुक्रनके बेजोड प्रस्तुती रहे ।
थारू परम्परा रीति ओ संस्कृतिके जगेर्ना करी, थारू खानपान ओ अपन पहिचानके संरक्षण करी’ कना मुल नाराकेसाथ हुइल कार्यक्रमके घरगोसिया गाउंक भल्मन्सा भागीराम चौधरी रह्ल रहिट । लसिराम चौधरीसे स्वागत करल कार्यक्रमके सञ्चालन कालुराम चौधरी, सुनीता चौधरी ओ अनिता चौधरी करले रहिट ।
