कारी महतो थारु
खैरहनी,(चितवन), पुस २० गते । थारु कल्याणकारिणी सभा (थाकस) चितवन क्षेत्र नं. ७ को आयोजनामा खैरहनीमा पुस २८ देखि माघ ५ सम्म हुने चौथो खिचरा महोत्सवमा खुला नृत्य प्रतियोगिता र कृषिबाली प्रतियोगिता हुने आयोजकले बताएको छ ।
नृत्य प्रतियोगिताको लागि पुस २५ गते अडिसन कार्यक्रम गरी छनौट भएकाहरुलाई मात्र पुस २९ गते प्रतियोगितामा सामेल गराउने आयोजकको निर्णय छ । त्यसदिन छनौट भएकाहरुलाई माघ ४ गते फाइनलमा सहभागी गराउने कुरा नृत्य प्रतियोगिता कार्यक्रमका संयोजक हरिशरण चौधरीले बताउनुभयो । नृत्य प्रतियोगिताका लागि ५० रुपियाँ तिरेर नाम दर्ता गराउनु पर्ने प्रावधान छ ।
प्रतियोगितामा प्रथम, द्वितीय र तृतीय हुनेलाई दश हजार, सात हजार र पाँच हजार रुपियाँ नगद र चार जनालाई शान्त्वना स्वरुप एक हजार नगद तथा प्रमाणपत्र प्रदान गरिने कार्यक्रम संयोजक हरिशरण चौधरीले बताउनुभयो ।
त्यस्तै, कृषकहरुलाई प्रोत्साहन गर्नकालागि विभिन्न किसिमका तरकारी बाली प्रतियोगिता गराइने र ती बालीहरुमा प्रथम, द्वितीय र तृतीय हुनेलाई नगद तथा प्रमाणपत्रको व्यवस्था गरिएको कुरा कृषि परिसर व्यवस्थापन समितिका संयोजक गोपाल चौधरीले बताउनुभयो ।
त्यसकालागि जिल्ला कृषि विकास कार्यालय चितवनसँग सहकार्य भएको उहाँको भनाई छ । गतवर्ष पनि टमाटर, काउली, भन्टा, बन्दाकोपी, ब्रोकाउली, भेडेखुर्सानी, पिरो खुर्सानी, मुला, लसुन, फर्सी, लौका, मकै इत्यादि बालीहरु प्रतियोगिता गराई कृषकहरुलाई पुरस्कृत गरिएको थियो । यसवर्ष पनि त्यसलाई निरन्तरता दिदै उत्कृष्ट ठहरिएका बालीहरु कृषि परिसरमा प्रदर्शनीका लागि राखिने जनाइएको छ । प्रतियोगितामा सहभागी हुनका लागि पुस २७ गते आफ्ना बालीहरु महोत्सव परिसरमा पुर्याउनुपर्ने आयोजकले भनेको छ ।
महोत्सवमा थारु खानाका परिकार, विभिन्न जातजातिका साँस्कृतिक नृत्य, बाल उद्यान, कृषि परिसर, थारु साँस्कृतिक सामग्री प्रदर्शनी, अन्य व्यापारिक स्टल साथै विभिन्न राष्ट्रिय तथा स्थानीय कलाकारहरुका जोडदार प्रस्तुतिहरु महोत्सवका आकर्षण रहने कुरा मूल आयोजक समितिका संयोजक नारायणप्रसाद महतोले बताउनुभयो ।
