सन्तोष दहित
दाङ, माघ ११ गते । महटवा बरघर भलमन्सा महासंघके आयोजना ओ स्थानिय बुलबुल्या क्लव चखौराके सहआयोजनामे यिह माघ १२ ओ १३ गते दाङके हेकुली–८ चखौरामे हुइना थारु सांस्कृतिक माघी महोत्सवके तयारी पूरा हुइल बा ।
महोत्सवके सक्कु तयारी पुरा होसेक्लक महटवा बरघर भलमन्सा महासंघके केन्द्रीय अध्यक्ष एवम् महोत्सव मूल आयोजक समितिके संयोजक तथा सांसद डिल्लीबहादुर चौधरी जनैलैं । महोत्सवमे दाङ, बाँके, बर्दिया, कैलाली, कञ्चनपर, सुर्खेत, पूरुवके मोरङ, सुनसरी, चितवन, कपिलबस्तु लगायत ११ जिल्लक थारुन्हके भेषभुषा, कला, सँस्कृति, प्रदर्शनी कर्ना अध्यक्ष चौधरी बटोइल ।
अस्तके दुई दिनसम चल्ना महोत्सवमे २० ठो स्टल मेरमेह्रिक थारु परिकार, घोङघी, ड¥या भात, गेक्टा, सुरिक सिकार, मुस्वक् सिकार, अन्डिक झ्वार, ढिक्री लगायतके परिकार विक्री वितरणक लाग ढर्नाफे उहाँ जनैल ।
‘खासकैख थारुन्हक् बाहुल रलक थरुहटके पाँच जिल्लाह सांस्कृतिक भिलेजकरुपमे विकास कर्ना उद्देश्यले महोत्सवक आयोजना करल आयोजक बतैले बा । महोत्सबले थारु संस्कृतिके संरक्षण ओ प्रवद्धन हुईना सहयोग पुग्ना त आपन ठाउँमे पलि बा, थारु सांस्कृतिक भिलेजक रुपमे विकास कर्नामेफे ओत्रह टेवा पुग्ना विश्वास कैगिल बा ।
भिलेजम थारुन्हक पुरान भेषभूषा, पुरान सरसमान, परम्परागत गीत ओ नाचके संरक्षण कर्नासङ्ग आन्तरिक तथा बाह्य पर्यटककके गन्तब्यस्थलक रुपम बिकास कर्ना तयारी हुइटि रलक अध्यक्ष चौधरी बटोइल ।
थारु सांस्कृतिक महोत्सवकके उद्घाटन कर पुर्व प्रधानमन्त्री एवम नेपाली काँग्रेसके सभापति शेरबहादुर देउवा लगायत उपप्रधान तथा गृहमन्त्री बिमलेन्द्र निधी, रक्षामन्त्री बालकृष्ण खाँड, सिचाईमन्त्री दिपक गिरी, भौतिक पूर्वाधार मन्त्री रमेश लेखक, परराष्ट्रमन्त्री प्रकाशशरण महत लगायत काँग्रेसके जिल्लामे रलक सांसद हुकन्ह सहभागिता रना चौधरी जनैल ।
