थारु साहित्यिकम्याला २, कैलालीक पटेलाम हुइल् । आम्हिनसम् हुइटिरलक साहित्यिक कार्यक्रमक सब्सेभारी अभ्यास हो थारु साहित्यम । मै दांगम हुइलक भाग १ म सहभागि हुइल् रहुँ । तर भाग २ म आपन कामककारण जाइनिसेक्नु । भाग एकम उहाँ सहभागीहुइल् थारु साहिट्यकारन किताब निकर्ना प्रटिबद्धता जनैल रल्ह । उहअन्सार करिब ८० प्रटिशट सफलफे हुइलिक म्वार अनुमान बा । ओसहँक थारु लेखक संघफे उह ब्यालम गठन कैगिल् । फलस्वरुप डुस्रा भागक आयोजना बिढिवट तरिकाले थारु लेखक संघ करल् ।
अब्खिसक कार्यक्रमक घोषणा पत्र ओ समाचार पर्हबेर बरा खुसी लागल् । थारु साहित्यम लोक कलाक बारेम अशोक थारुसे छलफल, आख्यान बिधम मदन पुरुस्कार बिजेता रामलाल जोशीसे छलफल, मानक भासक बारेम भासाबिद पदम राइसे छलफल, थारु साहित्यम महिलनक बारेम रबिना ओ बालिकाजीसे, साहित्यम दस्ताबेजकिरण ओ म्यालाहँ राष्ट्रियकरण कर्ना जसिन बरवार बरवार छलफल हुइल् । थारु भासा ओ साहित्यक विकासकलाग यी हुइहिंक पर्ना हो ।
कार्यक्रम करब्याला डुठो अवस्ठा आइठ् । एकठो सन्टुस्टि ओ अउर असन्टुस्टि । तर अक्सर सन्टुस्टिहँ प्राथमिकटा डेना ओ असन्टुस्टिहँ ख्याल् निकर्ना बानी बा । हुइना ट गहुँकसँग कबुकाल घुन पिस्जैठ कना नेपाली कहाइ बा । तर सकभर असिन नाह्वाए कना तरिकाले गैलसे बल एक्क ठाउँम लन्ना सजिलो रहठ् ।
म्यालक उपलब्ढि एकडम उच्च बा । थारु समुडायहँ पहर्ना बानी विकास करैना, सचेटना जगैना, लेखक हुँकन जोस्यैना, भासा एकरुपता लन्ना, सम्बन्ढ बल्गर बनैना हिसाबले फे याकर महत्व बरवार बा । हरेक कार्यक्रम पाछ समिक्षा हुइना जरुरी रहठ् । समिक्षा आगामी कार्यक्रमक बारेम सिकाइ अभ्यासक मार्गडर्सन करठ् ।
मै यी सवाल उठैना कुछ कारन बा । खास कैक कैलालीम रलक हिरगर साहित्यिक बगाल कार्यक्रम पाछ बेढक असन्टुस्टिक पोस्ट करल् डेख्परल् । काजे असिन हुइल् ? का जे याकर बारेम हमार साहित्यक अगुवन या आयोजकहुँक्र मौन बाट? यिहिंका चिरफार करक लाग यी लेख सिर्जलक हो । बहुट जहन लागठ् हुइहिन् कट्रा चिल्लैहिं जे, एकडिन ट चुपचाप बैठ परहिन् । एकठो अउर बगाल स्वाँचठ् हुइ मै हिंकन्हँक बिरोढ कैक छ्वारम । यी बिच्चमकिहिं फाइडा ओ बेफाइडा ? यिहिंका समयम सुल्झाइल् मजा रही । यिह कार्यक्रमक बारेम ओ हमार बारेम कुछ बुझाइम कमि हुइलककारण हमार स्ट्याटस्म समेट डख्खल डिहल् हम्र महसुस कर्ल बाटी ।
साहित्यकार डगर डेखैना, अउर चहनसे उच्चओ बौद्धिक सोंच ढर्ना पात्र हुइटि कना म्वार बुझाइ हो । उहमार मनै हमार साहित्य ओ बिचार सुन्ना आटुर रठ ।
कुछ डिन पहिल (२०७३ फागुन २३ गटे—जंग्रार साहित्यि कबखेरी) क फेसबुक वालम नेपालक बर्तमान राजनीतिक नेतृत्वक ब्यबहार मिल्ना डुठो गढनक खिस्सा (शिब खेरा) शेयर कैगिल् रह । किटाब पहर्टि गैनु त ऊ खिस्सा बरा सान्दर्भिक लागल् । वाकर लगट्ट एकठो भाइ (साहित्यिक अभियानम मन पर्ना भाइ) आपन फेसबुक वालम रिस अँरैटि लिख्ल “कोइ कोइ अपनके का सोंच्ठैं यार गडहा कहिके साहित्यक पार्हक ब्यंग्य? अपनहे का साबिट करेक खोजलहो ? समाजके अगुवाइ कर्ना बरवार भासन गफ छँट्ना अनि ब्यबहार कमिना टाल्क छी” ।
अट्ठे शब्डक ख्याल कर्बि । यम्न युवा सर्जक मनुइयन घिनलग्ना कमेन्ट फे कर्ल बाट । मुन्टि फोर्डिहम कना टक अभद्र भासा बा । साहित्यकार डगर डेखैना, अउर चहनसे उच्चओ बौद्धिक सोंच ढर्ना पात्र हुइटि कना म्वार बुझाइ हो । उहमार मनै हमार साहित्य ओ बिचार सुन्ना आटुर रठ । शब्द महा गलट तरिकाले बेलस् गैल बा । मै कौनो ब्यक्ति, साहित्यिक ब्यक्ति या साहित्यिक संस्थाहँ लक्षित कर्ल निहुइटुँ । मै उ कार्यक्रमम गैलफे निहुइटु । सटहि रिसम बहक अउर जहन गर्यैना मानहानी कर्ना हो । एकठो साहित्य सर्जकहँ निसुहैना बाट हो । असिन ब्यबहार ओ बोलि भासा सुढर्ना चाही ।
चैट ३० गटेक बिहान ८ः३६ म जंग्रार साहित्यिक बखेरीक ग्रुप च्याटम एकठो संघर्या आपन मनम लागल् म्यासेज छोर्ल रल्ह । “मोर मनमे सवाल उठल हर किताब निकारे बेर ऐसिक पैसा काहे लेहल हो?? किताब विक्रीवितरण करके कुछ उठथ किनाई ?? लगाईक भर लगैना फारा नि दैखैना कैसिन हो? कोई संघरियान से सुनल रहु ज सा ब के प्रकाशन व्यवसायक लग नाई हो कोई बात नाई व्यवसायक नाई हो टे कमसे कम हर बे ऐसिके पैसा काहे लेहे परल अखिरमे जत्रा प्रकाशन हुईल किताब फोकटिया देहल टे नाई देखगील हो।”
उहाँक जिग्यासा जायज बा । थारु समुदायम पहर्ना बानिक विकास हुइल् निहो । हमार जसिन लिख्ना मनै ट किन्क पर्हबेर हिंच्किचैठी कलसे अउरजे कसिक किनहीं ? यी बरवार कम्जोरी हो । ओसहँक जंग्रार साहित्यिक बखेरी कैयोठो किटाब निकार स्याकल् अवस्थामफे बिक्रि बितरण हुइ निस्याकल् हो । मै उहाँ बुझैना कोसिस फे कर्नु । हरेक कामक हिसाब किटाब हुइक परठ् वाकर दस्ताबेजीकरण हुइक परठ् । तर म्वार आसय रह किपहिल आपन घरक बिच्चम छलफल करी । तर उहाँ महा टाटुल् होस्याकल् रल्ह तबसम् । आन्ढर हस् कट्रा लगानी केल कर्टिरना कल । मै भासिक समबेदनशिलतम बरा ढ्यान पुगैना मनै हुइटुँ । यिम्वार कम्जोरी कहि या कुछ । मै जसिहँक अउर जहन अपशब्ड निबोल्ठुँ ओसिहँक अउर जहन्क सुन्ना फे मन निपरैठुँ । उहब्याला लिख्डेनु “अप्नक बुझाइम आँढरहस् लगानी करल्हस् लागल् कलसे थारु भासक किटाब निकर्ना छोर्डि आझुहँसे । किटाब निकर्ना हमार समुदायहँ फाइडा पुगिओ मै लेखकक रुपम स्थापिट हुइम कैक सोंचाइ बा कलसे कुछ समय घाटा खाक, सहकफे किटाब निकारी ।”
मै भासिक समबेदनशिलतम बरा ढ्यान पुगैना मनै हुइटुँ । यिम्वार कम्जोरी कहि या कुछ । मै जसिहँक अउर जहन अपशब्ड निबोल्ठुँ ओसिहँक अउर जहन्क सुन्ना फे मन निपरैठुँ ।
याकर लगट्ट उ संघर्या आपन फेसबुक वालम एकठो मुक्तक पोस्ट कर्ल ः
आपन मुहमार्के आपन थारु इतिहास लिखाब
ख्याल रहे किउनाइ पुछे पैना हो हिसाब
नाइ खोजम कहुँजिउ निमानल् खोज डर्नु
जवाफ डेनै लिख्ना छोर्डि थारु किटाब ।
यिहिं फे मै अस्वाभाविक निमन्नु । आपन लगानी करल् ठाउँम हिसाब पुछ पाइक परठ् । टर पुछ्ना ठाउँ, टरिकाओ प्रक्रिया रहठ् । यिहिंका नि भुलाइ हुइठ् एकठो संगठनम काम कर्ना मनै । यिहिं फे मै सहज टरिकाले लेनु । टर यि पोष्टम करल् कमेन्ट डया लग्ना मेरिक बा । कौन गडहा हो कना मेरिकक सवाल बा ? खै बौद्धिक प्रस्न? खै साहित्यिक संस्था चलुइयन्क हैसियत?
हमार ब्यबहार ओ बोलि अइना पुस्टाहँ हस्तान्तरण कर्ना ओ हुइना ट हो ? काहम्र यिह मेरिक आपन हैसियट डेखैटि रबी ?अउर समुदायहँ थारु साहित्यकार या स्रस्टा असिन रठ कना सन्डेस डेना ट ?
अट्ठेन, म्वार कहाइ काहो कलसे कौनो फे शब्ड लिख्नासे पहिल चार पाँचचो सोंचि । याकर लक्षिट बर्ग, सुनुइया मनै के हो कैक सोंचि । अप्नक फेसबुकम बरवार मनै ठेसे निच ब्यबहार रलक मनै फे हुइ सेक्ठ । अप्नक बिचारले अउर जहनका असर परहिन कनाख्याल निकर्ना हो कलसे पहिचान स्थापितफे हुइ निसेकि । हो, निमजा पहिचान बन स्याकठ् ।
एकठो साझा कार्यक्रमसे जोर्क कौनो ब्यक्ति या संस्थाहँ आक्षेप लगैना बहुट गलट बाट हो । ब्यक्तिगत बाट हँ संस्थासे ज्वारक फे निचाहि । यि महा कम्जोर मानसिकता हो । समयम सँच्याइल् ठिक रही ।
चाल्र्स डार्बिन् कल बाट— “जे यी संसारसे जुझ स्याकठ्, संघर्ष कर स्याकठ्, उह केल जीय स्याकठ् ।” यि कहाइ सक्कुओंर लागु हुइठ् । साहित्य, संस्कृति, राजनीति या युद्ध । आपनहँ जिवैनाकि मुवैना यी अप्नक हाँठम बा । अप्न यडि लिख चहटि कलसे संसारक कौनो टाकट फे अप्नहँ र्वाक निसेकि । खालि रोकि त अप्नक कम्जोर मानसिकता । खुड अपन्हे रोक्बी ।
एकठो अउर कहाइबा—“आँख्खर चिज हालि टुटठ्, लरम चिज ढिरसे ।” उडाहरणक लाग जिभसे पहिल डाँट झर्क ओराजाइठ् । म्वार मैगर अरजी बा, हम्र आपनहँ बास्टबम मजा साहित्यकार, मजा अगुवा, मजा छावाछाई, मजा मनैया कैक चिन्हाई चहठी कलसे शब्ड संयमता ओ सन्तुलन करी । झग्रा जो कर्ना हुइकलसे स्वस्थ बहस्म उट्री । असिक कर्लसे केल हमार भासिक ओ साहित्यिक पहिचान एकमुस्ट रुपम बचाइ सेक्बी ओ अउर जहनसे अब्बल बन सेक्बी ।
(लेखक, थारु लेखक संघक सडस्य हुइट)
