लखन चौधरी
धनगढी, बैशाख २८ गते । कैलाली कारागारमे बन्दीजीवन बिटैटी आइल थारु कल्याणकारिणी सभा कैलालीके सभापति लाहुराम चौधरीके घरजग्गा लिलामीसे बचाइकलाग सहयोग रकम संकलनमे तिव्रता आइल बा । कैलालीमे ६० हजारसे धिउर रकम संकलन हुइल बा ।
यहाँके थारु अगुवाहुक्रे आ–आपन ठाउँसे सहयोग करटी संकलनके अभियान चलाइलपाछे रकम संकलन कार्यक्रम तिव्रता पाइल हो । थारु अगुवा तथा धनगढीस्थित रोदन मेडिकलके सञ्चालक चन्द्र्रसिंह चौधरीसे १० हजार रुपियाँसे सुरु हुइल अभियान कैलालीमे किल हालसम साढे ६० हजारसे ढिउर रकम संकलन होसेकल बा ।
धनगढीस्थित रोदन मेडिकलके सञ्चालक चन्द्र्रसिंह चौधरीसे १० हजार रुपियाँसे सुरु हुइल अभियान कैलालीमे किल हालसम साढे ६० हजारसे ढिउर रकम संकलन होसेकल बा ।
अप्ने स्वयम २० हजार रुप्या सहयोग करल थाकस कैलाली सचिव माधव थारुकेअनुसार थारु अगुवा बुन्दीलाल चौधरी पाँचहजार, पुरन चौधरी दुई हजार पाँच सय, इन्दु थारु चारहजार, प्रभात चौधरी १५ हजार, इन्दिरा चौधरी दुई हजार ओ अधिवक्ता जोहारीलाल चौधरी दुई हजार रुपियाँ सहयोग कर्ले बाटै । अस्तके सहयोग कर्ना प्रतिवद्धता फेन अइती बा ।
ओस्टके व्यवस्थापिका संसदमे प्रतिनिधित्व कर्र्ना थारु सांसदहुक्रे फेन आर्थिक संकलनके अभियान शुरु कर्ले बाटै । हालसम तीन जाने किल सहयोग करल सांसद योगेन्द्र चौधरी बटैलै । सांसद तेजुलाल चौधरी, जनक चौधरी ओ योगेन्द्र चौधरी जनही तीन हजार रुपियाँके दरसे सहयोग प्रदान करल जानकारी आइल बा ।
व्यापारिक प्रायोजनके लाग लेहल ऋण जेलमे परलपाछे सचापति चौधरी समयमे तिरे नैसेकलपाछे धितोस्वरुप राखल घरजग्गा लिलामके प्रक्रियामे पुगल बा । धनगढीस्थित एनआइसी एसिया बैंक बैशाख १० गते सावाँ, ब्याजसहित एकमुष्ट ऋण चुक्ता तथा धितो लिलामसम्बन्धी ३५ दिने सूचना प्रकासन करलपाछे थारु अगुवाहुक्रे जुरमुराइल हुइट ।
३५ दिने समायवधी अर्थात जेठ ९ गते भिट्टर रकम नैबुझैलेसे उहाँके धनगढी उपमहानगरपालिका–३ बडहरामे रहल कित्ता नम्बर २३९ के एक कट्ठा जग्गा ओ घर लिलाम हुइना अवस्थामे बा ।
टीकापुर घटनामे संलग्नताके आरोपमे पुर्पक्षकेलाग कारागार चलान हुइलपाछे थरुहट थारुवान संयुक्त संघर्ष समिति कैलाली संयोजक समेत रहल चौधरी बैंकके ब्याज तिरे नैसेकले हुइट । बैंकमे सावा, ब्याज सहित १० लाख ९४ हजार ४७ रुपैया तिरेपर्ना बातिन् ।
अप्ने बन्दी जीवन बिटैटी रहल ओरसे घर जग्गा लिलाम हुइनासे बचैना कौनो उपाय नैरहल पीडित चौधरी बटैले बाटै । जेल परलपाछे सञ्चालनमे परल अजगर काष्ठ फर्निचर उद्योग फेन बन्द हुइल बा ।
तत्काल ८० हजार रुपैया बुझैलेसे तीन महिनाके लाग घर जग्गा लिलाम हुइनासे बच्ना बैंक जनैले बा । जौनकारण जेठ ३ गते भिट्टर ८० हजार रुपैयाँ जसिक फेन संकलन कर्ना लक्ष्य बनाइल थाकस सचिव माधव थारु बटैलै ।
उहाँ नागरिक समाजसे सहयोग हुइलेसे घरजग्गा बच्ना उल्लेख करटी सहयोगके अपिल कर्लै । तत्काल ८० हजार रुपैया बुझैलेसे तीन महिनाके लाग घर जग्गा लिलाम हुइनासे बच्ना बैंक जनैले बा । जौनकारण जेठ ३ गते भिट्टर ८० हजार रुपैयाँ जसिक फेन संकलन कर्ना लक्ष्य बनाइल थाकस सचिव माधव थारु बटैलै ।
थारु नागरिस समाज कैलाली संयोजक दिलबहादुर चौधरी देश ओ विदेशमे रहल हुकनहे सहयोगके अपिल करटी थारु कल्याणकारिणीसभासे थारु बसोबास करल सक्कु जिल्लासे सहयोग रकम जुटाइक लाग पहल हुइल बतैलैं । हरेक जिल्लासे ५० हजारके दरसे सहयोग संकलनकेलाग थाकस केन्द्रसे सर्कुलर कैगिल केन्द्रीय उपाध्यक्ष प्रेमीलाल चौधरी बतैलैं ।
उहाँ नेपालमे रहुयान्के लाग कृषि बिकास बैंक बैकिङ कार्यालय धनगढी, कैलालीमे थारु कल्याणकारिणी सभाके खाता नं. १०११७२ वा ०८२२५००३९४१०९०१५ मे जम्मा करेसेक्ना व्यवस्था बा ।
