राम दहित
धनगढी, जेठ ९ गते । आपन सुमधुर स्वरसे गायिका अनिता चौधरी ‘नितु’ स्रोता हुक्रनहे लठ्ठ पारसेकल बाती । आब दर्शक स्रोता हुक्रनहे पुठ्ठा मर्काके लोभ्यैना प्रयासमे बाटी ।
सुमधुर स्वरके धनी गायिका नितुके स्वर रहल गीत पाछेक समय स्रोताहुक्रनके खुब मन जित्ले बावै । गायिका चौधरीके स्वर रहल सपना एल्बमके ‘चिनी मिलाईल जैसिन बोल टोहार’ ते झनै स्रोताहुक्रनके मन जित्ना सफल हुईल बावै ।
यी गीतमे गायिका अपने सहायक मोडलकेरुपमे म्युजिक भिडियो फेन निकार सेकल बाटी । युट्युवमे राखल म्युजिक भिडियोके दिनप्रति दिन दर्शक बह्रटी बाटै ।
चौधरीके स्वर डेहल चर्चित गीत मध्ये ‘सोन डेख्नु चाँदी डेख्नु, डेख्नु हिरा मोती’ फेन स्रोता हुक्रनके मनमस्तिकसहित गुनगुनैना गीत बनल बा । सपना एल्बममे थारु आधुनिक गायक रामकुमार कठरिया ओ गायिका तथा मोडल नितु चौधरीके स्वर बा ।
‘जैसे बगिया सोहावन लागे, जैसे लडिया सोहावन लागे’ बोलके गीतमे मुख्य भुमिका सहित अब्की दर्शकहुक्रनहे लठ्ठ पर्नाओर कम्मर कसल बटैली ।
छोट्टेसे गीत संगीत ओर रुची रहल चौधरी बरा होके एकठो सफल गायिका बन्ना सुनैली । ‘मोर छोट््टेक रहल बरा होके एकठो सफल गायिका बनम कना रहे ।’ ‘गायिका ते बन्नु, स्रोताहुक्रनके जजकैना हो कि मै कत्रा सफल गायिका हुईटु,’ चौधरी कहली । मने स्रोताहुक्रनके प्रतिक्रियासे पाछेजाके एक सफल गायिका बनम जैसिन लागठ्, उहाँ कहली ।
घोडाघोडी नपा–४ जनकपुर निवासी गायिका चौधरी सांगितिक क्षेत्रओर आपन घर परिवार डाइबाबक पूरा सहयोग पाईल बटैली । अपने स्वर रहल चर्चित गीत ‘जैसे बगिया सोहावन लागे, जैसे लडिया सोहावन लागे’ बोलके गीतमे मुख्य भुमिका सहित अब्की दर्शकहुक्रनहे लठ्ठ पर्नाओर कम्मर कसल बटैली । म्युजिक भिडियो सफल हुईलेसे मोडल नितु अइना दिनमे फेन औरे म्युजिक भिडियोमे मोडल खेल्ना बटैली ।
संस्कृतिमे धनी थारु समुदायमे पाछेक समय म्यूजिक भिडियो बनैनाक्रम बह्रटी बा । आधुनिक नृत्यप्रति युवापुस्ता हुक्रनके लगाव बह्रटी गैलसंगे थारु समुदायमे म्यूजिक भिडियो बनैनाक्रम बह्रल बा । कुछ समय यहोर कैलाली, कञ्चनपुर, बर्दिया, बाँके, दाङ्गसे अँठ्वारपिच्छे म्यूजिक भिडियो निर्माण हुईटी बा ।
कैलालीसे हमार म्युजिक बगिया, सीएस फिल्म् प्रालि, बर्दियाके याल्डमुन मिडिया, विन्दास म्युजिक बयिया, संङ्ग् नेपाल लगायतके थारु म्युजिक भिडियोहे बजारमे लन्टी बा ।
