राम दहित
रतनपुर, जेठ २६ गते । कैलारी गाउँपालिका–७ (साविक रतनपुर–८, भुईयाँफाटा) के स्थानीय भगवती चौधरीहे आजकल कौन चुनाव चिन्हमे भोटदर्ना हो कहिके अन्यौल बातिन् ।
दिनेपिच्छे तमान राजनीतिकदलहुक्रे चुनावी प्रचारप्रसार, घरदैलो कार्यक्रमसहित मतदाता भेटघाट करे आईलपाछे भगवती चौधरी कौन चुनाव चिन्हमे भोटदर्ना कहिके अन्यौलमे परल हुईटी ।
चुनावी प्रचारप्रसार, घरदैलो कार्यक्रमसहित मतदाता भेटघाट करे आईल राजनीतिक दलहुक्रे तमान आश्वासनसहित आपन चुनाव चिन्हमे भोट दारे कहलपाछे टे झनै उहाँ अन्यौलमे परल सुनैली । उहाँ कहली–‘उ नेता आईठ् उ कहठ्, महिन जिताउ, मै टुहरनके बैठल जग्गाके लालपुर्जा डेहुवैम ।’ ‘औरे नेता आईठ् उ कहठ्, महिन जिताउ मै टुहरीनके बस्तीमे लाईन जोडाडेम, गाउँक डगरामे ग्राबील बिछाडेब, चौधरी कहली ।’
चौधरी आघे कहली–‘किही–किही जितैना हो, सक्कु नेतन ते महिन जिताउ टुहरीनके यी कैडेम उ कैडेम कठै ।’ मने, आपनहे जिताई कहटी नेताहुक्रे जत्रा अश्वासन लेके अईलेसे फेन बस्तीके लाग कुछ करे सेकेवाला नेताहे किल अपने भोट डेना चौधरी मनमने सोचल बतैली ।
ओहे गाउँक स्थानीय चेतराम दहित फेन आजकल नेताहुक्रनके आश्वासन सुनके हैरान होसेकल बाटै । ‘उ नेता आईठ् उ कहठ भुँईयाफाँटा बस्ती बैठैनामे मोर बड्वार हात बावै ।’ महिन जितैबो कलेसे बैठल बस्तीके लालपुर्जा, गाउँमे बिजुली बत्ती, खानेपानी, ग्राभेल लगायतके आश्वासन नेताहुक्रे अक्सर डेना करल दहित बटैलै ।
आजकल नेताहुक्रनके आश्वासन सुनके हैरान होसेकल बाटै । ‘उ नेता आईठ् उ कहठ भुँईयाफाँटा बस्ती बैठैनामे मोर बड्वार हात बावै ।’
उहाँ कबुकाल टे आपनहे हासी फेन लग्ना सुनैलै । आजकल भुँईयाफाँटा बस्ती नेतनके लाग भोट भँजैना माध्यम बनसेकल समेत दहित बटैलै । भुईयाँफाटाके स्थानीयहुक्रनहे फेन दिनेपिच्छे तमान राजनीतिक दलके नेताहुक्रे भोट मागे आईलबेला डेहल आश्वासन सुनके जात्तिके हो कि आपन जितकलाग किल हो कना लागल बाटिन् ।
ओस्टके बाढीपीडित होके बैठे आईलबेला बस्तीहे उठैनामे सहयोग करुईया नेताहुक्रनके आश्वासन सुनके ते आउर आपन जितकलाग खेलल् चाल किल हो कि कना पुरा शंका रहल यहाँके स्थानीयके बुझाई रहल बाटिन् ।
मने यहाँके अधिकांश स्थानीयहुक्रे आपन बस्तीके स्थायीबसोबास, गाउँमे विद्युतीकरण, खानेपानी, ग्राभेल, खेती किसानीके लाग सिँचाई, सुपथ मुल्यमे मलखाद, कृषि औजार, कृषि अनुदान लगायतके सेवासुविधा लाने सेकेवाला उम्मेदवारहे किल अपनेहुक्रे भोट डेना मनसाय रहल सुनैलै ।
भुईयाँफाटा बस्ती बाढीपीडित बस्ती हो । जौन बस्ती २०६५ साल असोज ४ गते आईल बड्का बाढसे विस्थापित होके हाल बसन्ता कोरिडोरके आँरीटर बैठल बा । जौन बस्तीके पुरुव ओर साविक रतनपुर–७ के रामपुर गाउँ ओ पश्छिउ ओर साविक रतनपुर–६ के छुट्की बसन्ता बा । ओस्टके बस्तीके उत्तरओर हुलाकी सडक ओ बड्का बनुवा बा । भुईयाँफाँटावासी विगत नौ बरससे उक्त ठाउँमे अस्थायीरुपमे बसोबास करटी आईल बाटै ।
साविस रतनपुर गाविसके ७८२२ कुल जनसंख्यामध्ये साविक रतनपुर ४, ८ ओ ९ वडा अन्तर्गतके भुईयाँफाँटा, तिघरी ओ हौसलपुर बस्तीके किल २२८० जनसंख्या रहल बा । कुल १६४७ मतदाता संख्या रहल बस्तीमे महिला मतदाता ८०५ ओ पुरुष मतदाता ८४२ रहल जनाईल बा ।
