राम दहित
कैलाली, जेठ १ गते । गाउँसे दुःख बेमार रोगदोख हटाईकलाग कैलारी गाउँपालिका–७ साविक रतनपुर ७ रामपुर गाउँमे थारु बरका नाँच आयोजना कैगिल बा ।
थारु समुदायके बरका नाँचके रुपमे चिन्हजैना नाचहे गाउँघरमे दुखबेमार परलबेला नचैलेसे गाउँसे दुःख बेमार हट्के जैना जनविश्वास बा । नाँचके अगुवा तथा बरकागुरुवा रामप्रसाद डगौरा थारु गाउँमे रहल दुःख बेमार रोगदोख निकासीके लाग बरकानाँच नाचजैना बटैलै ।
खासमे गाउँ सँपारकलाग बरकानाँच नाचजैना गुरुवा डगौरा थारु कहलै । बरकानाँचके ढिउर महत्व रहल बटैटी उहाँ गाउँ सत्पटाईल, भूतभूटाईल, दुःख बेमार, रोगव्याधिहे गाउँसे भगाईकलाग बरकानाँच नाचजैना बटैलै ।
ओस्टके, उहाँ गाउँघरसे धानपिसान उरनालगायत तमान समस्या डेखापरलेसे गाउँहे बाँधकलाग फेन बरकानाँच थारु समुदायमे नचैना बटैलै । गुरुवा डगौरा थारु बरकानाँचहे ‘तारा बाण नाच’ओ ‘पाँच पाण्डब सय कौरबके नाचके रुपमे चिन्हजैना बटैटी उहाँ पुर्खौसे थारु समुदायमे नच्टी आईल बटैलै । बरका गुरुवा डगौरा थारु नाचके दाङसे उत्पत्ति होके उल्टनपुर हुईटी कैलाली पुगल जानकारी डेलै ।
बरकानाँचके ढिउर महत्व रहल बटैटी उहाँ गाउँ सत्पटाईल, भूतभूटाईल, दुःख बेमार, रोगव्याधिहे गाउँसे भगाईकलाग बरकानाँच नाचजैना बटैलै ।
गाउँमे दुखबेमार लगायत तमानमेरिक समस्या डेखगैल ओरसे गाउँमे बरकानाँचके आयोजना करल गाउँक भलमन्सा चतुर चौधरी जानकारी डेलै । ढिउर दिनसे गाउँमे दुःखबेमारलगायत गाउँ सट्पटाईल ओरसे गाउँ सँपारकलाग नाचके आयोजना करल भलमन्सा चौधरी बटैलै ।
नाँच अवधिभर दुरदुरसे विमारीहुक्रे झारफुँक कराई आईल झारफुँकमे संलग्न गरुवा डण्डीराम चौधरी जानकारी डेलै । उहाँ ढिउर जैसिन हातगोर पिरैना, कान बठैना, पेट पिरैना, मृगीरोग सम्बन्धी विमारी आईल जानकारी डेलै । झारफुँक कराई अउईया प्रायः सक्कु विमारी चोखाके गैल समेत गुरुवा चौधरी जानकारी डेलै । झार फुँकके लाग नाच अवधिभर ६० गुरुवाहुक्रनहे खटाईल रहे ।
पुर्खाहुक्रनके मान्यताअनुसार गाउँमे बड्कानाच नचैलेसे गाउँमे रहल दुःखबेमार लगायत समस्या दुर हुईना जनविश्वास बा । नाँचमे कञ्चनपुरलगायत जिल्लाके तमान ठाउँसे दुःख बेमारमे परल सयौं व्यक्ति झारफुँक कराई आईल जानकारी कराईल बा ।
नाच आयोजनाके लाग ८० हजारसे ढिउर खर्च हुईल भलमन्सा चौधरी जानकारी डेलै । उहाँ खर्च व्यवस्थापनके लाग गाउँसे घरौरा टिनाटावन, दाल चाउरसमेत उठाके व्यवस्थापन करल जानकारी डेलै । बरका नाँचके टोलीमे सयसे ढिउर गुड्वाहुक्रनके सहभागिता रहल रहे कलेसे उहाँहुक्रनसे थारु समुदायमे नाचजैना झुम्रा, सखिया, दिननचुवा, मुंग्रहुवा, लठ्ठहुवा, टरहुवा लगायत नाँच नाचगिल रहे ।
