दुर्जन चौधरी
धनगढी, साउन २२ गते । साहित्यमार्फत थारु संस्कृतिहे बचैना ओ समाज परिवर्तन करकलाग साहित्यिक रचनाके वाचनसहित हिरगर साहित्यिक बगालके ३९ औँ भाग सम्पन्न हुइल बा ।
साहित्यसे फेन समाज परिवर्तन करे सेकजाइ कना उद्देश्यसहित हिरगरके नियमित मासिक साहित्यिक श्रृङ्खला कैगील हो । हिरगर साहित्यिक बगालके अध्यक्ष हिरालाल सत्गौवाके अध्यक्षतामे हुइल कार्यक्रममे देश विकास ओ समाज परिवर्तन कैना मेराइक साहित्यिक रचना बाचन कैगील रहे ।
हिरगर साहित्यिक बगालके अध्यक्ष हिरालाल सत्गौवाके अध्यक्षतामे हुइल कार्यक्रममे देश विकास ओ समाज परिवर्तन कैना मेराइक साहित्यिक रचना बाचन कैगील रहे ।
देश छोरके विदेश जैटी रहल अब्वाके युवाहे मध्यनजर कैके साहित्यिक रचना गीत, गजल, मुक्तकमार्फत सन्देश देगील रहे । कार्यक्रममे नृत्य निर्देशक दीप श्रेष्ठ कलाकार र साहित्यकार मिल्के गैलेसे समाजहे मजा डगरओर डोर्याइ सेकजिना बतैलैं ।
साथे कलाकार ओ साहित्यकारहुकनके एक्के उद्देश्य समाज ओ देश परिवर्तन कैना हुइलककारण सहकार्य करके गैलेसे हलहल समाज परिवर्तन हुइनाकेसाथे भाषा, संस्कृति, संरक्षण हुइना बात बटैलै । कार्यक्रममे हिरगर साहित्यिक बगालके नियमित मासिक श्रृङ्खला ४० औं भाग भदौ २४ गते नैनादेवी मन्दिरके परिसरमे हुइना हिरगर साहित्यिक बगालके अध्यक्ष हिरालाल सत्गौवा जानकारी देलैं । साथे आगामी कार्यक्रममे श्रृङ्गारिक साहित्यिक रचनासे फेन विकास सम्बन्धी साहित्यिक रचनाहे विशेष जोडदेना बात बटैलै ।
कार्यक्रममे कलाकार मुन थारु, किरन चौधरी, संगत चौधरी, राजेन्द्र चौधरी, फिल्म निर्देशक चन्द्र चौधरी ‘चाँद’, क्यामरामेन साहिल चौधरी, साहित्यकार सागर कुश्मी, अनिता चौधरी, उषा चौधरी, आशा चौधरी, सानु चौधरी, दुर्जनकुमार चौधरी, बाल साहित्यकार रोदन चौधरी तथा कार्यक्रममे युवाविद्यार्थी तथा साहित्यकारहुकनके विशेष उपस्थिति रहल रहे ।
