दुर्जनकुमार चौधरी
धनगढी, कुँवार २७ गते । दशिया ओ डेवारीके अवसरमे हिरगर साहित्यिक बगाल एकापसमे शुभकामना आदानप्रदान कार्यक्रम कर्ले बा । हिरगरके नियमित साहित्यिक श्रृङखलाके ५२ औं भाग अन्तर्गत दसिया ओ डेवारीके शुभकामना आदान प्रदान कैगिल हो ।
हिरगर साहित्यिक बगालके अध्यक्ष तथा यूनियन लाइफ इन्स्योरेन्स कम्पनी धनगढीके शाखा अधिकृत हिरालाल सत्गौंवा दसिया ओ डेवारी टडक भडकके साथ नैमनाके आपन क्षमता शक्ति अनुसारके मनाइ पर्ना बतैलैं । दसिया डेवारीमे लराइ झगरा ओ जुवातास खेल्के आपन ओ आपन घरपरिवारनहे विचल्लीमे नै नैपर्ना आग्रह उहाँ कर्लैं ।
कार्यक्रममे युवा नेता ठाकुरप्रसाद करियाप्रधान युवा देशके कर्णधार हुइलक ओरसे अब्बाके युवा आपन खाली समय जुवातासमे नै बिताके समाजसेवा तथा सामाजिक कार्यमे संलग्न हुइपर्ना बतैलैं ।
ओस्टके कार्यक्रममे सिर्जना चौधरी दसिया लच्क्याइल ओरसे सखिया नाच नाचेबेर गैना गीत गाके कार्यक्रमहे चैनार परले रहिट । साथे चित्रकार मनिष चौधरी, गायिका गौरी चौधरी, साहित्यकार सागर कुश्मी, तुलाराम सनम, दुर्जनकुमार चौधरी, प्रेमलाल चौधरीलगायत साहित्यकारहुकनके उपस्थित रहे ।
कार्यक्रममे एक आपसमे शुभकामना आदान प्रदान करटी हिरगर डटकमहे कैसिक आगे लैजाइ सेकजाइ कना विषयमे समेत छलफल करगील रहे ।
