सुशील चौधरी साँस्कृतिक अभियानकर्ता हुइट । उहाँ लम्मा समयसे थारु भाषा, साहित्य ओ संस्कृति, क्षेत्रम सशक्त रुपमे कलम चलैटि आइल बाट । चौधरी करिब दुई दशकठेसे मानवअधिकार आन्दोलनमे क्रियाशीलफे बाट । कमैया, कम्लरी, भुमिहिन मुक्ति आन्दोलनम उहाँके विशेष योगदान बाटन । थारु समुदायन्हक ढुरिक खम्वाके रुपम राष्ट्रिय ओ अन्तर्राष्ट्रिय स्तरम परिचित रलक सांस्कृतिक अभियानकर्ता सुशील चौधरीसे अट्वारीके विषयम पत्रकार सन्तोष दहितके करल बातचित
अट्वारी कसिन टिउहार हो ?
अट्वारी थारु समुदायमे मान्जैना एक पवित्र टिउहार हो । अट्वारीम शक्तिके पूजा कैजाइठ ओ आपन सहयोग करुइयन् कृतज्ञता डेखैना पर्व फे हो ।
कौनो ऐतिहासिक घट्नासे ज्वारल बा की ? यकर निरन्तरता केल हो ?
हर मेरिक संस्कृतिक ऐतिहासिक पृष्ठभूमि रहठ । अट्वारी मन्नामफे धार्मिक ओ ऐतिहासिक पृष्ठभूमि बा । मेरमेह्रिक मिथकमसे भेंवा दंगिशरण रज्वाहन सखैलकमार भेंवक पूजा कर्ना चलन चलैलक मार अट्वारी टिउहार मनाइल जनविश्वास रहल बा ।
पहिले ओ आजके अट्वारीम कुछ फरक पैल बाटी की ?
अट्वारी मन्ना ओ मनैना शैलीम खास अन्तर नि डेखपरठ । मने आजकाल थारु समुदायके बसोवास शहर बजार ओरफे हुइ भिर्लकमार सामुहिकरुपमे ओ प्रचारात्मक शैली अंग्वार भिर्लक डेखपरठ । सामुहिकरुपमे मनैना मजाफे हो ।
यी पर्वहे राष्ट्रिय रुपम मनाइकलाग का कर परि ?
अट्वारी टिउहार नेपालम मनाजैना फरक विशेषता हुइलक पर्व हो । सम्भवतः मर्डाना मनै भुख्ल (उपवास) बैठख मनाजैना एकठो पर्व हो । और पर्वम ढ्याउर जसिन जन्नी मनै भुख्ल रना चलन बा । शक्ति ओ सौर्यके पूजा कर्ना पर्व हुइलकमार अट्वारी टिउवार हन थारु समाजके शक्ति ओ एकताके सन्देश डेना मेरसे गाउँ, जिल्ला ओ राष्ट्रियरुपम मनाइ सेक्जाइ । अट्वारीक मिथक बर्किमारके समकालीन थारु सभ्यता हो कना प्रमाण फे हुइलकमार संस्कृतिम नुकल थारु इतिहासके खोजीकर्ना बजरा केवाँर हुइस्याकठ् ।
अइना दिनम पर्व मन्ना ठाउँक थारु गुरुवा, जानकार हुकन्हक पाञ्चायन समिति बनाक सक्कु थारु टिउहारके तिथिमितिक एकरुपता डिह सेक्जाई ।
अट्वारीके खास तीथिमिति निहोख मनैना दिनके एकरुपताके अभाव देखपरथ् नि ?
थारु पात्रोक अभावमे असिनहुइल डेखपरठ । पहिल भौगोलिक कठिनाइक मार आपन–आपन मेरसे मनाजाए । खासम अस्टिम्की एकपाख पाछक अट्वारक दिन अट्वारी मनागिल डेखपरठ । अस्टिम्की अंढरिया ओ अट्वारी ओजरियामे मनाजैना हुइलकमार भाद्रशुक्ल पक्ष टिटियाम पर्ना तीज पर्वक आघपाछ अट्वारी परठ । असौक अट्वारी भाद्र शुक्लपक्षक षष्ठी (छैठौ) दिन परल बा । आजकाल एकरुपता अइटी बा । कैलालीक खोजकर्ता दिलबहादुर चौधरीक अगुवाइम निक्रटी रलक थारु पात्रो ठोरकुछ लिरौसी बनैल बा । अइना दिनम पर्व मन्ना ठाउँक थारु गुरुवा, जानकार हुकन्हक पाञ्चायन समिति बनाक सक्कु थारु टिउहारके तिथिमितिक एकरुपता डिह सेक्जाई ।
अट्वारी कसिख मनाजैठा डान्चे प्रकाश पार्डि न ?
अट्वारी अठ्वारक पहिलदिन अट्वारक दिन मानजैना हुइलकमार अट्वारी कहगैल । शनिच्चरक डिन मच्छी मार्क राटक मुर्घि बोल्नासे आघ भिन्स¥या (डर) खैना कैजाइठ । अट्वारक डिन भुख्ल रहक, घरक एकजन भुख्ल मनै टेलार रोटी पकैना कर्ठ । बारीव्युरा, बजारसे खिरा, अमरुट, केरा डही अस्ट सामान जुटा जाइठ । गयरोन् बन्वासे गोरु, भैंस, छेग्री, भेंरी घारीम करेइलक पाछ, रोटी, फलफुल काहारक ढ्वाक सलाम लाग्क खाजाइठ । अट्वारीम भेंवक पूजा कैजैना हुइलकमार एक करोट्या भेंवक रोटी पकाक फे पुज्जाइठ । सोमारक डिन फह्रारम भाट, टिना काहारक अन्न लेजाइठ । काह्रल रोटी, भाट, टीना, फलफुल अग्रासनक रुपम डिडि बहिन्यन पठाजाइठ ।
अट्वारीम डिहजैना अग्रासनक बहुट महत्व बा । बासी अग्रासनके ठाउँमे फलफूलके अग्रासन डेलसे कसिनहुई ?
मज हुइ, कौनो चिन्हा, लुगा, गहना, किताबफे अग्रासनक रुपम डिह सेक्जाइ । अग्रासन डाडु भैया ओ डिडि बाबुन्के मैया डेखैनाम जामौका फे हो ।
थारु टिह्वारम एकरुपता आइल डेख नै परठ, अप्नक विचार का बा ?
संस्कृति जनविश्वासम आधारित रहठ, उहमार आपन–आपन आस्था ओ विश्वास अन्सार मन्ना हो, यहीम कौनो बनावटी फरमान जारी कर्ना सम्भव नै हो । समयक्रमम संस्कृति परिस्कृति ओ रुपान्तरित हुइटी जैना चिजफे हो । सवाल काहो कलसे हमार साँस्कृतिक अभ्यासम कौन संस्कृति हो कौना कुरिती हो ? कौन अभ्यास ओ विश्वास हन समयसापेक्ष सुधार करपर्ना बा, कना विषयम साँस्कृतिक बहस, विमर्श कर्ना एकडक जरुरी बा । यी क्षेत्रम काम यथोचित हुइ निस्याकठो । हम्र थारु संस्कृतिक नाउँम रुढिग्रस्त हुइटी बाटी । अनुसन्धानकर्ताहुक्र हमार संस्कृतिम रलक आस्था ओ विश्वास कत्रा बैज्ञानिक ओ युगानुकुल बा कैक विट्ख्वार पर्ना बा ।
हम्र थारु संस्कृतिक नाउँम रुढिग्रस्त हुइटी बाटी । अनुसन्धानकर्ताहुक्र हमार संस्कृतिम रलक आस्था ओ विश्वास कत्रा बैज्ञानिक ओ युगानुकुल बा कैक विट्ख्वार पर्ना बा ।
गुर्वा बैडावा, सोह्रिन्या ओ परम्परासे कर्टी अइलक अभ्यासके बैज्ञानिकता डेखाइपर्ना ब्याला आस्याकल । जस्ट की, थारु समाजम सोह्रीम सोह्रिन्यक स्यावा ओ सुसारके विधि आधुनिक नर्सिंङ शिक्षा मान सेक्ल बा । आधुनिक अस्पतालसे मजा सुसार थारु सोह्रिन्यन डेटिबाट । असिन असिन अत्रा ढ्यार विषय ओ क्षेत्र बाज्याकर विषयम आजकाल विश्वविद्यालयम शोध करुइया थारु गैरथारु विद्यार्थी ओ अनुसन्धानकर्ता हुक्रकर्ना जाँगर डेखाइपर्ना बा ।
जैटी जैटी, कुछु बा की ?
अट्वारी रहुइया अटोरियन मैगर शुभकामना बा । थारु समुदाय संस्कृति ओ सभ्यताके बखारी रलक समाज हो । हम्र पुर्खाओन्के सैडानहन समय सापेक्ष बनाक घोट्लैटी ओ चम्कैटी जाइपर्ठा । अट्वारी नेपालम केल मनाजैना मौलिक टिउहार हो, उहमार फे यहीहन सार्वजनिक रुपम प्रचार प्रसार करपर्ना बा । ओ अट्वारीक बारेम म्वार कुछ बात ढर्ना मौका डेलकमा अप्नहँ धन्यवाद बा ।
