काठमाडौं, अगहन २ गते । थरुहट÷थारुवान संयुक्त संघर्ष समितिके नाउँसे आन्दोलनरत रहल थारु नेताहुक्रनबीच जुंगाके लडाई शुरु हुइल बा । मधेसी नेताहुक्रे मधेस प्रदेशकेलाग वार्ता प्रक्रियामे रहल बेला थारु नेता जिल्ला दौडाहामे बातैं ।
संघर्ष समिति बनाके संघर्षरत रहल थारुहुक्रे कुछ दिनसे सामसुम बातैं । खासकैके कैलालीके टीकापुरमे भदौ ७ गते बरवार घटना घटलपाछे चिमाइलहस रहल थारु आन्दोलन आभिनसम उठे सेकल नै हो । यी विषयमे संघर्ष समितिहे ठोस निर्णय कर्ना म्यान्डेट थारु समुदायके नागरिकहुक्रे देलपरफे संघर्ष समितिके बैठकफे बैठे नै सेकल हो ।
आन्दोलनहे संयुक्तरुपमे आघे बढैना बतैलसेफे नेतालोगबीच फे समन्वय र सम्पर्क हुई नैसेकल कुछ नेतालोग बतैथैं । थारु समुदायके अधिकार सुनिश्चित् कर्नासेफे समुदायके नेता के बन्ना ? बातमे संघर्ष समितिमे रहल नेतालोग अल्झल बातैं ।
थारु सांसदके तरफसे संघर्ष समितिके संयोजक रहल रामजनम चौधरी स्वास्थ्य मन्त्रीके सपथ खाइलपाछे त झन थारु नेता लोगनबीच फुटहस आइल बा । कोई सरकारमे जैना गलत आरोप लगाइतैं कलसे कोई ठीक । एकापसमे टिकाटिप्पणी कर्ती आन्दोलनहे धरमरमे पर्ले बातैं ।
थारु कल्याणकारिणीसभा आन्दोलनके तयारीकेलाग जिल्ला दौडाहामे रहल सभाके सचिवालय सदस्य राजकुमार लेखी बतैथैं । घोषित आन्दोलनअनुसार अगहन ५ गतेसे राजमार्ग केन्द्रीत आन्दोलन शुरु हुइना कहाई लेखीके बा । मने सांसद लोग यी बातमे आभिन जानकारी नैरहल तर्क कर्थैं ।
आन्दोलनके तयारी कर्ना हिसावसे दाङ्के देउखर पुगल थारु नेता लेखी मंगलबार देउखरके गढवामे सभाके क्षेत्रीय अधिवेशन सम्पन्न कर्ले बातैं । ऊ कार्यक्रममे प्रमुख अतिथि रहल लेखी आन्दोलनके तयारी मचामच हुइती रहल बतैथैं । मने ओहे कार्यक्रममे बरियता नैमिलल कहती थारु सांसदलोग कार्यक्रममे उपस्थित नै हुइलैं ।
सांसद योगेन्द्र चौधरीके कहाई अनुसार क्षेत्रीय अधिवेशनमे लेखीहे प्रमुख अतिथि बनाइल पाछे सांसद हुक्रनके अपमान हुइना देखके कोइ सांसद कार्यक्रममे नैगैलैं । जोकी कार्यक्रमके लाग सांसदहुक्रे योगेन्द्र, गंगा थारु, सुशिला चौधरी ओ पार्वता डिसी चौधरीहे समेत निउँता देगिल रहे । सांसद योगेन्द्र कहलैं “सांसदलोग कार्यक्रमकेलाग देउखर पुगलपर पदीय बरियताके ख्याल नैकरल देखके कोई सांसद उपस्थित नैहुइली ।”
सभाके पूर्व महामन्त्रीसमेत रहल लेखी ऊ बातहे अस्वीकार कर्थै । प्रमुख अतिथिके लाग आपनहे महिना दिन आघे निउँता अइलकमे अपने देउखरल गैल बतैथैं ।
बुधबार थरुहट÷थारुवान संयुक्त संघर्ष समितिके क्षेत्रीय भेला देउखरके लमहीमे हुइल बा । ऊ भेलामे थारु सांसदलोग उपस्थित रहलैं । भेलाके प्रमुख अतिथिफे नेता लेखी अपने रहल जानकारी करैलैं । मने योगेन्द्रके कहाई अनुसार ऊ भेलाके प्रमुख अतिथि कोइ नै रहे । नेता लोगनके अस्ते तर्क वितर्कके कारण थारु युवालोग परिसान हुइल बातैं ।
आन्दोलन ओ दवाव कार्यक्रम एकओर बा मने नेता लोग आपन नेतागिरी कर्ना दोसर ओर छेउ टुप्पा नै मिलल हस थारु आन्दोलन रहल कहाई संघर्ष समितिके कुछ सदस्यन्के कहथैं । एक थारु युवा नेता कहलैं “थारु नेता लोगनके जुंगाके लडाई कहिया सम चली ?”
