लखन चौधरी
कैलाली (बसौटी), अगहन ४ गते । कैलालीके ग्रामीण भेगमे स्थानीय किसानहुक्रे डिजल नैपाके हैरान हुइल बातैं । डिजलके लाग ओइने रातभर लाइनमे बैठ्ना बाध्य हुइल बातैं ।
लम्मा समय सुख्खाके कारण डरार फाटल जमिन ओ हिउँदेबाली सिचाई करेक् लाग स्थानीय पेट्रोलपम्पमे किसानहुक्रे डिजलके लाग रातभर लाइनमे बैठ्टी आइल हुइट । गोहुँ बोइकलाग् किसानलोग रासायनिक मलके जैसिन डिजलके लागफे हैरानी खेपतैं ।
कैलालीके गदरिया–६ बेनौलीके स्थानीय लौटनकुमार चौधरी स्थानीय पेट्रोल पम्पमे डिजल अइना सूचना पैटीकिल रातभर अस्रामे बैठ्ती आइल बटैलै । एक दिन पहिलेसे जर्किन लेके लाइनमे बैठ्टी आइल बटुइया उहाँ जम्माजम्मी पाँच सय रुप्या बराबरके तेल पैना सुनैलै । “लाइनमे नैबैठु कलेसे हिउँदे बाली पछगुर जैना चिन्ता, बैठु कलेसे जम्मा पाँच सयके किल तेल मिलट” चौधरी कहलै ।
ओस्तके बसौटी–७ लोहरपुरके स्थानीय रमेश चौधरी फेन तेल अइना खबर सुन्टीकिल सयौंं किसानलोग लाइन बैठ्ती आइल जानकारी देलै । समयमे खेती किसानीके सामान नैमिलके किसानलोग परिसान हुइल उहाँ सेनैलैं ।
जिल्लाके उदासीपुर, बसौटी, गदरिया, उर्मा, हसुलियालगायत गाविसके स्थानीयहुकनके पायकपर्ना पेट्रोल पम्पके रुपमे बसौटीके टेढीमे रहल दक्षिणकाली, उदासीपुरके लौसा रहल शीर्ष आयल ट्रेडिङ ओ हसुलियाके हसुलिया पेट्रोलपम्प बा । जौन पेट्रोलपम्पमे नेपाल आयल निगम क्षेत्रीय कार्यालय धनगढीसे जिल्लाके अन्य पेट्रोलपम्पके तुलनामे एकदम कम मात्रामे डिजेल वितरण हुइथ् ।
टेढीस्थित दक्षिणकाली पम्पके कर्मचारी किसनलाल चौधरी हप्ता÷डेढ हप्तापाछे किल कम परिमाणमे डिजल अइटी रहल बटैलै । उहाँ गैल बुधके तीन हजार लिटर डिजल आइल बटैटी लाइनमे सहभागी किसानहुकनके संख्याहे हेरके पाँचसय रुप्या बराबरके डिजल वितरण करल जनैलैं । एकदमे कम परिमाणमे डिजल वितरण कर्लेसे फेन संयौं किसान खाली जर्किन लेके घर घुम्ना बाध्य रहल उहाँके कहाई बा ।
भारतीय अघोषित नाकाबन्दीके कारण करिब दुई महिनासे पेट्रोलियम आपूर्ति कम मात्रामे आइलपाछे कृषि क्षेत्र धिउर प्रभावित हुइल बा । यी बेला कैलालीके स्थानीय प्रशासन किसानहुकन धिउर प्राथमिकता देना कहलेसे फेन किसानहुक्रे पाई नैसेक्ले हुइटै । ओस्तके पेट्रोलपम्प सञ्चालकहुक्रे कालाबजारी करके आपन चिनजानके मनैन डिजल देटी आइल किसानहुक्रे आरोप लगैथैं ।
