कैलाली (सुख्खड), अगहन ५ गते । कैलालीके घोडाघोडी नगरपालिका कार्यालय लम्मा समयसे हाकिम विहिन बा ।
डेढ महिना आघे नगरपालिकाके कार्यकारी प्रमुख नारायणबहादुर बिष्ट सरुवा होके अन्ते गैलैं । मने हुँकार ठउँमे लावा हाकिम गणेशविक्रम शाही अइना सुनमिल्लसेफे उहाँ आभिनसम उपस्थित हुइल नै हुइात् । कार्यकारी प्रमुख विष्ट कुवाँर २० गते घोडाघोडी नगरपालिकासे सरुवा होके गैल रहिँत् ।
लावा कार्यकारी अधिकृत कार्यालयमे अभिनसम हाजिर हुई नैआइलपाछे सेवाग्राहीहुक्रे धिउर मारमे परल बाटै । नक्सा पास, आर्थिक गतिविधि, विकास निर्माणलगायतके काम हुई नैसेकलपाछे कार्यालयके कामकाज प्रभावित बनल बा ।
घोडाघोडी नगरपालिका–३ के स्थानीय खडक चौधरी कार्यालय प्रमुख नैरहल कारण आपन नक्सा पास कर्ना काम प्रभावित हुइल बटैलै । पहिलेक् हाकिम बिष्टके सरुवापाछे निमित्त कार्यकारी अधिकृत विमल प्रकाश जोशीके भरमे कार्यालय चल्टी आइल बा । निमित्त कार्यकारी अधिकृत जोशी समान्य काम बाहेक महत्वपूर्ण कामकाज प्रभावित हुइल जानकारी देलै । उहाँ दैनिक नक्सा पास, आर्थिक महत्वपूर्ण काम ओ विकास निर्माणके गतिविधि पूर्ण रुपसे ठप्प हुइल स्वीकार कर्लै ।
ओस्तके नगरपालिका कार्यालय प्रमुख गणेशविक्रम शाही समयमे कार्यालयमे उपस्थित नैहुइलपाछे सामाजिक सुरक्षा भत्ता वितरणमे फेन ढिलाई हुइल बा । सामाजिक सुरक्षा भत्ता पाइना एकल महिला, जेष्ठ नागरिक, बालवालिका, लोपोन्मुख सिमान्तकृत राजी, जनजाती, दलित समुदाय सामाजिक सुरक्षा भत्ता पैनासे बन्चित बातैं ।
नगरपालिकासे बैंक प्रणाली मार्फत भत्ता पैना लक्षित वर्गके व्यक्तिगत खातामे रकम हस्तारन्तरण कैना प्रावधान बनैले बा । ऊ प्रणाली अन्तर्गत नपासे सम्बन्धित व्यक्तिके नाउँमे बैंकचेक कट्ना ओ चेकम कार्यालय प्रमुखके हस्ताक्षर अनिवार्य चहना ओरसे सुरक्षा भत्ता वितरणके काम प्रभावित हुइल हो ।
