कहाँगिल अगहन, थारुनके रीति ?
हेरागिल हेर्तीहेर्ती, नेन्धरके मिति ??
भुलेलग्ली संसकृति, हेर्तीहेर्ती हम्रे ।
धेरजन्ना होकेहोकी, नैसेकली सम्ह्रे ।।१।।
ढिक्रीबेचे जाइदुल्ही नातनके घर ।
निसफिक्री होकेबैठी नैरहिन डर ।।
सबओर स्वतन्त्रता मनलग्ना दिन ।
इच्छाभर ढिक्रीबेची नैरहिन ऋन ।।२।।
फागुनमे भोजकरी अगहनमे दुल्हा ।
दुल्हनिया चलगिली नैबरल चुल्हा ।।
अस्रालग्ना मायासँच्ना दुलहक पाला ।
दुल्हनिया बट्याहेरी नेन्धरके माला ।।३।।
मायाप्रेम चोखारहे सुहाउन लग्ना ।
आजहस कहाँरहे देख्तीदेख्ती ठग्ना ।।
दुल्हाकरैं धेरमाया दुल्हनिया पाके ।
दुल्हनिया खुशीहुई दुल्हकथे जाके ।।४।।
दाइबाबा खुशीहोके पतोहिया लन्थैं ।
दुल्हाजुन मनमने अंग्रीधेर गन्थैं ।।
फागुनमे भोजकर्ना अगहन्के अस्या ।
हेरेपर्ना दुल्हादुल्ही नौमहिना बट्या ।।५।।
सवाई छन्द (४ + ४ + ४ + २ = १४ अक्षर)
