लखन चौधरी
गदरिया (कैलाली), अगहन १९ गते । आपन घरक्लाग किल आलुक् खेती कर्ती आइल कैलाली गदरिया–९ सामरचौराके स्थानीयहुक्रे आबभर व्यवसायिक आलुखेतीमे लागल बाटै ।
कैलाली आलु खेतीके धिउर सम्भावना रहलेसे फेन स्थानीयस्तरमे उत्पादित आलु दुई महिना फेन नैपुग्ना ओ बाँकी समय भारतसे आयातित आलुसे गुजारा हुइना हुइलपाछे कुछ पूर्तिकरे सेकजाइठ कि कना उदेश्यसे सामरचौराके स्थानीयहुक्रे आलु खेतीप्रति आकर्षित हुइल हुइट् । सामरचौराके स्थानीयहुक्रे हाल २४ विघा क्षेत्रफलमे व्यवसायिक आलुखेती कर्ती आइल बाटै ।
स्थानीय परिश्रम कृषि सहकारी संस्थाके सचिव रामसमझ चौधरी जिल्ला कृषि विकास कार्यालयसे सामरचौराके साथे गदरिया गाविसके जमिन आलु खेतीके लाग उपयुक्त रहल घोषणा करलपाछे व्यवसायिक आलु खेतीमे अग्रसर हुइल बटैलै । सचिव चौधरीके अनुसार गाउँके ४७ जाने किसानहुक्रे पाँच कट्ठासे लेके एक विघा क्षेत्रफलमे आलुखेतीके सुरुवात कर्ले बाटै ।
औरे खेतीसे तुलनात्मक रुपमे आलुखेतीमे मुनाफा हुइना सम्भावना रहलओरसे फेन स्थानीयहुक्रे औरे खेती छोरके आलुखेतीमे लागल बतैथैं । स्थानीय जागुराम चौधरी गोहु खेती छोरके आलु खेतीमे लागल जानकारी देलै । औरे खेतीमे जत्रा लगानी लगाके फेन सोचल मूल्य नाई मिलठ,’उहाँ आघे कहलै–‘आलुमे कुछ लगानी लग्लेसे फेन गोहुलगायत बालीके खेतीके तुलनामे आलु खेतीमे धिउर मुनाफा बा ।’
नेपाल सरकारके साना तथा मझौला कृषक आयस्तर बृद्धि आयोजना (रिज्म) के सहयोग पाइलपाछे ते झने स्थानीय कृषकहुक्रे हौसल बाटै । स्थानीय सहकारीमार्फत रिज्म आयोजनासे दुई बरषके लाग आलु खेतीमे सहयोग हुइलपाछे अप्नेहुकनके सोचल सपना पुरा हुइटी रहल बटैठै सहकारीके अध्यक्ष रामसुन्दर चौधरी ।
ऊ सहकारीके अनुसार रिज्म आयोजनाके ३५ लाख ६१ हजार ५९९ ओ सहकारी स्वयमके ३४ लाख ८९ लाख ४६ रुप्या करके जम्मा ७० लाख ४० हजार ६४६ रुप्याके संयुक्त लगानीमे आलु खेती हुइटी रहल ओइने बतैथैं । आयोजनामार्फत सहकारीहे भवन निर्माणके लाग बजेट, बोरिङ चारथान, पावर टेलर ट्याक्टर ६ थान, पम्पसेट ४ थान, स्प्रे ट्यांकी २४ थान, सिलिङ मेसिन एक थान, तराजु एक थानलगायत उपकरण उपलब्ध हुइल बा ।
ओस्तके आलु खेती सम्बन्धी आधारभुत तालिम संगे रिज्मसे २८० क्वीन्टल कार्डिनल जातके आलुक् बिया, ३५ क्वीन्टल डिएपी, २४ क्वीन्टल युरिया,१६ किलो पोटास मलके फेन सहयोग हुइल सहकारी जनैले बा ।
आलुके विउ उत्पादनमे लागल अधिकांश कृषकहुक्रे आलु खेती सप्रल देखके अब्बाहीसे अइना सिजनमे आलु खेती विस्तार कर्ना योजना समेत बनैटी रहल सुनैलैं ।
