देउखर, माघ २६ गते । थारू साहित्यिक त्रैमासिक लावा डग्गरके सातौं बार्षिकोत्सव गोबरडिहा–६ महदेवामे साहित्यिक तथा सांस्कृतिक कार्यक्रम कैके मनागैल् बा ।
माघ २३ गते हुइल कार्यक्रममे बर्का पहुना सांसद योगेन्द्र चौधरी कार्यक्रमे उद्घाटन मन्तव्यमे कलाँ– मेरमेरिक प्रदेशमे बाँट्के थारूनके उँप्पर शासन कर्ना नियत शासकलोगनके बटिन्, उहेसे थारू राजनीतिक रुपमे सचेत हुइपर्ना बा । कञ्चनपुरसे चितवनसम थरुहट प्रदेश हुइना चाही । डोसर प्रसंगमे उहाँ कलाँ–थारू भाषाके संरक्षणके लग प्राथमिक तहमे पठन–पाठनके प्रक्रिया सुरु कर्ना जरुरी बा ।
कार्यक्रममे थारू तथा नेपाली भाषा साहित्यमे योगदान पुगैलक कैह्के बर्दियाके सुशील चौधरीहे नगद दुई हजार रुपिया ओ प्रमाण–पत्र सहित ‘लावा डग्गर थारू साहित्य पुरस्कार–२०७२’ डेगैल रहे । ओस्टक गोचालीके संस्थापक मन्से एक भगवतीप्रसाद चौधरी ओ सखिया नाचके संरक्षणमे लागल कहटी लालीगुराँस युवा क्लब महदेवाहे सम्मानित कैगैल् रहे ।
पुरस्कृत ओ सम्मानितके बारेम साहित्यकार कृष्णराज सर्वहारी प्रकाश पर्ले रहिंट् । ‘लावा डग्गर थारू साहित्य पुरस्कार’ पहिला फेरा प्रदान कैगैलक हो । यी पुरस्कारके स्थापना सहित्यकार कृष्णराज सर्वहारी ओ छविलाल कोपिला कर्लक हुइट् । पुरस्कृत व्यक्तित्व सुशील चौधरी पुरस्कार रकम अक्षयकोषके लग फिर्ता कर्टी थप तीन हजार सहित पाँच हजार रुपिया डेना घोषणा कर्लां । ओस्टक सांसद योगेन्द्र चौधरी सांसद विकास कोषसे पुरस्कार अक्षयकोषके लग एक लाख रुपिया डेना वाचा कर्लां ।
कार्यक्रममे ठाकुर अकेला, सागर कुश्मी, सीताराम चौधरी, आर.के. स्वागत, रामप्रकाश चौधरी, हिराकुमारी चौधरी, बिष्णा कुसुम्हियाँ, राजु चौधरी, बालगोविन्द चौधरी, लाछु डंगौरा लगायत कविलोग आ–आपन समसमायिक रचना वाचन कर्ले रहिंट् । कार्यक्रममे भगवतीप्रसाद चौधरी गोचाली प्रकाशनके शुरुवातके अनुभव सुनैले रहिंट् । ओस्टक लालीगुराँस युवा क्लबके सखिया नाच दर्शकनेके मन मोह्ले रहे ।
थारू भाषा तथा साहित्य संरक्षण मञ्चके अध्यक्ष छविलाल कोपिलाके अध्यक्षतामे कार्यक्रम हुइल रहे ।
सगुन स्मृति पुरस्कार कोपिलाहे
२०७२ सालके सगुन स्मृति पुरस्कार साहित्यकार छविलाल कोपिलाहे डेगैल बा । थारू भाषाके पहिला पत्रिका ‘गोचाली’के संस्थापक मन्से एक सगुनलाल चौधरीके नाउँमे सगुन स्मृति प्रतिष्ठान नेपाल, बर्दिया ऊ पुरस्कार स्थापना कैले बा ।
थारू तथा नेपाली भाषाके प्रगतिशील साहित्यमे योगदान पुगैलक कैह्के कोपिलाहे नगद पाँच हजार रुपिया ओ प्रमाण–पत्र सहित ‘सगुन स्मृति पुरस्कार–२०७२’ डेगैल रहे ।
कार्यक्रममे थारू नाच प्रतियोगिता फेन कैगैल रहे । प्रतियोगितामे असृवि सांस्कृतिक परिवार बेल्भार पहिला, थारू सांस्कृतिक मञ्च कतर्निया दुस्रा, सहयोगी बचत समुह शोभानगर तिस्रा हुइलाँ । ओस्टक हिमाली आमा समुह सेम्रहवा ओ सुबोध समुह शोभानगर सान्त्वना हुइलाँ । बर्का पहुना साहित्यकार कृष्णराज सर्वहारी पुरस्कृत कोपिला ओ नाच टोलीहे पुरस्कार प्रदान कैले रहिंट् ।
