लखन चौधरी
धनगढी, १४ चैत । धनगढी उपमहानगरपालिका ५ जाई गाउँबासीहुक्रे देवथन्वाहे व्यवस्थित कर्नामे जुटल बाटैं । निर्माण हुइतिरहल थनुवा व्यवस्थापनके लाग स्थानीयहुक्रे जुर्मुराइल हुइँट् ।
यहेक्रममे उचित व्यवस्थापनके लाग गाउँभरीक मनै समूहिक रुपमे ढुरहेरीमे फगुवैना काम फेन कर्ले बाटैं । बिगतके बरषमे देवतन फगवइना काम गाउँक् भलमन्सा, चौकीदार ओ गुरुवासे किल हुइटी अइलेसे फेन यी बरष भर गाउँभरिक मनै बाजागाजासहित थनुवामे फागुवइना काम कर्ले बाटै ।
भलमन्सा कुलबीर चौधरीके अनुसार थनुवा बनाइक लाग सरकारी बजेट नाइ हो, मने थनुवा बनैना जरुरी बा, उहेमारे ओइसिन कैगिल हो । साथे उहाँ थनुवा निर्माणके लाग घरौरा पाँचसयके दरसे रुपिया संकलन करटी रहल बटैटी कहलै–‘संकलन करके फेन रकम अपुग हुइल बा, असौंसे गाउँमे फगवैना काम फेन शुरु कर्ले बाटी, यिहिसे हमार चालचलनके सम्बद्र्धन फेन हुइना हुइल बा ।’
पूर्व भलमन्सा बिनय चौधरी थनुवा संरक्षणके काम सराहनीय रहलओरसे सक्कु पक्षसे सहयोग फेन मिल्टी रहल बटैलै । ‘यी काम बहुत मजा हो, मै थनवाहे व्यवस्थित करेक लाग पुरापुर लागल बाटुँ’ उहाँ कहलै । पूर्व भलमन्सा चौधरी थनुवा निर्माणके लाग ५ हजार सहयोग कर्ना फेन प्रतिवद्धता जनैले बाटै ।
‘यी काम बहुत मजा हो, मै थनवाहे व्यवस्थित करेक लाग पुरापुर लागल बाटुँ’
ओस्तके गाउँक बुद्धिजीवी गुरुप्रसाद चौधरी असौंक धुरहेरी बहुत रमाइलो ओ व्यवस्थित हुइल बटैलै । उहाँ अइना साल फेन थप व्यवस्थित बनैना प्रतिबद्धता जाहेर कर्लैं ।
ओस्तेके थारु नागरिक समाज कैलालीके संयोजक दिलबहादुर चौधरी फेन असौंक जाईंक ढुरहेरी व्यवस्थित रहल बटैलै । ‘बिगतमे अपने अपने चूपचाप होरी खेल्ना जाईक किसान, असौं सँगे जुर्रामुर्रा होके नच्ना, गैना, होरी खेल्ना बहुत खुशीक बात हो, उहाँ कहलैं–‘जौन गाउँ सल्लाहपर चलठ, ऊ गाउँक प्रगतिहे कोइनाई रोकेसेकठ ।’
नगरपालिकाके सहयोगमे दुई बरष पहिले जाली गाउँके बनल थनवाके झ्याल, ढोका लग्ना अभिन बाँकी बा । ओस्तके, आँजरपाँजर लगाइल बाउण्डरी (बेंधवा) कुछ विकास विरोधी समूहसे भट्काइल स्थानीयहुक्रे बटैले बाटै । सामुहिकतामे बल रहल ओ समाजमे काम कर्नाफे सहज हुईना बुझाई गाउँबासीनक् बा ।
