लखन चौधरी
धनगढी, जेठ १ गते । थारु समुदायभित्तर रहल दहित थारूहुकनके कैलाली जिल्ला भेला शनिच्चरके धनगढीमे सम्पन्न हुइल बा । सक्कु दहित गोट्यार एक हुई मूल नाराकेसाथ ऊ दहित गोट्यार जिल्ला भेला हुइल हो ।
धनगढी दहित गोट्यार उपमहानगरिपालिकाके अध्यक्ष दलबहादुर दहितके घरगोसियाईमे हुइल भेलाके बरका पहुना भागवतदास दहित रहिट । भेलामे धनगढी उपमहानगरपालिकाके दहित सल्लाहकार रामफल दहित, चौधरीप्रसाद चौधरी, महावीर दहित, धनबहादुर दहित, गर्भुराम ग्वालवंशी दहित, हरिमोहन दहित, दिनेश दहितलगायत दहित बुद्धिजीवीहुक्रे बोलल रहिट ।
बोलुइया वक्ताहुक्रे दहित–दहितबीचके वैवाहिक सम्बन्ध रोकक् पर्नामे विशेष जोड देहल रहिट । अप्ने गोत्रभित्तर वैवाहिक सम्बन्ध कायम कर्लेसे हाड नाताके हिसाव तथा स्वास्थ्यके हिसाबसे ओ सम्बन्धके हिसाबसे फेन समाजमे नकारात्मक प्रभाव पर्ना हुइलओरसे वैवाहिक सम्बन्ध नैकरेक पर्नामे जोड देहल हुइट ।
ओस्तके वक्ताहुक्रे तमान भेला तथा सम्मेलनमे किल सीमित नैहोके अइना दिनमे योजनावद्ध रुपमे संस्थागत होके आघे बह्रेक पर्ना बटाइल रहिट । दहित थारुहुकनके पहिचान, चाल चलन, रीतिरिवाज, संस्कारहे लिपीवद्ध करेक पर्ना फेन उहाँहुकनके कहाई रहे ।
