राम दहित
धनगढी, २६ जेठ । थरुहट÷थारुवान आन्दोलनके क्रममे घटल टीकापुर घटनाके अभियोगमे जेल चलान करुवा पाइल कैदीबन्दीहुकनके परिवारजनहुक्रे पाँचबुँदे माग रख्टी मंगरके रोज जिल्ला प्रशासन कार्यालय कैलाली मार्फत् प्रधानमन्त्री केपी शर्मा ओलीहे ज्ञापनपत्र बुझैले बाटै ।
घटनामे संलग्न नैरहलेसे फेन झुठा मुद्दा लगाके जेल चलान करल ओरसे तत्काल रिहाई हुइकपर्ना लगायत माग राख्टी प्रमुख जिल्ला अधिकारी अब्दुल कलाम खाँ मार्फत प्रधानमन्त्रीहे ज्ञापन पत्र बुझाइल हुइट ।
पुर्पक्षके लाग जेल चलान करल २५ कैदीबन्दी हुकनके परिवारजनहुक्रे संयुक्तरुपमे आपन गुनासो तथा पीडा प्रमुख जिल्ला अधिकारी खाँहे राख्टी ज्ञापनपत्र बुझाइल रहिट ।
्प्रधानमन्त्रीहे बझाइल पत्रमे घटनामे संलग्न रहल कहिके पुर्पक्षके लाग जेल चलान करल राजबन्दीहुकन बिनासर्त तत्काल रिहा करेक पर्ना, राजबन्दी परिवारहुकन हालसमके क्षतिपूर्तिके व्यवस्था करेक पर्ना, भदौं ८ गते थारू समुदायके घर, व्यवसाय लुटपाट, तोडफोड, आगजनी करुइया अपराधीहुकनहे तत्काल कारवाही करेक पर्ना, ८ गते हुइल सक्कु क्षतिपूर्ति तत्काल व्यवस्थापन करेक पर्ना, सरकार मातहतके सुरक्षा संयन्त्रसे निष्पक्ष व्यवहार करेक पर्ना माग रख्ले बातैं ।
राजबन्दी जीवन बिटुईया हुक्रनके परिवार प्रहरी प्रशासनसे पूर्वाग्राही ढंगसे थारु समुदाय हेरल, आपन अधिकार ओ न्यायके लाग आन्दोलन कर्लेसे राज्य झन अन्यायमे पारल दुःख व्यक्त करल रहिट । आन्दोलनमे संलग्न नैरहल अवस्थामे फेन झुठा मुद्दा लगाके राज्यसे जेलचलान करलमे आक्रोश पोख्टी उहाँहुक्रनहे तत्काल रिहाई हुइक पर्ना माग राखल रहिट ।
साथे उहाँहुक्रे भदौ ८ गते थारुहुकनके घरमे तोडफोड तथा आगजनि करुइयाहुक्रे आजफेन खुलेआम घुम्लेसेफेन कौनो कारवाही नैहुइना कलेक कानूनी राज्यके उपहास राज्यपक्षसे हुइल बटैलै ।
ज्ञापनपत्र बुझ्टी प्रजिअ खाँ अप्ने गम्भिरतापूर्वक टीकापुर घटनाहे लेहल बटैलै । यहाँ प्रस्तुत हुइल मागहे तत्काल आपन उप्परके निकायहे पठैना फेन उहाँ प्रतिवद्धता जनैलैं ।
