राम दहित
धनगढी, ०१ असार । धनगढी उपमहानगरपालिका–१६ (साविक उर्मा–४) रामपुरमे मंगरसे बेहडाबाबा मेला सुरु हुइल बा । कलेसे आज
बुधके रोज गंगा दशहरा पूजा हुईल ओरसे मन्दिरमे श्रद्र्धालुभक्तजनके घुईचो लागल बा ।
धनगढी उप–महानगरपालिका कार्यालय ओ स्थानीय बेहडाबाबा मन्दिर व्यवस्थापन सेवा समितिके आयोजना यी साल मेला लागल हो । मेलामे हरेक साल नेपाल लगायत भारतके तमान स्थानसे मेला खेलुईया श्रद्र्धालुभक्तजन अइठै । मेलामे दर्शनके लाग तमान स्थानसे दर्शनार्थीहुकनके जम्घट बा ।
शुद्ध तन, मनसे पूजा कर्लेसे सोचल मनोकांक्षा पुरा हुइना जनविश्वास रहटी आइल बा । मेला व्यवस्थापन समिति अध्यक्ष खेम चन्दकेअनुसार मन्दिरमे पूजाआजाके लाग लाइन व्यवस्थित रहल जनैले बाटै । मेलामे साढे पाँचसय व्यापारिकस्टल रहल जनागिल बा ।
यी साल मेलामे खानेपानीके व्यवस्था समेत कैगिल बा । खानेपानीके लाग एक आर्टीजन बोरिङ ओ ४५ ठो नल्काके व्यवस्था करल समितिके अध्यक्ष चन्द जानकारी करैलै । यहेबीच मेला आगन्तुक तथा दर्शनार्थीहुकनके सेवाहे मध्येनजर करके धनगढीसे मेलासम बस सञ्चालन कैगिल बा ।
बेहडाबाबा मन्दिर सुदूर पश्चिमाञ्चल विकास क्षेत्रके किल नाई नेपालके चर्चित मन्दिर मध्येके एक मन्दिर हो । जहाँ दर्शनार्थीहुक्रे आपन लाग पत्नीलाभ, पुत्रलाभ, धनलाभलगायत धिउर मनोकांक्षा बोकके अइठैं ।
स्थानीय बुद्धिजीवीहुकनके अनुसार परापूर्वकालमे शिव लिंग अप्नही उत्पत्ति हुइलपाछे उहाँ मन्दिर स्थापना करल मन्दिर पूजारी तथा बयोबृद्ध हुकनके कहाई बा । सुरुवाती अवस्थामे छोटमोट बिल्गैना शिव लिंग हाल बह्रट–बह्रट सात÷आठ फिट ढेंग हुसेकल बा । बेहडा बाबा मन्दिर कैलाली सदरमुकाम धनगढी बजारसे करिब १० किलोमिटर पूरुव ओ पूर्व–पश्चिम महेन्द्र राजमार्गके चौमाला बजारसे करिब ६ किलोमिटर दक्षिणमे अवस्थित बा ।
यिहेबीच सकारे जोरसे पानी परके बेहडाबाबा बजार खेलुईया हुक्रनहे बिजोग बा । पानी परके डगरघाटमे हिलाकिचा, लदियामे बाह्र आके दर्शनार्थीहुक्रनहे आवातजावतमे समस्या परल बा । ओस्तके पानीसे व्यापारी हुक्रनके भुजा मिठाई भिजाके व्यापारमे समस्या पारदेले बा । करिब २ घण्टासम परल पानीसे दोकानमे पानी पैठके व्यापारी हुक्रनके सरसमान, भुजामिठाई भिजाईल हो । यिहीसे व्यापारीहुक्रे आपन व्यपारव्यवसायमे घाटा हुईना बटैले बाटै ।
