राम दहित
रतनपुर, असार ९ गते । सामान्यतः स्कुल कहटी किल झट्से सक्कुहुनके मानसपटलमे विद्यालय, पाठशाला, शिक्षालय, शिक्षाआर्जन कैना पवित्र स्थान कहिके बुझजाईठ् । मने उहे शिक्षा आर्जन कैना पवित्र स्थान बर्खाही झोपडी बनल बा ।
रतनपुर गाविस वडा नं. ४, ८ ओ ९ भुईयाँफाँटा गाउँमे रहल श्री राष्ट्रिय माध्यमिक विद्यालय विगत ४÷५ बरष यहोर बर्खाके समयमे भुईयाँफाँटा गाउँबासीनके झोपडी बने पुगल बा ।
वि.सं. २०६५ साल असोज ४ गते भिषण पानीसंगे आईल बड्काबाढसे भुईयाँफाँटाके पुरागाउँ विस्थापित हुईलपाछे स्कुल झोपडीमे परिणत हुईल हो । बर्खाही समयमे भुईयाँफाँटाके गाउँबासीहुक्रे करिब ४÷५ बरष यहोर स्कूलमे आपन डेरासहित खेतीपाती करटी आईल बाटै ।
बड्काबाढ्से गाउँघरक किसानहुक्रनके धनसम्पत्ति लगायत गुईडाँगर पुहाके लैगिल पाछे पुरागाउँ विस्थापित हुइपुगल सरस्वती युवा जागरण क्लवके अध्यक्ष चेतराम चौधरी जानकारी करैलै । उहाँ कहलै–‘बड्काबाढसे गाउँक सक्कु किसानन्के घरबार लगायत गैयाभैंस, छेगरीभेडी पुहाके लैगिल मने मानवीय क्षतिभर नाई हुईल ।
उहाँ आगे कहलै– ‘का करही विचारन यहाँ आब न मजा घर हो न टे द्वार, रहल स्कूलमे घामपानीसे बचकलाग गाउँक किसान ओत लागल बाटै ।’ स्कूलमे फेन पह्राई नाई हुईठ्, ओस्ते रहलसे बरु किसानहुक्रनहे ओत टे देलेबा अध्यक्ष चौधरी कहलै ।
‘का करही विचारन यहाँ आब न मजा घर हो न टे द्वार, रहल स्कूलमे घामपानीसे बचकलाग गाउँक किसान ओत लागल बाटै ।’ स्कूलमे फेन पह्राई नाई हुईठ्, ओस्ते रहलसे बरु किसानहुक्रनहे ओत टे देलेबा अध्यक्ष चौधरी कहलै ।
बर्खाबुँदीक समय कब आँधीपानी आई कब बाढ, न यहाँ मजा घरहो न टे द्वार’ कहाँ जाके रहना होवई स्थानीय फुलकुमारी चौधरी कहली । यिहीसे बचकलाग हुईलेसे फेन अपनेहुक्रे स्कुलहे बर्खाके समयमे बासस्थान बनाईल बटैली । मने उहाँ स्कूलके भौतिक संरचनामे कौनो क्षति नाई पुगाईल बटैली । उहाँ कहली झन हमार टे स्कूलके हेरचाह करे हसक होजाईठ् ।
गाउँ विस्थापित होके गैलमे फेन करिब छ बर्षसम पुराने गाउँ (पुरान बस्ती)मे स्कूल सञ्चालन करल प्रधानाध्यपक देशराज चौधरी बटैलै । उहाँ प्रावि कक्षा नयाँबस्तीमे सञ्चालन हुइतीरहल ओ कक्षा ६ से १० सम पुरानबस्तीमे सञ्चालन करल बटैलै ।
उहाँ कहलै–‘हिउँदमे टे कुछ नाई समस्या रहे विद्यार्थीनके लाग, मने बर्षातके समयमे कबी लदिया कबी कटैनीमे बाढ आके विद्यार्थीहुक्रनहे पह्रे अईना जैनामे समस्या हुईल ओरसे सक्कु कक्षा नयाँबस्तीमे स्थान्तरण करल बटैलै ।’
यिहीसे विद्यालयहे ५÷६ करोडसे धेउरके घाटा लागल प्रअ चौधरी बटैलै । स्कूलके भौतिक संरचनामे २ कोठाके दुई तल्ले भवन सहितके सातठो पक्की भवनके १७ कोठा रहल प्रअ चौधरी बटैलै ।
मने प्रअ चौधरी नयाँ बस्तीमे जिल्ला शिक्षा कार्यालय कैलालीसे तीनकोठे पक्की भवन निर्माण होसेकल जनैलै । साथे जिल्ला विकास समिति कार्यालय कैलालीसे २ कोठे पक्की भवनके जग दरना काम निम्जल, फाया नेपाल ओ मर्सीकोर नेपालके आर्थिक सहयोगमे खानेपानीसहित चर्पी निमार्ण हुईल प्रअ देशराज चौधरी बटैलै ।
