राम दहित
बसौटी, असार १४ गते । बसौटी गाविस वडा नं. ५ बिचैपुर स्थित कटैनी लदियामे झोलुङगेपुल निर्माण हुईलपाछे यहाँके स्थानीयहुक्रनके दैनिकीमे सहजता हुईल बा ।
कटैनी लदियामे झोलुङगेपुल निर्माण हुईलपाछे आपनहे स्कूल जैना सजिल हुईल श्री राष्ट्रिय उच्च माध्यमिक विद्यालय कक्षा ९ मे अध्ययनरत विद्यार्थी कल्पना शर्मा बटैली ।
उहाँ वर्खाके समय कटैनीमे बाढ आइल बेला स्कूलके पह्राई छोड्नाके संगे कबीकाल परीक्षा फेन छोड्ना बाध्य हुईल विगतके भोगल समस्या सुनैटी कहली–‘बर्खाके बेला कटैनीमे बाढ आके मोर जस्ते तमान विद्यार्थी संघरियाहुक्रे आपन पह्राई छोड्नाके संगे आपन परीक्षामे छोड्ना बाध्य हुईल रहिट ।’
मने यी झोलुङगे पुल निर्माण हुईल पाछे यी साल हम्रहीन पह्रेजैना कौनो समस्या नाई परल हो । कटैनी लदियामे जत्रा बाढ अईलेसे फेन यी साल पह्राई फेन नाई छुटल हो कलेसे अब्बे चल्टीरहल पहिल त्रैमासिक परीक्षा फेन नाई छुटल हो उहाँ कहली । कल्पनाके घर वडा नं. ८ रामपुर गाउँ कटैनीके उपार परठ् ।
ओस्तके झोलुङगेपुल निर्माण हुईलपाछे आपन खेतीपातीमे धेउरसे धेउर सुविस्ता हुईल वडा नं. ५ उजलीसेमरके कृषक ज्ञानबहादुर चौधरी बटैलै । हिउदके समयमे टे ओईसीन कुछ अप्थ्यारो नाइ परे । ईपारसे उपार जैना फेन कौनो समस्या नाई रहे ।’
मनो बर्खाके बेला खेतुवा लगैनासे लेके हरेक काममे समस्या पर्ना कृषक चौधरी बटैलै ।’ कृषक चौधरी झोलुङगेपुल निर्माणसे यी साल आपन बर्खेखेती फेन हाली ओराईल जनैलै । उहाँ कहलै–‘आने साल एक डेढ महिना लग्ना खेती यी साल करिव २० दिनमे सेके लागल बटैलै ।’ चौधरी आगे कहलै– ‘मोर सक्कु खेती कटैनीके उपार बावै । आनेसाल कटैनीमे बाढके आके अँठ्वार दिनसम टे हर्जा होजाए ।’
यी सालटे बाढ आये चाहे बाढ्के बाबा अईलेसे फेन आपन खेती नाई रुकल बटैटी खेतुवा फेन हाली सेकलमे खुशी समेत व्यक्त करलै कृषक चौधरी ।
ओस्तके कटैनीमे पुल नाईहोके विगतमे धेउर समस्या भोगल बटैठै श्री राष्ट्रिय उच्च माध्यमिक विद्यालय व्यवस्थापन समितिके अध्यक्ष मनिराज शर्मा । उहाँ विद्यार्थीहुक्रे विद्यालय जाईबर होए या विरामीहुक्रे आपन स्वास्थय चेकजाँच कराई जाईबर कटैनी लदिया धेउर दुःख देहल सुनैलै ।
बर्खाके वेला लाउ टरेबर बहुटजे अकालमे ज्यान समेत गुमाई पुगल बटैटी अध्यक्ष शर्मा पुल निर्माणसे यहाँके सर्वसाधारण लगायत अन्य गाउँठाउँके व्यक्तिहुक्रनहे समेत फाईदा पुगल बटैलै ।
पुल निर्माण हुईल पाछे बसौटी गाविस वडा नं. २, ५ ओ ८ के एक हजार ५६ घरधुरीके सात हजार एक सय ६७ जने लाभान्वित हुईनाके साथे हसुलिया वडा नं. ७ के गाउँवासीहुक्रनहे फेन प्रत्यक्ष लाभान्वित हुईल झोलुङगे पुल निर्माण समितिके अध्यक्ष डबल बहादुर ठकुल्ला जानकारी देलै ।
कूल ७१.८० मिटर लम्बाई रहल पुलके लागत अनुमान ४९ लाख ५३ हजार सात सय ८३ रहल मने पुलके लागत अनुमानसे डेढ लाख धेउर लागत लागल अध्यक्ष ठकुल्ला बटैलै ।
अध्यक्ष ठकुल्ला जिल्ला विकास समितिसे नगद एकलाख ४८ हजार ६१३, बसौटी गाविससे नगद एक लाख ४८ हजार ६१३, समुदायसे करिब एक लाख बराबरके जनश्रमदान, स्वाप नेपालसे नगदसहित ग्याविन तार, सिमेन्ट, फलामे छड, स्टील पार्ट्स कैके ४३ लाख ५३ हजार ओ वस्तुगत ओर लठ्ठा, बुलडग, ग्रिप्स, धिम्वलके दुई लाख लाख ४४ हजार बराबरके सहयोगमे पुल निर्माण सम्पन्न हुईल जानकारी करैलै ।
साथे उहाँ २०७२ असार २ गते शिलान्याश हुईल पुल २०७३ असार ४ गते पूलके विधिवत उद्घाटन स्थानीय विकास अधिकारी केशव प्रसाद विमलीसे हुईल जानकारी देलै ।
