राम दहित
पवेरा, असार १७ गते । आपन जीवनके करीब छ दशकसम दीया, टुक्कीके मलिन ओजरारमे जीवन व्यतीत् कर्ती आईल रामपति कुमाल सोलारके प्लग (बटन) दाबेबर झस्कल रही ।
सलाईक काँटी हरदम घोटके दीयाबाटी सुन्गाईल रामपति कुमाल बटन थिचके बत्ती बारेबेर झस्कल बटैली । कबु देखल ना सुनल कहाँ दबलेसे कहाँ बर्ना, प्यात्त बोल्टी किल झ्वाकसे सैलघर ओजरार हुईल टे मै अईया ¤ कहटी झसक् मारल रहुँ, रामपति कुमाल कहली ।’
जीवनमे एकचो फेन विद्युत न टे सोलार बत्ती देखल कुमाल आपन घरमे सोलार लगाईलमे सपना देखल हस लागल सुनैली । सोलार जडानसे रातके जुग–जुग बरल दियासे मलिन ओजरार रहल घर आजकाल झक्से ओजरार हुईलमे कुमाल दंग हुईल बाटी ।
यहोर रामपतिके गोसिया भरठु कुमाल फेन घरमे सोलार जडानसे बहुट खुशी हुईल बाटै । भरठु सोलार जडानसे आपन घरपरिवारहे बहुट सुविस्ता हुईल बटैलै । घरमे तीनठो सोलार बत्ती लगाईल भरठु एकठो घरक भित्तर, एकठो अंगनामे ओ एकठो डगरा ओर लगाईल देखैटी रातबिरात झारापिसाव करे उठ्ना सजिल हुईल बटैलै ।
उहाँ जानेजुकुर हुईलठनसे औरे घरक छेग्रहुवा भेरहुवा हुईटी २५ बरषसम अन्धकारमे बिताईल कमैया जीवन भरठु घरमे सोलारके ओजरार आईलमे खुशी बाटै ।
उहाँ जानेजुकुर हुईलठनसे औरे घरक छेग्रहुवा भेरहुवा हुईटी २५ बरषसम अन्धकारमे बिताईल कमैया जीवन भरठु घरमे सोलारके ओजरार आईलमे खुशी बाटै ।
गाउँमे सोलार जडानसे चुक अराईलहस अन्धार रहल गाउँ आजकाल रातके ओज्रार रहल बटैठी औरे मुक्त कमलरी कमला चौधरी । सोलार जडानसे मुक्त कमैया शिविरके मुक्तकमैया परिवारहे फाईदा टे हुईल बा नै मोर फेन छोटमोट व्यापारहे फाईदा हुईल मुक्तकमलरी चौधरी बटैली ।
उहाँ आगे कहली–‘पहिले अन्धार हुई लग्टी किल पसल बन्द करे परना अवस्था रहे मने आब ओईसीन नाई हो रातसम खोलके बैठल रठँु । यिहीसे मोर व्यापारमे फाईदा पुगल बा ।’
जिल्ला विकास समिति कैलाली अन्तर्गत नेपाल जलवायु परिवर्तन अनुकुलन कार्यक्रम (लापा) के सहयोगमे पवेरा गाविससे वन संरक्षण करी, वैकल्पिक उर्जाके प्रयोग करी, खडेरी सहना ओ खेती प्रविधी प्रयोग करी, जलवायु परिवर्तनके नकरात्मक असरसे बचक लाग आजसे अनुकुलन क्षमता विकास करी’ सहितके नारा लिखल सोलार गाविसके वडा नं. ७ सपना शिविरके ३६ मुक्त कमैया परिवारहे वितरण करगैल बा ।
गाविसके अतिविपन्न ओ विद्युतके पहुँचसे दुर रहल घर परिवार लगायत मुक्त कमैया परिवारहे गाविससे करिब चार लाख बराबरके ५२ थान सोलार वितरण करल पवेरा गाविस सचिव बलराम चौधरी जानकारी करैलै । गाविसके सपना शिविरमे कुल ४५ घरधुरी रहल मुक्तकमैया घरपरिवारहे गैल बरष २५ थान ओ यी साल ११ थान सोलार वितरण करल सचिव चौधरी जानकारी करैलै ।
ओस्तके गाविसके अतिविपन्न ओ विद्युतके पहुँचसे दुर रहल घरपरिवारहे मनकापुर तीन थान, बन्दरगौरी दुई थान, बैजपुर सात थान, सडकपुर चार थान, गोवरैला नौ थान, पवेरा चार थान, जबदहुवा चार थान, विसनपुर एक थान, बड्का पलिया चार थान सहित गाविसके सक्कु वडामे सोलार वितरण करल समेत सचिव चौधरी जानकारी देलै ।
