राम दहित
धनगढी, असार २८ गते । धनगढी उपमहानगरपालिका–२ स्थित चन्दन टाकिज सिनेमाहल सिल कैगिल बा । लम्मा समयसे विना नवीकरण सञ्चालन हुइती आइल ओ विना जाँचपास तमान हिन्दी चलचित्र प्रदर्शन करल कहटी चलचित्र विकास बोर्ड सोम्मारके स्थानीय प्रशासनके सहयोगमे ऊ सिनेमा हल सिल करल हो ।
सिल करेबेर तमान यन्त्र उपकरण नियन्त्रणमे लेगिल बा । चलचित्र विकास बोर्डके सदस्य सचिव पुष्करराज नेपाल सिनेमाहल करिब ११ वर्षसे विना नवीकरण करके चलचित्र प्रदर्शन कर्नाके साथे केन्द्रीय चलचित्र जाँच समितिसे समेत जाँचपास नैकरके विदेशी कथानक चलचित्र ग्रेट ग्राण्ड मस्टी सार्वजनिक प्रदर्शन करलओरसे कारवाही करल जानकारी देलै ।
२०५४ पुष २२ गते चलचित्र प्रर्दशन कर्ना इजाजतपत्र लेहल, चलचित्र (निर्माण, प्रदर्शन तथा वितरण) नियमावली २०५७ के नियम ९ (२) अनुसार निजके इजाजतपत्रके अवधी पाँचवर्ष २०५९ पुष २१ गतेसम रहे ।
ओकरपाछे हालसम इजाजतपत्रके नवीकरण नैकर्ले हो’, उहाँ आघे कहलै–‘असार २३ गतेसे केन्द्रीय चलचित्र जाँच समितिसे जाँचपास समेत नैहुइल विदेशी कथानक चलचित्र ग्रेटग्राण्ड मस्टी सार्वजनिक प्रदर्शन करलओरसे कारवाही करल हो ।’
ऊ सिनेमाहलहे सिल कर्नासंगे बोर्डके टोली हलके कुछ उपकरण समेत जफत कर्ले बा । सदस्य सचिव नेपालकेअनुसार इक्ट्रीमर प्रोडोजी डिभाइस, एचपी पेन ड्राइभ १६ जिबी, डीएलपी प्रोजेक्टर, क्युब एक्स पी एस सर्भर ओ बिना नम्बरके १६ थान टीकट जफत कर्ले बा ।
चलचित्र (निर्माण, प्रदर्शन तथा वितरण) ऐन २०२६ के नियम १२ बमोजिम कारवाही हुइना जनागिल बा ।
