सन्तोष दहित
घोराही, असार २९ गते । घोराहीके ट्राफिकचोकसे डान्चे पश्चिउ तुलसीपुर जइना डगर ओ राप्ती उपक्षेत्रिय अस्पताल अइना डगरीक वीचम एक्ठो शालिक ठह्राइल बा । सालिकके गिन्यौंर पर्खाल लगाइल रलसेफे आजकाल ऊ पर्खाल तहसनहस हुइल बा ।
ओस्टके शालिकके गिन्यौर इलेक्ट्रोनिक ट्याक्सीके पार्कीङक कैल बा । ओत्रकेल निहोख शालिकके गिन्योंर अस्टक इलेक्ट्रोनिक रिक्साकेल निहोख और बर–बर मोटरगाडी, रिक्सा, ठेलाके पार्किङ जो बनाइल बा ।
शालिकक् दख्खिनओर फोहर मलाई टोकरी राखल बा । कुछदिन आघ यी शालिकके दख्खिनओर रलक पिप्रक रुख्वा काटलपाछ झन शालिकके गिन्योर अस्तव्यस्त हुइल बा । जौन वीचम रहल सालिक किसान नेता गुम्राह थारुके हुइटन । आम किसानहुकन्हक पक्षम आवाज उठैइटी रहल ब्याला २०१७ साउन ६ गते किसाननेता गुम्राहा थारुह तत्कालिन नेपाली कांग्रेसके सरकार रहल ब्याला गोलि ठोक्क मारगिल रह । उह सम्झनाम ओ किसान नेता थारुके सम्मान कैख यी शालिक बनागिल हो ।
आम किसानहुकन्हक पक्षम आवाज उठैइटी रहल ब्याला २०१७ साउन ६ गते किसाननेता गुम्राहा थारुह तत्कालिन नेपाली कांग्रेसके सरकार रहल ब्याला गोलि ठोक्क मारगिल रह ।
लक्ष्मीपुर गाविस वडा नं. ६ वेलुवा वन्जाडेक थारु नम्मा समयसम किसानहुन्हक पक्षम आवाज उठैइटीरहल ब्याला उहीन गोली मार्ख हत्या कैगिल रह । थारुके हत्यापाछे उहाके पार्टी नेकपा एमालेसे सहिद घोषणा कर्लक हो । उह सम्झनाम सहिद गुम्राह थारुक सालिक घोराहीक ट्राफिकचोकम बनागिल हो ।
तर आजकाल ऊ सालिकके रेखडेख नैकख संकटम परल बा । ना ऊ सालिकके संरक्षणम नेकपा एमालेके पार्टीक मनै लागल हुइट न स्थानीयबासी हुक्र । जौन हिसावले सालिकके निर्माण कैगिल, ठह्रागिल तर वाकर संरक्षण, रेखडेख निकर्ना सहिद थारुके अपमान हुइलक थारु वुद्धीजीवि कुलबिर चौधरी बटोइल ।
उहाँकल ‘यी सालिकके आँजरपाँजर फोहर ओ पार्कीङ डेख्ख महि कसिन कसिन लागट ।’ जौन किसिमले सालिकके वरिपरि सरसफाई, मनै वैस्ना खालके पार्क जसिन हुइपर्ना हो । ओसिन निहोख गाडिमोटर पार्किङको फोहर मलाई ढर्ना ठाउँ बनल बा ।’ ‘याकर विषयम नगरपालिका, ट्राफिक ओ सम्वन्धित निकायक मनै स्वाँचपर्ना जरुरी बा ।, चौधरी कल ‘सायद थारुन्हक सालिक होख असिन अभद्र व्यवहार कैगिल हो की ।’
