राम दहित
पवेरा, असार ३० गते । चार घण्टामे तीनहजार विरुवा लगाईल सुनके अपनेहुक्रे अचम्म परे सेकबी । मने पवेराके स्थानीयहुक्रे चार घण्टामे तीनहजार टेलुवा लगाके उहीहे तारबार समेत कर्ले बाटै ।
पवेरा गाविसहे वातावरणमैत्री गाविस बनाईक लाग यहाँके स्थानीयहुक्रे वृक्षारोपण करल हुईट । बोटविरुवा संरक्षण कैना हमार अभियान, जलवायु परिपर्तनके स्थायी समाधान’, वातावरणमैत्री गाविस निर्माणमे आघे बह्री, वृक्षारोपण कार्यक्रममे सवकोई सहभागी हुई’ कना मूलनारासहित पवेरा गाविसके सक्कु घरसे एकजने घरधनी सहभागी होके वृक्षारोपण करल हुईट ।
पवेरा गाविस सचिव बलराम चौधरी वृक्षारोपण कार्यक्रमके उद्घाटन कैटी स्थानीयहुक्रनके जनसहभागितामे वृक्षारोपण कैनामे नेपाल अधिराज्यके गाविसमध्ये पवेरा गाविस पहिल रहल ठोकुवा करलै ।
सुपके नौ जिल्लाके सक्कु गाविसमध्ये पहिल खुला दिसामुक्त गाविस घोषणा कैना सफल हुईनाके साथे कैलाली जिल्लाके फेन पहिल खुल्ला दिसामुक्त गाविस घोषणा हुईल सचिव चौधरी बटैलै । वनविनाससे वातावरणमे देखगैल तमान समस्याहे न्युनीकरण कैनाके संगे गाविसहे वातावरणमैत्री गाविस बनैना उद्देश्यसे वृक्षारोपण करल सचिव चौधरी बटैलै ।
कार्यक्रममे पूर्वसभासद बीरमान चौधरी वृक्षारोपण कार्यक्रमके सकारात्मक रहल बटैटी बोटविरुवाहे संरक्षण सम्बद्र्धन कैना चुनौटी रहल बटैलै । साथे उहाँ वृक्षारोपणसे जलवायु परिवर्तनमे देखा परना समस्याहे न्यूनीकरण करे सेक्नाकेसाथे बोटविरुवासे आर्थिकलाभ फेन लेहे सेक्ना बटैलै । ओकरलाग गाविसके सक्कुजाने लगाईल बोटविरुवाहे संरक्षण सम्बद्र्धन कैना जरुरी रहल बटैलै ।
वृक्षारोपण हसुलियाके सुर्मीनाला खोलुवासे कटैनी लदियासम हुलाकी सडक अन्र्तगत पाँच किलोमिटर ओ पवेरा मण्डीसे छोटी पलियासम कृषि सडकमे दुई किलोमिटरमे वृक्षारोपण करल स्थानीय परशु चौधरी जानकारी देलै ।
कैलालीके जेसिस अध्यक्ष हेमराज ओझा वातावरणमैत्री गाविस निर्माण कैना पवेरा गाविसके सह्रानीय काम रहल बटैलै । ओकरलाग जेसिस सेक्नासम सहयोग कैना जनैटी उहाँ पवेरा गाविस अन्तर्गत रहल सक्कु घरधनीहुक्रनहे आपन घर अंगनामे बोटविरुवा लगायत फुलाके नर्सरी बनाई पर्नामे जोड देहल रहिट ।
ओस्तके नवजीवन सेवा संघके व्यवस्थापक एकेन्द्र ठकुल्ला गाविस जलवायु परिवर्तनसे देखजैना समस्याहे समाधान करकलाग आघे बह्रल देखके खुशी व्यक्त करल रहिट । उहाँ फेन आपन संस्थासे सक्कु कार्यमे सेक्नासम सहयोग कैना प्रतिवद्धता जनाईल रहिट ।
वृक्षारोपण हसुलियाके सुर्मीनाला खोलुवासे कटैनी लदियासम हुलाकी सडक अन्र्तगत पाँच किलोमिटर ओ पवेरा मण्डीसे छोटी पलियासम कृषि सडकमे दुई किलोमिटरमे वृक्षारोपण करल स्थानीय परशु चौधरी जानकारी देलै ।
साथे उहाँ हुलाकी सडक अन्र्तगत पीचरोडसे १० मीटर दुरीमे ओ हरेक बोटविरुवाके फेन १० मिटर दुरीमे वृक्षारोपण करल समेत चौधरी जानकारी देलै । वृक्षारोपण करल बोटविरुवामे अशोका, गुलमोहर रहल बा ।
बृक्षारोपण कार्यक्रममे ईलाका वन कार्यालय बसन्ताके दीप्त प्रकाश थापा, ईलाका प्रहरी हसुलियाके ईन्चार्ज भरत धिताङ, पवेरा हेपो ईन्चार्ज भुपेन्द्र महरा लगायत गाविसके राजनीतिक दल, वडा नागरिकमञ्च, नागरिक सचेतना केन्द्र, युवा क्लव, बडघर भलमन्सा, महिला स्वयम्सेविका लगायत गाविसके सक्कु घरधुरीसे एकजनहनके सहभागिता रहल रहे ।
गाविसस्तरीय समन्वय समितिके आयोजनामे हुईल कार्यक्रमके प्राविधिक सहयोग पवेरा गाविस कार्यालय, ईलाका वन कार्यालय बसन्ता, नवजीवन सेवा संघ, जेसिस धनगढी सहयोग करल रहे ।
