राम दहित
पहलमानपुर, साउन १८ गते । थरुहट तराई पार्टी नेपालके वरिष्ठ नेता तथा सांसद गोपाल दहित सिमांकनके विषय विन ओरवैले स्थानीयतह पुनःसंरचना प्राबिधिकरुपमे उपयुक्त नैरहल बतैले बातैं । स्थानीयतह पुनरसंरचना आयोगसे करल प्रस्ताव स्वीकार नैकर्ना उहाँ कहलैं ।
मंगरके रोज पहलमानपुर–५ आमबासामे आयोजित अन्तरक्रियाहे सम्बोधन कर्टी उहाँ प्रदेशके सिमांकन पुरा नैहुइटसम गाउँपालिका ओ नगरपालिकाके पुनःसंरचना कर्ना काम कौनो फेन हालतमे आघे बह्रे नैडेना बटैलै ।
ओस्टके उहाँ अब्बा गठनके तयारीमे रहल लौव सरकारमे जैना आपन पार्टीके कौनो आधार नैरहल बटैलै । मने अप्नेहुकनसे पेश करल राज्यके पुनःसंरचना, टीकापुर घटनाके कैदी हुकनके रिहाई, पीडित हुकन क्षतिपूर्ति उपलब्ध करैना लगायत आठबुंदे माग पुरा हुइना प्रतिवद्धता अइलेसे सरकारमे जाइ सेक्ना सम्भावना रहल उहाँके कहाई बा ।
ओस्टेक ऊ पार्टीके सचिव मीनराज चौधरी फेन स्थानीयतह पुनःसंरचना आयोगसे नानल गाउँपालिका तथा नगरपालिकाके पुनःसंरचनाके काम अर्थहिन रहल बटैलै । जौन पुनःसंरचनाके काम तत्काल रोकक् पर्ना फेन उहाँके कहाई बा ।
जिल्ला अध्यक्ष वीरबहादुर चौधरीके घरगोसियाईमे हुइल कार्यक्रमके बरका पहुना सांसद दहित रहल रहिट कलेसे खास पहुना पार्टीके सचिव मीनराज चौधरी रहल रहिट । कार्यक्रममे पार्टीके केन्द्रीय उपाध्यक्ष नन्दकुमार थारु, सदस्य सुरज कठरिया, कन्हैयालाल चौधरी, पार्टीके विद्यार्थी संघके केन्द्रीय सदस्य दिपेन्द्र चौधरीलगायतके वक्ताहुक्रे फेन कार्यक्रममे बोलल रहिट ।
