राम दहित
उदासीपुर (कैलाली), भाद्र १३ गते । बसौटी गाविस ७ लोहरपुरमे बनल थारुनके पहिचान बोकल थारु रजरमरुवाके सोम्मारके रोज एक कार्यक्रमसहित उद्घाटन हुइल बा ।
रजरमरुवाके उद्घाटन थरुहट तराई पार्टी नेपालके केन्द्रिय सदस्य माधव चौधरी करल रहिट । कार्यक्रमके बड्का पहुना समेत रहल चौधरी थारुनके ऐतिहासिक पहिचान बोकल देउठनुवा थारु समुदायके मूलपुजा कैना ठाउँ रहल बटैलै ।
थारु ग्रामीण बस्तीमे रहल यी मेरके देउठान दिनप्रति दिन लोप हुइटी गैल ओरसे यकर संरक्षण सम्वद्र्धन कैना सक्कु थारु समुदायके दायित्व रहल बटैलै ।
बसौटी गाविस ७ लोहरपुरमे निर्मित देउठान थरुहट तराई पार्टीके सांसद गंगा थारुके संसदीय विकास कोषके आर्थिक सहयोगमे बनल हो ।
लोहरपुर गाउँक भलमन्सा राजकुमार चौधरीके घरगोसियाइमे हुइल कार्यक्रमके पहुनामे पार्टीके जिल्ला उपाध्यक्ष प्रदेशी थारु, थाकस क्षेत्र नं. ३ के सभापति भागीराम चौधरी, थरुहट पार्टीके गदरिया गाविस अध्यक्ष राजाराम चौधरी, उदासीपुर अध्यक्ष रामकुमार थारुके सहभागिता रहल रहे ।
