कैलारी गाउँपालिका–७, साविक रतनपुर–८ भुईयाफाँटा स्थायी घर रहल लाजुराम चौधरी ‘अंकित’’२०५४ साल कैलाली बहुमुखी क्याम्पस धनगढीमे पह्रेबेर टुसा थारु विद्यार्थी परिवारके सहसचिवमे निर्विरोध चयन हुइल रहैं । संगाठनिक क्षेत्रओर लागके उहाँ २०५६ साल पौष २९ गते तत्कालीन नेकपा (माओवादी) पार्टीमे भूमिगत हुके सक्रिय राजनीतिमे लागल रहैं । उहाँ करिब १८ बरस राजनीतिक क्षेत्रओर आपन पुरा समय खर्च करसेकल बाटै । हाल नेकपा (माओवादी केन्द्र) से कैलारी गाउँपालिका प्रमुखके लाग प्रत्यासी उम्मेदवार हुइँत लाजु । उहाँ कैलारी गाउँपालिकाहे नमूना ओ ग्रीन गाउँपालिका बनैना प्रतिवद्धता जनैले बातैं । प्रस्तुत बा हमार पहुरा डट कमके राम दहितके करल बातचित
चुनावी महोल कैसिन बावै गाउँघरमे ?
– जत्रे–जत्रे चुनावके दिन लग्गे आइता ओत्रे चुनावी महौल तातुल हुईटी जाईटा । स्थानीय तहके निर्वाचन बारेमे ढेउरसे ढेउर मनैन्हे पता नाई हुइलक ओरसे बुझक लाग चासो रख्ले बाटै । राजनीतिक दलहुक्रे आपन उम्मेदवार छनौट कैनासे लेके प्रचारप्रसार कर्नामे दँतल बातैं ।
गाउँपालिका प्रमुखके लाग अपनेक उम्मेदवारी का जे ?
– मै राजनीतिमे संलग्न हुईलक करिब १८ बरस हुइता । देश परिवर्तन ओ विकास करकलाग भूमिगत जीवनसे लेके खुला राजनीतिमे भारी योगदान डेहल हस लागत । आपन देश ओ समाजभित्तर रहल मुठ्ठीभर शाषकहुक्रनके हाथसे जनतनमे शासनसत्ता लानकलाग जनयुद्धसे लेके २०६२÷०६३ सालमे हुइल जनआन्दोलनमे आपन पार्टीके तरफसे नेतृत्व कर्ना, थारु मुक्तिकेलाग थारु आन्दोलनके अगुवाई ओ प्रत्यक्ष भूमिका खेल्नु । कयौं विकास निर्माण ओ मुद्दा मामिलामे न्यायोचित तरिकासे कामकर्ना हुईलक ओरसे मै एक अनुभवी, सक्षम नेतृत्वकर्ता हुँ जैसिन लागथ् । यी कैलारी गाउँ पालिकाहे तिब्र गतिमे विकास कर्नासे लेके यहाँ बैठल सक्कु जाजतातिहे मिलाके सामाजिक सन्तुलन कायम रख्ना भिजन हुईलक ओरसे मोर उम्मेदावरी हो ।
अपनेहे विश्वास कैना आधार का होवई ?
– अब्बेक स्थानीय तहके निर्वाचन ऐतिहासिक महत्वके बा । इतिहासमे भरखर स्थानीय सरकारके अनुभूति जनताहुक्रे करे जाईटै । यी स्थानीय तहके दुईठो काम प्रमुख हो । पहिल काम ग्रामीण विकास ओ दोसर स्थानीय कानून बनैना । यी कैलारी गाउँपालिकामे दूरदृष्टि हुईल नेतृत्वके जरुरी बा । जनता मही भोट डेना कलक पार्टीहे भोट डेना हो । मही विश्वास कैना कलक पार्टीहे विश्वास कैना हो । संघीयता, गणतन्त्र, धर्म निरपेक्षता, समावेशी, महिला, दलित, जनजातिके अग्रधिकार यी हमार पार्टीके नानल एजेण्डा हो । यिहीहे कार्यन्वयन कर्ना अब्बे यी चुनाव हो ।
और रहल मोर बारेम । मै पार्टीके सिपाही हुँ । जस्तक जनता पार्टीहे विश्वास कर्ले बाटै आस्टके मही विश्वास कर्ना आधार हो । दोसर बात मै स्वयम् अईसीन परिवर्तनकारी भूमिकामे संलग्न बाटुँ । मै आपन पार्टीके जिम्मेवार व्यक्ति फेन हुँ । अब्बे फेन जिल्लाके सचिव पदमे रहीके काम करटी बाटु । २०६७÷०६८ साल धनगढी नगर विकासके अध्यक्ष पदमे रहीके जनतनके सेवा कर्नु । जनतनके दुःख पीडासंग प्रत्यक्ष संलग्न बाटुँ, ओकर समाधान फेन कर्ले बाटु ।
कैलारी गाउँपालिका बनैना अपनेक योजना का बा ?
–कैलारी गाउँपालिका साविक ६ ठो गाविस मिलके बनल बा । सक्कुहुन पताफेन बा कि यी ठाउँ औरे नगरपालिका, गाउँपालिकासे पछगुरल गाउँपालिका हो । शिक्षा, स्वास्थय, रोजगार ग्रामीण पूर्वाधार विकास लगायत हरेक क्षेत्रमे पछगुरल बावै । यी गाउँपालिकाहे समृद्ध ओ आर्थिक उन्नती बिनाकर्ले विकासमे कौनो सम्भवना नाई हो । कमसेकम २०÷२५ बर्षसमके मास्टरप्लान बिना बनैले समृद्ध नाई बनेसेकी । ओहेक मारे स्मार्ट कैलारी गाउँ पालिकाके अवधारणा अन्तर्गत लानके आगे बह्रे परना जरुरी बा । जनतनके सहज पहुँच ओ निरन्तर अन्तरसम्बन्धके लाग रिङरोड बनाई पर्ना बा । पर्यटकीय क्षेत्र बनाईकलाग कोईलही ताल, मझराके ताल, कमलपोखरी ओ कैलारीगाउँस्थित ताल, वनदेवी मन्दिर, कालीमाई मन्दिरलगायत धार्मिकस्थलहे पर्यटकीय क्षेत्र बनाके आयआर्जनमे वृद्धि कैना जरुरी बा । प्रत्येक वार्डमे पार्क स्थल, गदरिया, हसुलिया क्षेत्रमे बहुमुखी क्याम्पस स्थापना, उदासीपुर (पृथ्वीपुर) मे सिकलसेल उपचारार्थ हस्पीटल, बसौटीमे प्राविधिक कलेज, हसुलिया बजारहे औद्योगिक एवं व्यापारिक केन्द्र निर्माण, गदरिया बजारहे शहरी विकासके अवधारणा लानके आघे बह्रैना हो । किसानहुक्रन आत्मनिर्भर ओ आधुनिकीकरण करक लाग छोट या भारी किसान विकास कार्यक्रम लन्ना जरुरी बा ।
यहाँक नागरिक लडियक डुवान कटानसे धेउर पीडित बातैं समाधानके कुछ उपाय बा कि ?
– यहाँक बासिन्दनकेलाग सबसे संवेदनशील विषय हो यी । मोहना, कटैनी, सुर्मीनाला, गौरीगंगा, घुराहा लडियासे डुवान, कटान, पटानसे किसान पीडित बाटै । यकरलाग केन्द्रिय सरकारसे प्राविधिक टोलीहे लानके गुरुयोजन बनैना जरुरी डेख्ठु । प्राविधीक टिममार्फत योजना बनाके कत्रा ढिउर रकम खर्चे परना हो ? कहाँ–कहाँ नियन्त्रण करेपर्ना हो ? गुरुयोजना बनाके लैजैना मोर भूमिका रही ।
यहाँ आभिनसम गाउँवस्तीमा विद्युत लगायत सञ्चारसेवाके पहुँच नाई हो, अपने कैसिन योजना लन्बी?
– यी २१ औं शताब्दी हो । संचारके यूग हो । संचारबिना कौनो फेन मनै प्रगति नै करेसेकी । संचारके विकास प्रविधीके विकास हुईलकओरसे विश्वकेन्द्रित बा । संचारके संगसंगे विद्युतके बात फेन आईठ् । ओहेकमारे हर व्यक्ति हर समाज घर संचारसे जुर्ना जरुरी बा । एकरलाग यी गाउँपालिकामे रेडिया एफएमके स्थापना कर्ना जरुरी बा । पत्रपत्रिकाके लाग प्रेस खोल्ना जरुरी बा । गाउँ टोलमे संचारके संग विद्युत ओ विद्युतके संचार लैजैना जरुरी बा ।
यहाँके स्थानीयहुक्रे सतप्रतिशत कृषि पेशामे आश्रित बाटै, कृषि विकासके लाग अपनेक कैसिन योजना बा ?
– विल्कुल सही बात कहली । कृषि पेशामे स्थानीयहुक्रे आश्रित बाटै । कृषिमे आधारित गाउँपालिका हुईलक ओरसे यी क्षेत्रमे ध्यान जैना जरुरी बा । ओहेकमारे हमार पार्टी आधुनिकीकरण कृषि परियोजना’यिहे गाउँ पालिकामे लागु कैले बा । यिहेअनुसार किसानकेलाग गोदामघर, कुटीर उद्योग, कृषि सामाग्री उचित प्रकारसे वितरण, छोटभारी कृषि उद्योग सञ्चालन, हाटबजार जैसिन व्यवस्था कैके लैजैना हो ।
अन्त्यमे कुछ कना चाहटी ?
– अन्तमे धन्यवाद डेटी यी गाउँपालिकामे तमान धर्मावलम्बी, दलित, थारु ओ पहाडी समुदायबीच सामाजिक सन्तुलन कायम करटी शान्ति समृद्ध ओ आर्थिक उन्नति प्रगतिमे कैलारी गाउँपालिका निर्माण होए, सक्कुहुनके सहयोग रहे कहे चाहटु । मै जितम त यी गाउँपालिकाहे उर्वर बनैना प्रयास करम ।
