सामाजिक जागरनक लाग साहित्यके भूमिका महत्वपूर्ण (थारु भाषा)

राजु चौधरी

गाऊँपालिका ३, उत्तर भडरी, कैलाली
सामाजिक जागरनक लाग पत्रपत्रिका ओ अनलाइनम साहित्यिक एकडम गहन भूमिका रठिस् । काहेकि आस्काल डिजिटल प्रबिधी, इन्टरनेट रलसे हमार नेपालके परिवेशम सक्कुन्हँक पहुँचम नै हो । ऊ सेवा ओकर विकल्प कलक पत्रपत्रिका हो । यी सब माध्यमसे साहित्यमार्फÞट सामाजिक चेटनामुलक मनोरंजनात्मक सामाजिक भेंदभाव जैसिन समाज रूपान्टरनके लाग सिर्जना कैल साहित्यक रचना पिछ्रल बर्ग पीडित बर्गनहे जागरूक कराइ सेक्जाइठ् । तबमार सामाजिक चेतनास्तर उप्पर उठाइकलाग साहित्यक बहुत बरवार भूमिका रठिस् ।

पुनाराम कर्याबरिक्का

युवा साहिट्यकार
साहित्य एक्ठो समाजके बिम्ब हो, ऐना हो । समाजम हरेक मेरमेरिक घटनाक्रम घटठ् । उह घटनाहँ पाठक्के आघ लन्ना काम साहित्य जो करठ् । साहित्य मार्फतफे समाजिक जागरन कर सेक्जाइट् । जस्त कि चेतनामुलक रचना बाचन कैख, नाटक डेखाक, गित गाख हुइठा कि असिन तमाममेरिक साहित्यक बिधा मार्फतफे समाजम सामाजिक जागरन कर सेक्जाइठ् । समाजम बातचित बट्वाख, सम्झाबुझाख नि बुझ्ठो कलसे साहित्यमसे बुझाइ सेक्जाइठ् । मेरमेरिक साहित्यक पोस्टा पर्ह डेख । साहित्यक खेंर्या कराख । साहित्यक कचेर्हि बैठ्क । मेला महोत्सब कैख साहित्यक अभियान चलाख असिन तमाम मेरिक कार्यक्रम ढर्ख सामाजिक जागरनके लाग साहित्यक बरवार भुमिका बाटिस् कना म्वार बिचार हो ।

सागर कुश्मी,

युवा गजलकार
साहित्य समाजके पहिचान हो । जौन समाजके भासा साहित्य कला संस्कृती बा ऊ समाज समुन्ननत हुइल बा । साहित्य समाजके बिकृति, अन्धबिश्वास, रुढिबादी कुविचारहे चिरफार कैके सहि डग्गर फेन डेखाइठ् । जहाँ साहित्य बा वहाँ ऊ समाजके आर्थिक, सामाजिक, राजनीतिक, सांस्कृतिकपक्ष फेन डरगर बा । तबमारे सामाजिक जागरनके लाग साहित्यके बरवार भुमिका रठिस् ।

बुद्धिरामचौधरी

अध्यक्ष, जंग्रार साहित्यिक बखेरी, साउदी अरेबिया
साहित्य कलक समाजकके ऐना हो । उहमार जट्राफे लेखक हुँक्र बाट समाजम हुइल घटना हँ केराख एक्डम लिरौसी ओ ल्वाभलग्टिक रुपम आपन कलाकौसल बेलस्ख समाजम डेल रठ । ऊ मनैन्हक हिरडा पग्ला डिहेठ् । ऊ मनैन्हँक मन चोर्डिहठ् । वहिम रुइना मनैन हँसाइ सेक्नाव हंस्टी मनैन रुवाइ सेक्ना तागट रठस् । जब जसिनमेरिक परिस्थिती बा ओस्टमेरिक रचना, सिर्जना मिलल् कलसे मनै हो त कहुँ जाट्टिक हो कना होजैठ । असिक मनैनके मन जित सेक्ना कलक साहित्य हो । लेखक समाज सुढारक बारेम लिखल बा कलसे अबस्यफे समाजक सुढारम प्रभाव पर्जाइठ् । राजनीतिक, आर्थिक, धार्मिक, सांस्कृतिक या प्राकृतिक सम्पडाके संरक्षणक बारेम लिखल् बा या देश बिकास या देस प्रेमक बारेम लिखल् बाकलसे पाठक हुँक्र फुरसे हो यी त करही पर्ना हो । यी त हुइही पर्ना हो कना होजाइठ । तबजाख एक एक बुँद मिल्ख समुड्र बन्ठा । ओस्त एक एक कैख मनैन्हक बिचार बडल्गिल् कलसे एक एककर्ख समाज बडल्ना बेर निलागठ् । जहाँ पुग्दैन रबि त्यहाँ पुग्छ कवि कना नेपालीम एक्ठो कहावट बा । यी कहावट ओस्टहे बनल निहो । यी जीवन भोगाइम परल मनैहक अनुभव हो । यी ब्यबहारिक रुपम बेलस्ख थाहा पैलक बात हो । जट्रा झट्ट एक्ठो बल्गर बिचार, बल्गर सन्डेस गाउँघर समाजम फैलट ओट्रहे झट्ट एक मेरिक बिचार ओ सोँचाइ बन्जाइठ् ओ सामाजम जागरण लान सेक्जाइठ् ।

रामचन्द्र चौधरी

पूर्ब अध्यक्ष, जंग्रार साहिट्यिक बखेरी, साउदी
साहित्य समाजके ऐना हो । यिहे भनाई हे निहारे बेर का भाव डेख मिलठ कलेसे हरेक समाजहे चित्रण कर्ना नै साहित्य हो । हरेक समाजके अपन संस्कृति, संस्कार भासा रहठ् । उहे भासिक रुपहे एकठो सुन्दर व्यवस्थित रुप साहित्य हो । साहित्यक रुपमे सम्वृद्ध हुइना कलेक भासिक क्रान्ति हो । यदि हम्रे भासिक रुपसे सम्वृद्ध हुई जैबी त हमार समाजफे जागरुक हुइना दुईमत नि हो ।

हमार समाजमे यी मेरिक भासिक संरचना बा । गितबाँस बा, बट्कोही खिस्सा बा । यी सबकुछ हुइकलाग साहित्य एकदम जरुरी बा । आब्ब बिश्व साहित्यक क्रान्ती करसेकल अवस्था बा । कलमके मद्दतसे विश्व कहाँसे कहाँ पुग राखल् बा । कलसे हम्रेफे साहित्य मार्फत आपन समाजहे जागरुक कराई सेकब । समाजमे सचेतना फैलाई सेकब । ओकर लग ते निरन्तर भासा साहित्यमे छलफलके जरुरट डेख मिलठ् । महि लागठ् साहित्यक छलफलसे जो हम्रे हमार समाजमे लउव क्रान्ति नाने सेकब । यी सब बातहें हेरेबेर लागठ्कि समाजमे जागरुता नानेक लग साहित्यके एकदम ढेर भूमिका बा ।

प्रस्तुतिः सोम डेमनडौरा