हम्र बच्पनक संघारी
लंगौटिया यार
संग बहर्लक, कुड्लक
संग खेल्लक, खैलक
मै व चक्रपाणी
हम्र डुनु बच्पनक गोचाली ।
सक्कह्र्यं उठ्टी किकौह्राखाई
कबु हमार कबु वाकर बारिक आलु चोरी
कबु ब्याकर बारिक पिप्पर चोरी
कबु केक्रो खोंघ्या झारी
वड्राझर्ना, मुस्वाकोर्ना
डुनुजे पट्कीभिर्वा खेल्ना
हमार डिनचर्या रह
हमार डुनु लंगौटिया यारक कहानी ।
स्कुलसे भाग्क
मट्राहा खेट्वम चहर्लक याद बा
बुह्र्याकुल्वम संग डुब्की मर्लक याद बा
एक अउरक पर्गा लग्लक याद बा
हो हम्र बरा मिल्नाहा रल्हि
साटजर्मक जोर्याहस् लाग
हम्र डुनु बच्पनक संघर्या ।
हमार घर जोंट्ल रह
एक अउरक पिखाहुँ ज्वाँटल्
उहिंसे ढ्यार ज्वाँटल् मन व मित्रता
एक्क सिह्रनी रह
एक अउरक शाँस बनी
हम्र डुनु गोचालीन् ।
एकदिन,
अचानक, बिनपट्टक
पहारओंर्से बयाल बहल्
तराई ओर्से आँढि चलल्
कबु यहँर ढक्यालल् कबु उहँर
बयाल व आँढिक टक्राब शुरु हुइल्
आँढी बौखा हमार पिखाहुँ हुइटि गैल
बिच्चम डरार बनाइल्
हमन डुनुहन् डुई फ्याँक पारल्
हमन् डुनु संघर्यन् ।
ड्वासर दिन्
पिखाहुँ बेन्ह्वा बनल्
कटाँहा बेन्ह्वा
एक व अउरक घरक बिच्चम
सिमाना मिचामिच किल्ला गार्गैल्
नापनक्साबनागैल्
हमार सम्बन्धक बिच्चम
लंगौटिया यारक बिच्चम ।
किऊकहल्
टैं ढ्यांग ऊ ठ्यापिच
ऊ ड्वांगिल् टैं ठुल
टैंगोर्हर ऊ कर्या
नाकलम्मा व ठ्यापिच
हो अउर जे उक्सैटि गैल
हम्र डुनु जे ओनैटि रलिहुँकन्हँक बाट
बिसर्गैली बच्पन
बिसर्गैलीनुह व मास
हम्र डुनु संघारी
बन्गैली इपार व उपार
टब झग्रा बह्रल बारम्बार
हमार बिच्चम
लंगौटिया यार, बच्पनक गोचालीक बिच्चम ।
