काठमाण्डौ, फागुन ८ गते । ठुम्रार साहित्यिक बखेरी गजलकार तथा रेडियो कार्यक्रम प्रस्तोता सेवेन्द्र कुसुम्याहे सम्मानित कर्ले बा । शनिबार काठमाडौंमे हुइल बखेरीके छत्तीसौ साहित्य श्रृंखला त्रिवि कीर्तिपुर परिसरमे कुसुम्याहे सम्मानित करल हो ।
बर्का पहुना नेवा बस्ती नेवा स्कूल अभियानके संयोजक दीपक तुलाधर कुसम्याहे सम्मानपत्र प्रदान कर्लै । साथे, ठुम्रार साहित्यिक बखेरीके संयोजक कृष्णराज सर्वहारी उहे कार्यक्रममे बिक्री हुइल मेरमेरीक थारु किताबके बिक्री बापतके रकम १ हजार ७ सय ५० रुपैया हौसलास्वरुप कुसुम्याहे प्रदान कर्लै ।
हसुलिया–८, डम्मारा, कैलाली निवासी सेवेन्द्र कुसुम्याके उत्पादन तथा प्रस्तुतीमे ल्वाह्रल मन थारु साहित्यिक साप्ताहिक कार्यक्रम नेपालके १४ ठो एफएम रेडियो ओ अनलाइनमे प्रसारण हुइठ । सम्मानित व्यक्तित्वके उपर प्रकाश पर्टी कवि÷गीतकार सुशील चौधरी कहलै– रेडियोकर्मी सेवेन्द्र अनलाइन मार्फत् बिदेशमे समेत थारु साहित्यहे अडियो मार्फत् छिट्क्वइनामे लागल ओरसे उहाँ सम्मानके हकदार हुइँत् ।
सम्मानित व्यक्तित्व सेवेन्द्र आपन कोठाहे स्टुडियो बनाके बँचल समय रेडियो कार्यक्रम उत्पादनमे लगैलक सम्झटी सम्मान कर्लकमे ठुम्रार साहित्यिक बखेरीहे धन्यवाद डेलैँ । सम्मानले साहित्यमे निरन्तर लागे पर्नामे थप जिम्मेवारी आइल उहाँ बटैलैं ।
कार्यक्रममे प्रकृतिपूजा चौधरी, भूमिका थारु, शिव शक्ति, दीपक चौधरी, नन्दु सर्वहित, रोशन रत्गैया, सरिता पछलडंग्या, फोनमार्फत् बर्दियाके स्रष्टा ठाकुर अकेला लगायत कविलोग आपन रचना सुनैले रहिट ।
कार्यक्रममे पैल्हा फेरा उपस्थित हुइल नवलपरासीके शिक्षक ज्ञानेन्द्र महतो कीर्तिपुरके कार्यक्रमले आपन जिल्लामे कार्यक्रम करना उत्प्रेरणा मिलल बटैलैं । बर्का पहुना दीपक तुलाधर राजधानीहस ठाउँमे निरन्तर तीन बरस थारु साहित्य श्रृंखला कर्लकमे आयोजक प्रशंसायोग्य बा कहटी भाषा जोगाइक लग थरुहट क्षेत्रके स्कूलमे थारु किताब लागु करे पर्नामे जोड देलैं ।
