राम दहित
रतनपुर, जेठ २३ गते । बर्खाबुँदीक समयमे बद्री गरगराई लग्टीकिल खुशीराम चौधरी गहिर सोँचमे परजैठै । आज दोकान कैसिक जैना हो, कहिके ।
रतनपुर–९ भुँईयाँफाँटाके स्थानीय खुशीराम चौधरी पवेरा मण्डीमे कपडापसल सञ्चालन करले बाटै । उहाँ भुईयाँफाँटासे हरेकदिन पवेरामण्डीमे पसल सञ्चालनके लाग आवातजावत करठै । थोर–थोर पानी परटीकिल डगरामे हिलाकिचा होके आवतजावत कैना समस्या हुईलक कारण चौधरी सोँचमे परल हुईट । ओस्तके श्री राष्ट्रिय माध्यमिक विद्यालय भुईयाँफाँटाके शिक्षक चेतप्रसाद चौधरी फेन पानी परेहसक कैटीकिल स्कूल पह्राईजैना समस्यामे परजैठै । शिक्षक चौधरी पवेरासे हरेक दिन भुँईयाँफाँटा स्कूल जाई परना रठिन् ।
यी समस्या रतनपुर गाविसके जल्दाबल्दा समस्या हो । पवेरा गाविस अन्तर्गत बैशपुरके कटैनी लदियासे बड्का बसन्ता, छुट्की बसन्ताके नर्सरी, भुँईयाँफाँटा हुईटी करिब ५ किलोमिटर कच्ची डगरामे हिलाकिचा होके जे कोहीहे फेन आवातजावत कैना समस्या सिर्जना हुइल बा ।
पाछेक समय यी कच्ची डगराके स्तरोन्नतीके काममे सक्कु निकायसे वेवास्ता हुइल बा । कच्ची डगराके करिब ५ सय मिटर उत्तरओरसे हुलाकी रोड बन्ना एक थरीके कहाई बा । कलेसे दोसरके कहाई यहे कच्ची सडक हुइटी हुलाकी राजमार्गहे भजनीसम पुगैना रहल बा । हुलाकी सडक कहोरसे लैजिनाबारे स्ष्ट नैहुइलपाछे स्थानीय विकास निर्माण प्रभावित हुइल हो ।
रतनपुर–७ रामपुरके भलमन्सा चतुरराम चौधरी यी कच्ची सडक बन्ना आशमे हालसम सडकके मर्मत सम्भारके काम हुई नैसेकल जानकारी देलै । हुलाकी राजमार्ग बन्ना सम्भावनाके कारण स्थानीय निकायहुक्रे सडकके स्त्तरोन्नतीके लाग बजेट बिनियोजन नैकरल फेन उहाँके कहाई बा ।
रतनपुर–७ रामपुरके भलमन्सा चतुरराम चौधरी यी कच्ची सडक बन्ना आशमे हालसम सडकके मर्मत सम्भारके काम हुई नैसेकल जानकारी देलै । हुलाकी राजमार्ग बन्ना सम्भावनाके कारण स्थानीय निकायहुक्रे सडकके स्त्तरोन्नतीके लाग बजेट बिनियोजन नैकरल फेन उहाँके कहाई बा ।
‘ना हुलाकी बनठो, ना स्थानीयके स्तरोन्नती । यिहे ना उहे हाथेभर गुहे कना हस अवस्था बा, उहाँ आघे कहलै । हिउदमे धुलाम्मे बर्खामे हिलाम्मे रहल डगरा हिउदमे किल धनगढीसे हसुलिया, पवेरा, रामपुर हुईटी भजनीसम बस सञ्चालन हुईना बसन्ताके स्थानीय रामचरण चौधरी बटैलै । बर्खाके बेला धनगढीसे पवेरासम किल बस अइटी रहल उहाँ बटैलै । यिहीसे यात्रुहुक्रन धेउर समस्या परल फेन चौधरी कहलै ।
कच्ची डगरासे सक्कुहुनहे आवातजावतमे समस्या परल कहटी डगरामे माटी पटान कैके ग्राभेल कैना आवश्यक रहल श्री सरस्वती युवा जागरण क्लब भुईयाँफाँटाके अध्यक्ष चेतराम दहित बतैलैं । उहाँ डगराहे ग्राभेल कैना सक्कु सरोकारवाला निकायके महत्वपूर्ण भूमिका रहल बटैटी बजेट बिनियोजनके लाग सम्बन्धित गाविसके ध्यान जाइक पर्ना जरुरी रहल उल्लेख कर्लै ।
रतनपुर गाविस सचिव सन्तोषकुमार चौधरी गाविसके न्यूनबजेट ओम्नेफेन सबओर हेरे परना रहल ओरसे ऊ सडकमे ग्राभेल करे नाई सेकल बटैलै । मने उहाँ लौव आर्थिक बरषमे डगराहे ग्राभेलके लाग सेकटसम बजेट विनियोजन कैना बटैलै । उहाँ परिषदसे ऊ डगराके लाग ग्राभेल कैना बजेट विनियोजन कैना समेत बटैलै ।
