राम दहित
धनगढी, २३ जेठ । नेपाल आदिवासी जनजाति महासंघके पूर्व अध्यक्ष तथा थारु कल्याणकारिणी सभाके पूर्व महामन्त्री राजकुमार लेखी टीकापुर घट्नासे पक्रावा पाके जेल जीवन बिटैटी रहल कैदीहुक्रनके राजनीतिक मुद्दा रहल बटैटी उहाँ राजनीतिक तवरसे समाधान करेपर्ना बटैले बाटै ।
अँट्वारके रोज धनगढीके करागारमे कैदीहुक्रनके भेटघाटपाछे उहाँ ओईसीन धारना राखल हुईट । पूर्व अध्यक्ष लेखी कहलै–‘थरुहट÷थारुवानके आन्दोलन राज्य, सरकार पक्षसे रहल ओ संविधानमे आपन हकअधिकार सुनिश्चिताके लाग करल आन्दोलन हो ।’
उहाँ भदौ ७ गते टीकापुर घट्ना घटेपुगलमे सरकारके बहुट भारी कमजोरी रहल औल्याईटी उहे घट्नासे सरकार पक्षसे निर्दोष थारुहुक्रन उपर झुठा मुद्दा लगाके कैदी जिवन बिटैना बाध्य पारल बटैलै ।
साथे उहाँ सरकारसे तत्काल यी झुठा मुद्दा खारेज करेपर्ना ओ यी समस्याहे राजतीनितिक तवरसे हालीसेहाली समाधान कैके निर्दोष थारुहुक्रनहे रिहाई करे पर्ना बटैलै ।
नेता लेखी कैदीजीवन बिटुईया सक्कुजहन मन्त्री लगायत नेताहुक्रनसे रिहाई करैना झुठा अश्वासनमे नाई परना आग्रह करलै । नेपाल आदिवासी जनजाति महासंघके अध्यक्ष नगेन्द्र कुमाल कैदी जिवन बिटैना बहुट कर्रा रहल बटैटी सरकारसे सत्यतथ्य छानविन कैके निर्दोषहुक्रनहे तत्काल रिहाई करे पर्ना बटैलै । उहाँ अपने केन्द्रमे यकर लाग सेक्ना पहल कैना प्रतिवद्धता जनैलैं ।
भेटघाट कार्यक्रममे कैदी जीवन बिटैटी रहल थाकस कैलाली सभापति लाहुराम चौधरी देशके तमान ठाउँसे आपनहुक्रनहे भेटे आईल मने जिल्लासे कौनो फेन राजनीतिकदलके पार्टी प्रतिनिधी, नेताहुक्रे भेटघाट करे नाई आईलमे दुखेसो पोख्लैं ।
भेटघाट कार्यक्रममे कैदी जीवन बिटैटी रहल थाकस कैलाली सभापति लाहुराम चौधरी देशके तमान ठाउँसे आपनहुक्रनहे भेटे आईल मने जिल्लासे कौनो फेन राजनीतिकदलके पार्टी प्रतिनिधी, नेताहुक्रे भेटघाट करे नाई आईलमे दुखेसो पोख्लैं ।
टीकापुर घट्नाहे लेके कैलाली करागारमे कैदी जिवन बिटुईया कैदीहुक्रनहे भेटकरे थाकस केन्द्रिय कोषाध्यक्ष जयराज पंजियार, थाकस केन्द्रिय सदस्य रामकृष्ण चौधरी, इन्दिरा चौधरी, भागीरथी चौधरी, यशोदा चौधरी, थारु महिला सभा सुनसरीके सभापति शुशिला चौधरी, हरिदेवी पंजियार, प्रितम चौधरी, आदीवासी जनजाति महासंघ पोखरा उपाध्यक्ष सुर्य भुजेल, भुजेल समाज कास्कीके शम्भु घर्ती लगायत हुक्रे जेलजीवनबारे जानकारी लेहल रहिट ।
थारु कल्याणकारी सभा, आदिवासी जनजाति महासंघ लगायत तमान जनजाति संस्थाके सहयोगमे कैदी जीवन बिटुईया हुक्रनके परिवारहे आज (सोम्मारके) सहयोग रमक हस्तान्तरण कैना बतैले बातै । प्रति परिवार छ हजारके दरसे २५ परिवारहे एक लाख ५० हजार सहयोग रकम हस्तान्तरण कैना आदिवासी जनजाति महासंघके पूर्व अध्यक्ष राजकुमार लेखी जानकारी देलैं । उहाँ आपन पहलमे यी सहयोग रकम तमान आदिवासी संघसंस्था लगायत व्यक्तिहुक्रसे संकलन करल समेत बतैलैं ।
